މިހާރު ކުރިއަށްދާ ޓީ20 ޕްރިމިއާ ކްރިކެޓް ލީގުގައި ސީބީއެލް ސްޕޯޓްސް އަތުން މޮޅުވެ، މާލޭ ވެޓްރަންސް ތާވަލްގެ އެއްވަނައަށް ޖެހިލައިފި އެވެ.
ޖުމްލަ 10 ޓީމް ވާދަކުރާ ޓީ20 ޕްރިމިއާ ކްރިކެޓު ލީގުގެ އެއް ވަނައިގައި މާލޭ ވެޓެރަންސް އޮތީ މިހާތަނަށް ކުޅުނު އަށް މެޗުގެ ތެރެއިން ހަ މެޗު ކާމިޔާބުކޮށްގެން 18 ޕޮއިންޓާ އެކުގަ އެވެ. އެ ޓީމަށް ވުރެ ދެ މެޗު މަދުން ކުޅެފައި އޮތް މިލާން ކްރިކެޓު އެކަޑެމީ އަށް ވެސް 18 ޕޮއިންޓް ލިބިފައި އޮތްއިރު، މިހާތަނަށް ކުޅުނު އެއްވެސް މެޗަކުން ބަލިވެފައި ނުވާ މިލާނަށް ލީގުގެ އެއް ވަނަ ހޯދުމަށް ފަހި ފުރުސަތެއް އެބައޮތެވެ. ތިންވަނައިގައި އޮތީ 16 ޕޮއިންޓާ އެކު ވިޔަންސާ އެވެ.
އިއްޔެ ސީބީއެލް އަތުން މާލޭ ވެޓެރަންސް މޮޅުވީ 21 ލަނޑުންނެވެ. ޓޮސް ދިމާވުމުން ވެޓެރަންސް ޓީމުން ކުޅެން އަރައި 20 އޯވަރުގެ ތެރޭގައި 164 ލަނޑު ހެދި އެވެ. އެ ޓީމުން އެންމެ ރަނގަޅަށް ކުޅުނީ 47 ބޯޅައިން 72 ލަނޑު ހެދި ރުވާން ތަރަކަ އާއި 29 ބޯޅައިން 48 ލަނޑު ހެދި ރޮޑްރިގޯ ކޯޝަލް އެވެ.
ސީބީއެލް ޓީމުގެ އިބްރާހިމް ރިޒާން މި އިނިންގްސްގައި ދެ ވިކެޓު ނެގި އެވެ.
ސީބީއެލް ކުޅެން އަރައި 20 އޯވަރުގެ ތެރޭގައި ހެދުނީ 143 ލަނޑެވެ. މި އިނިންގްސްގައި ސީބީއެލް ޓީމުގެ މުއާވިޔަތު އަބްދުލް ގަނީ ވަނީ 34 ބޯޅައިން 53 ލަނޑު ހަދައިފަ އެވެ.
މި އިނިންގްސްގައި މައިގަނޑު ތަފާތަކަށްވީ މާލޭ ވެޓެރަންސްގެ އުުކުންތެރިންގެ މޮޅު ކުޅުމެވެ. އެ ޓީމުގެ ނަވީން ޕެރޭރާ 4 ވިކެޓު ނެގިއިރު، ހަރްޝަ ވަނީ ދެ ވިކެޓު ނަގާފަ އެވެ.
މުބާރާތުގައި އިއްޔެ ކުޅުނު އަނެއް މެޗުގައި ވާދަކުރީ ތާވަލްގެ ފުލުގައި އޮތް ވެސްޓް ސްޕޯޓްސް ކުލަބާއި އައިޒީ އެވެ. ވިއްސާރައިގެ ސަބަބުން މި މެޗު ކުޅުނީ 20 އޯވަރުގެ ބަދަލުގައި 12 އޯވަރަށް މަދުކޮށްގެންނެވެ.
ޓޮސް ދިމާވުމުން ވެސްޓް ސްޕޯޓްސް އިން ފުރަތަމަ ނުކުތީ ބެޓްކުރާށެވެ. އެ ޓީމު ކުޅެން އަރައި 12 އޯވަރުގެ ތެރޭގައި ހެދުނީ 79 ލަނޑެވެ. އެ ޓީމުން އެންމެ ރަނގަޅަށް ކުޅުނީ 33 ލަނޑު ހެދި ޒަހްދާން ޝާމިލް އާއި 25 ލަނޑު ހެދި އެލަން ރޫބް އެވެ.
ޖަވާބުގައި އައިޒީ އިން ކުޅެން އަރައި ބާކީ ހަތަރު ބޯޅަ އުކަން އޮއްވައި 80 ލަނޑު ހަދައި މެޗު ކާމިޔާބުކުރި އެވެ. އެ ޓީމުން އެންމެ ރަނގަޅަށް ކުޅުނީ 26 ބޯޅައިން 24 ލަނޑު ހެދި ސުދީޝް އެވެ. ވެސްޓް ސްޕޯޓްސްގެ ކަޒުން ޕިޔުމަލާ މި އިނިންގްސްގައި އުކި ތިން އޯވަރުގައި ތިން ވިކެޓު ނެގި އެވެ.
ކޮންމެ ހަފްތާ ބަންދެއްގައި ކުޅޭ ޓީ20 ޕްރިމިއާ ކްރިކެޓް ލީގުގެ ކުޅުން ފަށާފައިވަނީ މިދިޔަ އޮގަސްޓު މަހުގެ ތެރޭގަ އެވެ. މި ލީގުގެ އެއް ވަނަ އަށް ޗެމްޕިއަންކަން ލިބޭ އިރު ގަދަ ހަތަރު ޓީމު ކޮލިފައިވާނީ ޓީ20 ޕްރެޒިޑެންޓްސް ކަޕަށެވެ. ޕްރެޒިޑެންސް ކަޕްގެ ކުޅުން ކުރިއަށްދާނީ މި އަހަރުގެ ފަހުކޮޅު ގަ އެވެ.
