ރާއްޖޭގެ ދެކުނުން އޮންނަ ފޯޅަވަހި (ޑިއަގޯ ގާސިއާ) ހިމެނޭ ގޮތުން ޗާގޯސް އައިލެންޑްސްގެ މިލްކުވެރިކަމާ ބެގޭ ގޮތުން ދިވެހި ސަރުކާރުގެ ސްޓޭންޑު ބަދަލުކުރީ، ސަރުކާރުގެ ކޯލިޝަނުގައި ހިމެނޭ މޯލްޑިވްސް ރިފޯމް މޫވްމަންޓާ މަޝްވަރާނުކޮށް ކަމަށް ބުނެ އެ ޕާޓީން ކަންބޮޑުވުން ފާޅުކޮށްފި އެވެ.
އެމްއާރުއެމުން ބުނީ، ސަރުކާރުން ކުއްލިއަކަށް ސިޔާސަތު ބަދަލުކުރަން ނިންމުމުގެ ކުރިން ކޯލިޝަނުގައި ހިމެނޭ ޕާޓީއެއްގެ ހައިސިއްޔަތުން އެމްއާރުއެމާ އެއްވެސް މައުލޫމާތެއް ސަރުކާރުން ހިއްސާ ނުކުރާ ކަމަށެވެ.
އެ ޕާޓީން މިއަދު ނެރުނު ބަޔާނެއްގައި ބުނީ ރާއްޖޭގެ ކަނޑުގެ ސަރަހައްދުތަކާ ބެހޭ ގާނޫނުގައި ބުނާގޮތުން ބޭސްލައިނުން ފެށިގެން 200 މޭލުގެ ސަރަހައްދެއް ހާއްސަ އިގްތިސޯދީ ސަރަހައްދުގެ ގޮތުގައި ލިބިދީފައިވާ ކަމަށެވެ. އަދި މީގެ ކުރިން ދިވެހި ދައުލަތުން އެ ސަރަހައްދަށް އުނިކަމެއް އަންނަ ގޮތަކަށް އެއްބަސްވެ ސޮއިކޮށްފައި ނުވާ ކަމަށެވެ.
މީގެ ތިން އަހަރު ކުރިން 2019 ވަނަ އަހަރު ސަރުކާރުން ވޯޓު ދިނީ މޮރިޝަސްގެ ސިޔާދަތު ފޯޅަވަހީގެ މައްޗަށް އޮތުމާ ދެކޮޅަށްކަން ފާހަގަކޮށް އެމްއާރުއެމުން ބުނީ އެ ސިޔާސަތު ބަދަލުވި ސަބަބު ސަރުކާރުން ހާމަކޮށްފައި ނުވާ ކަމަށެވެ. އަދި އޭގެ އަޑީގައި ކަންތައްތަކެއްވާ ނަމަ އެކަން ސާފުކޮށްދިނުމަށް އެމްއާރުއެމުން އެދުނެވެ.
"... އެ ސިޔާސަތު ބަދަލުވި ސަބަބު ހާމަވެފައި ނެތުމުން އޭގެ އަޑީގައި ކަންތައްތަކެއް ވާނެކަން ރައްޔިތުން ދެކޭތީ، ކަންހިނގައި ދިޔަގޮތް ހާމަކުރުން މުހިންމު ކަމަށް އެމްއާރުއެމުން ދެކެން،" އެ ބަޔާނުގައި ވެއެވެ.
އެމްއާރުއެމުން ވަނީ އެ މައްސަލާގައި ރާއްޖެއިން ސްޓޭންޑެއް ނެގުމުގެ ކުރިން ރައްޔިތުންގެ މަޖިލީހުގެ ލަފާ ހޯދާފައި ނުވާތީ ކަންބޮޑުވުން ފާޅުކުރުމާއެކު ކަމާބެހޭ ފަންނީ މާހިރުން ދިވެހިންގެ ތެރޭގައި ތިބިއިރު، ބައިނަލްއަގްވާމީ ފަރާތްތަކާއެކު ވަކާލާތު ކުރުމުގައި، އެ މާހިރުންގެ ލަފަ އާއި މަޝްވަރާ ހޯދާފައި ނުވަތީ އެކަމާ ހިތާމަކުރާކަމަށް ބުނެފަ އެވެ.
