މިހާރު ކުރިއަށްދާ ޓީ20 ޕްރިމިއާ ކްރިކެޓް ލީގުގައި ކުުޅުނު ހުރިހާ މެޗަކުން މޮޅުވެ، މިލާން ކްރިކެޓު އެކަޑެމީން މުބާރާތުގެ ތަށި އުފުލާލައިފި އެވެ.
ޖުމްލަ 10 ޓީމާ އެކު މިދިޔަ އޮގަސްޓް މަހު ފެށި މުބާރާތުގެ ޗެމްޕިއަންކަން މިލާން އެކަޑެމީ އިން ކަށަވަރުކުރީ މިދިޔަ ހަފްތާގަ އެވެ. ލީގު ބުރުގައި މިލާންގެ ފަހު މެޗު އިއްޔެ ކުޅުނުއިރު، އެ މެޗަށް ނުކުތްއިރު ވެސް މިލާން އޮތީ ލީގު ޗެމްޕިއަންކަން ކަށަވަރުކޮށްފަ އެވެ. މި އަހަރު މުޅިން އަލަށް ބޭއްވި ޓީ10 ކްރިކެޓް މުބާރާތް ވެސް ކާމިޔާބުކުރީ މިލާން އެވެ.
މިލާނުން ވަނީ ކުޅިވަރު އެކުވެނި އެއް ނަމްބަރު ދަނޑުގައި އިއްޔެ ކުޅުނު މެޗުގައި ވިޔަންސާ އަތުން 22 ލަނޑުން މޮޅުވެފަ އެވެ.
މިލާން ކުޅުނު ހުރިހާ މެޗަކުން ވެސް މޮޅުވިއިރު، އެ ޓީމުން އެންމެ ފަހުން ކުޅެން ޖެހުނީ ޓީމުގެ މުހިންމު ކުޅުންތެރިން ނުލަ އެވެ. މިލާންގެ ކެޕްޓަން ޔޫސުފް އަޒްޔާން އާއި ބޯލަރު، ހަސަން އިބްރާހިމް މި ވަގުތު އަންނަނީ އޮސްޓްރޭލިއާގެ ކްލަބަކަށް ކުޅެން ލިބުނު ފުރުސަތެއްގެ ބޭނުންހިފަމުންނެވެ.
ލީގު ބުރުގެ ފަހު މެޗުގައި މިލާނުން އިއްޔެ ވިޔަންސާއާ ދެކޮޅަށް ނުކުތްއިރު، ޓޮސް ދިމާވުމުން ވިޔަންސާ އިން ނިންމީ ފީލްޑް ކުރާށެވެ.
މިލާނުން ކުޅެން އަރައި، 20 އޯވަރުގެ ތެރޭގައި ހަތް ކުޅުންތެރިން ނުބައިވެގެން 147 ލަނޑު ހެދި އެވެ. އެންމެ ރަނގަޅު ކުޅުމެއް ދެއްކީ، 34 ބޯޅައިން 36 ލަނޑު ހެދި އަލީ ޝުނާން އެވެ. މިލާންގެ އާދަމް ނާސިފް 16 ލަނޑު ހެދިއިރު، އިބްރާހިމް ނަޝާތު ނިންމާލީ 27 ލަނޑާ އެކު އެވެ. ކުޅެން ނުކުމެ، އިސްމާއިލް ނަޒްވާން ވަނީ ނުބައިނުވެ 18 ލަނޑު ހަދައިފަ އެވެ.
ޖަވާބުގައި ކުޅެން އަރައި، 17 އޯވަރުން ވިޔަންސާގެ 10 ކުޅުންތެރިން ނުބައިވިއިރު، އެ ޓީމަށް ހެދުނީ އެންމެ 125 ލަނޑެވެ. ވިޔަންސާ އަށް އެންމެ ރަނގަޅު ކުޅުމެއް ދެއްކީ 45 ބޯޅައިން 54 ލަނޑު ހެދި ކަމްރުލް ހަަސަން އެެވެ.
ޓީ20 ޕްރިމިއާ ކްރިކެޓް ލީގުގެ ގަދަ ހަތަރު ޓީމް ކޮލިފައިވާނީ ކުރިއަށް އޮތް ޓީ20 ޕްރެޒިޑެންޓްސް ކަޕަށެވެ. އެ ހަތަރު ޓީމަކީ މިލާން އާއި މާލެ ވެޓެރަންސް، މާލެ ސްޕޯޓްސް ކްލަބް އަދި ސީބީއެލް ސްޕޯޓްސް އެވެ.
