ބޭންކް އޮފް މޯލްޑިވްސް އަށް މި އަހަރުގެ ތިންވަނަ ކުއާޓާގައި ސާފު ފައިދާގެ ގޮތުގައި 367 މިލިއަން ރުފިޔާ ލިބިއްޖެ އެވެ.
ބީއެމްއެލް އިން އާންމުކުރި މާލީ ނަތީޖާއިން ދައްކާގޮތުގައި ޓެކްސް އަށް ކެނޑުމަށްފަހު ފައިދާގެ ގޮތުގައި 367 މިލިއަން ރުފިޔާ ލިބިފައިވާއިރު ހިންގުމުގެ ފައިދާގެ ގޮތުގައި ވަނީ 694 މިލިއަން ރުފިޔާ ލިބިފަ އެވެ. މިއީ މި އަހަރުގެ ދެވަނަ ކުއާޓާގައި ލިބުނު ފައިދާއާ އަޅާބަލާއިރު 17 ޕަސެންޓް ކުރިއެރުމެކެވެ.
ބޭންކުން އިއްޔެ ނެރުނު ނޫސް ބަޔާނެއްގައި ބުނީ ތިން ވަނަ ކުއާޓާގައި ލިބުނު ފައިދާ ހާސިލްވީ ވިޔަފާރީގެ މައިގަނޑު ހުރިހާ ދާއިރާއަކުން ލިބުނު ކުރިއެރުމާއެކު ބޭންކުގެ ރަނގަޅު ލޯނު ޕޯޓްފޯލިއޯ ދެމެހެއްޓިގެންދިޔުމުގެ ސަބަބުން ކަމަށެވެ.
ތިން ވަނަ ކުއާޓާގައި ލިބުނު ނަތީޖާއާ ބެހޭގޮތުން ބީއެމްއެލްގެ ސީއީއޯ ކާލް ސްޓުމްކަ ވިދާޅުވީ ކުރިއަށް އޮތް ތަނުގައި ވެސް ކަސްޓަމަރުންނަށް ދޭ ހިދުމަތުގެ ފެންވަރު ރަނގަޅުކުރުމާއި ދިވެހި ރައްޔިތުންނަށް އެހީވުމާއި ދިވެހިން ހިޔާރުކުރާ ބޭންކުގެ ގޮތުގައި ދެމިއޮތުމަށް ބީއެމްއެލް އިން ބުރަކޮށް މަސައްކަތް ކުރަމުންދާނެ ކަމަށެވެ.
"އަޅުގަނޑުމެން އުންމީދު ކުރަނީ މިއަހަރަކީވެސް ކާމިޔާބު އަހަރަކަށްވުން. އަދި މި ފުރުސަތުގައި ކަސްޓަމަރުން ދެއްވާ އެއްބާރުލުމާއި ބޯޑު ޑައިރެކްޓަރުން ދެއްވާ އިރުޝާދާއި އެހާމެ ބުރަކޮށް މަސައްކަތް ކުރަމުންދާ އަޅުގަނޑުމެންގެ ޓީމަށް ޝުކުރު އަދާކުރަން،" މި މަހުގެ 11 ވަނަ ދުވަހު ބީއެމްއެލްގެ ސީއީއޯ ކަމާއި ހަވާލުވެލެއްވި ސްޓުމްކަ ވިދާޅުވި އެވެ.