ހަމައެއާއެކު އެ ޕާޓީން ބުނީ ރާއްޖޭގެ ސިޔާދަތީ ހައްގަކަށް އުނިކަމެއް ލިބިދާނެ އެއްވެސް ނިންމުމަކަށް ތާއިދު ނުކުރާ ކަމަށާއި، އެފަދަ ނިންމުމެއް ސަރުކާރުން ނިންމާފައިވާ ނަމަ އެ ނިންމުން ބަދަލު ކުރުމަށް ގޮވާލާފަ އެވެ. އަދި މިކަމުގެ ސައްހަ މައުލޫމާތު ވީއެންމެ އަވަހަކަށް ރައްޔިތުންނާ ހިއްސާ ކޮށްދެއްވުމަށް ވެސް އެމްއާރްއެމުން ގޮވާލި އެވެ.
މައްސަލައިގެ ފަސްފަހަތް
މޮރިޝަސް އިން ޗާގޮސް ގެ މައްޗަށް ސިޔާދަތީ ބާރު ހޯދުމަށް އިންޓަނޭޝަނަލް ކޯޓް އޮފް ޖަސްޓިސްގައި ކުރި ދައުވާ އެގައުމާއި އެއްކޮޅަށް ނިމި 2019 ވަނަ އަހަރު އެ ކޯޓުން ވަނީ ޗާގޮސް ވީ އެންމެ އަވަހަކަށް މޮރިޝަސް އާއި ހަވާލުކުރުމަށް އިނގިރޭސިވިލާތަށް އަންގާފަ އެވެ. ނަމަވެސް މިހާތަނަށް އެ ނިންމުމަށް އިނގިރޭސިވިލާތުން އިޖާބަދީފައެއް ނުވެ އެވެ.
މީގެ ކުރިން 2019 ވަނަ އަހަރުގެ މެއި 22، ގައި ގައި އދ. އިން އެ ނިންމުމަށް ތާއީދުކޮށް ހަ މަސް ދުވަހުގެ ތެރޭގައި ޗާގޮސް މޮރިޝަސް އާއި ހަވާލުކުރުމަށް 116 ގައުމުގެ ވޯޓާއި އެކު ފާސްކުރި ގަރާރުގައި ރާއްޖެއިން ވޯޓުލީ ދެކޮޅަށެވެ.
މި މައްސަލައިގައި ރާއްޖޭގެ ސްޓޭންޑް ބަދަލުވިކަން އިނގުނީ މިހާރު ކަނޑުގެ ސަރަހައްދުގެ މައްސަލައިގައި ރާއްޖެއިން މޮރިޝަސްއާ ދެކޮޅަށް ވަކާލާތުކުރައްވަމުން އެ ގަރާރާ އެއްކޮޅަށް ވޯޓުދޭން ނިންމާފައިވާ ކަމަށް ބަންޑާރަ ނައިބު ވިދާޅުވުމުންނެވެ.
ނަމަވެސް އެ މައްސަލައިގެ ސްޓޭންޑަށް އައި ބަދަލުގެ ސަބަބުން ކަނޑުގެ ސަރަހައްދުގެ މައްސަލައިގައި ޖަވާބުދާރީވަމުން އައިސްފައިވާ އެއްވެސް ކަމަކަށް ނުވަތަ ސްޓޭންޑަށް އެއްވެސް ބަދަލެއް ނުގެންނާނެ ކަމަށް ސަރުކާރުން ވަނީ ތަކުރާރުކޮށް ވިދާޅުވެފަ އެވެ.
އޭގެ އިތުރުން، ޗާގޯސްގެ ސިޔާދަތީ ބާރު މޮރިޝަސް އަށް ލިބުމަށް ރާއްޖެއިން ތާއިދުކޮށް އެ ގައުމާއި އެއްކޮޅަށް ވޯޓުލާން ނިންމީ، ރާއްޖެއަކީ އިސްތިއުމާރުކުރުމާ ދެކޮޅު ގައުމަކަށްވެފައި ގައުމުތަކުގެ ސިޔާދަތީ ބާރު އޮތުމަށް ތާއިދުކުރާ ގައުމަކަށް ވާތީ ކަމަށްވެސް ސަރުކާރުން ވަނީ ބުނެފަ އެވެ.
