ޖީއެސްޓީއާއި ޓީޖީއެެސްޓީ ބޮޑުކުރުމަށް ޓެކްސް ގާނޫނަށް ބަދަލުގެންނަން ސަރުކާރުން ހުށަހެޅި ބިލު ރައްޔިތުންގެ މަޖިލީހުގެ މުޅިމަޖިލީހުގެ ކޮމިޓީން މިއަދު ފާސްކުރި އިރު، ސަރުކާރުހިންގާ ކޯލިޝަނުގެ މައި ޕާޓީ، އެމްޑީޕީގެ 12 މެމްބަރަކު ވޯޓުނުދެއްވައި ދޫކުރައްވައިފި އެވެ.
ޖީއެސްޓީ ހަ ޕަސެންޓުން އަށް ޕަސެންޓަށް އަދި ޓީޖީއެސްޓީ 12 ޕަސެންޓުން 16 ޕަސެންޓަށް ބޮޑުކުރަން ސަރުކާރުގެ ފަރާތުން އިހަވަންދޫ ދާއިރާގެ މެމްބަރު މުހައްމަދު ޝިފާއު ހުށަހެޅުއްވި ބިލު ރައްޔިތުންގެ މަޖިލީހުގެ މުޅި މަޖިލީހުން މިއަދު ފާސްކުރަން ނުފެންނަ ކަމަށް ވޯޓު ދެއްވީ ޖުމްލަ 19 މެމްބަރެކެވެ. އޭގެ ތެރޭގައި އެމްޑީޕީގެ 11 މެމްބަރަކާއި ސަރުކާރު ހިންގާ ކޯލިޝަނުގައި ހިމެނޭ ޖުމްހޫރީ ޕާޓީގެ މެބްރަކު ހިމެނެ އެވެ.
ކޮމިޓީން ބިލު ފާސްކުރަން ނެގި ވޯޓުގައި ވަކި ކޮޅަކަށް ވޯޓު ދެއްވައި އިންނެވީ މާފަންނު މެދު ދާއިރާގެ މެމްބަރު އިބްރާހީމް ރަޝީދެވެ. ބިލު ކޮމިޓީން ފާސްކުރަން ވޯޓު ނުދެއްވި އެމްޑީޕީ މެމްބަރުންގެ އަދަދު 12 އަށް އެރީ އެހެންވެ އެވެ.
ވޯޓު ނުދެއްވި މެމްބަރުން
- ހެންވޭރު އުތުރު ދާއިރާގެ މެމްބަރު އިބުރާހީމް މުއިއްޒު
- މެދު ހެންވޭރު ދާއިރާގެ މެމްބަރު އަލީ އާޒިމް
- ހެންވޭރު ހުޅަނގު ދާއިރާގެ މެމްބަރު ހަސަން ލަތީފު
- ގަލޮޅު އުތުރު ދާއިރާގެ މެމްބަރު އަދި މަޖިލީހުގެ ނައިބުރައީސް އީވާ އަބްދުﷲ
- މައްޗަންގޮޅި އުތުރު ދާއިރާގެ މެމްބަރު މުހައްމަދު ރަޝީދު
- މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ
- އުނގޫފާރު ދާއިރާގެ މެމްބަރު މުހައްމަދު ވަހީދު
- ވިލުފުށިކ ދާއިރާގެ މެމްބަރު ހަސަން އަފީފު
- މަޑަވެލި ދާއިރާގެ މެމްބަރު ހުސައިން ފިރުޝާން
- ހުޅުދޫ ދާއިރާގެ މެމްބަރު އިލްޔާސް ލަބީބު
- ހިތަދޫ މެދު ދާއިރާގެ މެމްބަރު އަހުމަދު ރަޝީދު
ސަރުކާރު ހިންގާ ކޯލިޝަނުގެ މެމްބަރުންގެ ތެރެއިން ބިލު އޮތް ގޮތަށް ކޮމިޓީން ފާސްކުރުމާ ދެކޮޅަށް ވޯޓު ދެއްވި އަނެއް މެމްްބަރަކީ ކެންދޫ ދާއިރާގެ ޖޭޕީ މެމްބަރު އަލީ ހުސައިނެވެ.
ޓެކްސް ބޮޑުކުރާ ބިލު އޮތް ގޮތަށް ފާސްކުރަން އެމްޑީޕީގެ ޕާލަމެންޓްރީ ގްރޫޕުން ވަނީ ތްރީލައިން ވިޕެއް ނެރެފަ އެވެ.
