ޖީއެސްޓީ އާއި ޓީޖީއެސްޓީ ބޮޑުކުރަން ސަރުކާރުން ރައްޔިތުންގެ މަޖިލީހަށް ހުށަހެޅި ބިލު އޮތް ގޮތަށް ތަޅުމަށް ފޮނުވަން ރައްޔިތުންގެ މަޖިލީހުގެ މުޅި މަޖިލީހުގެ ކޮމިޓީން މިއަދު ފާސްކޮށްފި އެވެ.
ބިލެއް ކޮމިޓީން ފާސްކުރުމަކީ ރައްޔިތުންގެ މަޖިލީހުން ގާނޫނެއް ހެދުމުގަައި އޮންނަ އިޖުރާއަތެކެވެ. އަވަހަށް ނިންމަން ޖެހޭ ބޮޑެތި ކަންތައްތަކުގައި އެ އިޖުރާއަތް ފުރިހަމަކުރަނީ މަޖިލީހުގެ ހުރިހާ މެމްބަރުން ބައިވެރިވާ "މުޅި މަޖިލީހުގެ ކޮމިޓީ" އިންނެވެ. އާއްމު އުސޫލަކީ އެ ބިލަކާ ގުޅޭ ކޮމިޓީއަކުން ބިލު ދިރާސާކުރުމެވެ.
ޖީއެސްޓީއަށް ޕަސެންޓަށް އަދި ޓީޖީއެސްޓީ 16 ޕަސެންޓަށް ބޮޑުކުރަން ސަރުކާރުގެ ފަރާތުން އިހަވަންދޫ ދާއިރާގެ އެމްޑީޕީ މެމްބަރު މުހައްމަދު ޝިފާއު ހުށަހެޅުއްވި ބިލު އޮތް ގޮތަށް ފާސްކުރަން މުޅިމަޖިލީހުގެ ކޮމިޓީން މިއަދު ފާސްކުރީ އެކަމަށް ނެގި ވޯޓުގައި ބައިވެރިވެވަޑައިގެންނެވި 69 މެމްބަރުންގެ ތެރެއިން 50 މެމްބަރަކު ވޯޓުދެއްވައިގެންނެވެ. އެ ބިލު އޮތްގޮތަށް ކޮމިޓީން ފާސްކުރަން ނުފެންނަ ކަމަށް 19 މެމްބަރަކު ވޯޓު ދެއްވި އިރު ވަކިކޮޅަކަށް ވޯޓު ނުދެއްވާ އެއް މެމްބަރަކު އިންނެވި އެވެ.
ޓެކްސް ބޮޑުކުރާ ބިލު ކޮމިޓީން މިއަދު ފާސްކުރި އިރު މެދުހެންވޭރު ދާއިރާގެ އެމްޑީޕީ މެމްބަރު އަލީ އާޒިމް ކޮމިޓީގެ މިއަދުގެ ބައްދަލުވުމުގައި ބައެއް އިސްލާހުތައް ހުށަހެޅުއްވި ނަމަވެސް އެއްވެސް އިސްލާހެއް ފާހެއް ނުވެ އެވެ. އޭނާ ހުށަހެޅުއްވި އެއް އިސްލާހަކީ ޓީޖީއެސްޓީ ބޮޑުކުރާ އިރު ގެސްޓްހައުސްތައް އެކަމުން އިސްތިސްނާކުރަން ހުށަހެޅުއްވި އިސްލާހެކެވެ. އަނެއް އިސްލާހަކީ ޓެކްސް ބޮޑުކުރުން އަންނަ އޭޕްރިލްއާ ހަމައަށް ފަސްކުރަން ހުށަހެޅުއްވި އިސްލާހެކެވެ.
ޓެކްސް ބޮޑުކުރާ ބިލު މުޅި މަޖިލީހުން ފާސްކުރުމަށް ފަހު، ކޮމިޓީ ރިޕޯޓް ދިރާސާކުރަން މެމްބަރުންނަށް ވަގުތު ދޭނެ އެވެ. އެއަށް ފަހު އެ ބިލާ މެދު މަޖިލީހުގެ ތަޅުމުން ގޮތެއް ނިންމާނީ ރިޕޯޓަށް ބަހުސްކުރުމަށް ފަހުގަ އެވެ.
