މިހާރު ކުރިއަށްދާ ޓީ20 ޕްރިމިއާ ކްރިކެޓް ލީގުގެ ޗެމްޕިއަންކަން މިލާން ކްރިކެޓު އެކަޑެމީ އިން ހޯދައިފި އެވެ.
ދިހަ ޓީމާ އެކު މިދިޔަ އޮގަސްޓް މަހު ފެށި މުބާރާތުގެ ޗެމްޕިއަންކަން މިލާން އެކަޑެމީ އިން ކަށަވަރުކުރީ ލީގު ބުރުގައި ބާކީ އެއް މެޗު އޮއްވަ އެވެ. އެ ޓީމުން މިހާތަނަށް ކުޅުނު އަށް މެޗުން ވެސް މޮޅުވެފައިވާއިރު، ދެ ވަނައިގައި އޮތް މާލޭ ވެޓްރަންސް ކުޅުނު ނުވަ މެޗުގެ ތެރެއިން މޮޅުވީ ހަތް މެޗުންނެވެ. ދެ މެޗުން ވަނީ ބަލިވެފަ އެވެ. މިލާން އެކަޑެމީ އިން އަށް މެޗުން އަށް މޮޅު ހަމަކުރީ މިދިޔަ ހަފްތާ ބަންދުގައި ކުޅުނު ދެ މެޗުވެސް ކާމިޔާބުކޮށްގެންނެވެ.
މިދިޔަ ހުކުރު ދުވަހު މިލާނުން ނުކުތީ އޮއްފު އެފްސީއާ ދެކޮޅަށެވެ. މި މެޗު މިލާން އެކަޑެމީ އިން ކާމިޔާބުކުރީ އަށް ވިކެޓުންނެވެ.
މި މެޗުގައި ފުރަތަމަ ކުޅެން އަރައި އޮއްފު އަށް 20 އޯވަރުގެ ތެރޭގައި ހުރިހާ ކުޅުންތެރިން ނުބައިވެގެން ހެދުނީ 135 ލަނޑެވެ. އެޓީމުން އެންމެ ރަނގަޅަށް ކުޅުނީ އަސަދު މުނީރު އެވެ. އޭނާ ވަނީ 31 ބޯޅައިން 41 ލަނޑު ހަދާފަ އެވެ.
މި އިނިންގްސްގައި މިލާންގެ އުކުންތެރިން ރަނގަޅު ކުޅުމެއް ދެއްކި އިރު، އިބްރާހިމް ނަޝާތު ހަތަރު އޯވަރުގައި 18 ލަނޑަށް ތިން ވިކެޓު ނެގި އެވެ. އަލީ އިމާން ހަތަރު އޯވަރުގައި 30 ލަނޑަށް ދެ ވިކެޓު ނެގިއިރު، އަލީ ޝުނާން ވަނީ ހަތަރު އޯވަރުގައި 25 ލަނޑަށް ދެ ވިކެޓު ނަގާފަ އެވެ.
މިލާނުން ކުޅެން އަރާ 17.2 އޯވަރުގައި ދެ ކުޅުންތެރިން ނުބައިވެގެން 136 ލަނޑު ހަދާ މެޗުން މޮޅުވި އެވެ. މި އިނިންގްސްގައި މުހައްމަދު އައްޒާމް 38 ބޯޅައިން 54 ލަނޑު ހަދައި ހާފް ސެންޗަރީ އެއް ހެދި އިރު، އިބްރާހިމް ނަޝާދު ވަނީ 47 ބޯޅައިން 47 ލަނޑު ހަދާފަ އެވެ.
މިދިޔަ ހަފްތާ ބަންދުގައި މިލާން ކުޅެން އޮތް ދެ ވަނަ މެޗުން އެ ޓީމް މޮޅުވީ ދެކޮޅަށް ކުޅެން އޮތް ކޮމެޓްސް ކްރިކެޓް ކުލަބުން މެޗު ދޫކޮށްލުމުންނެވެ.
ޓީ20 ޕްރިމިއާ ކްރިކެޓް ލީގުގެ ގަދަ ހަތަރު ޓީމް ކޮލިފައިވާނީ ޓީ20 ޕްރެޒިޑެންޓްސް ކަޕަށެވެ. މިހާތަނަށް ލީގު ބުރުގައި ކުޅުނު މެޗުތަކަށް ބަލާއިރު މިލާން އެކަޑަމީ، މާލޭ ވެޓްރަންސް އަދި މާލޭ ސްޕޯޓްސް ކުލަބުން ވަނީ ޕްރެޒިޑެންސް ކަޕަށް ކޮލިފައިވެފަ އެވެ.
ޕްރެޒިޑެންސް ކަޕްގެ ފަހު ޖާގަ އަށް ވާދަކުރަނީ ވިޔަންސާ އަދި ސީބީއެލް އެވެ. ވިޔަންސާ އަށް ބާކީ އޮތީ މިލާން އެކަޑެމީއާ ދެކޮޅަށް ކުޅޭ މެޗެވެ. ސީބީއެލް އަށް އޮތީ ކޮމެޓްސްއާ ދެކޮޅަށް ކުޅޭ މެޗެވެ.
