ރާއްޖޭގެ ބޯޑާ ސެކިއުރިޓީ ވަރުގަދަކުރުމާއި ބޯޑާ ބެލެހެއްޓުމަށް ދިމާވާ ދަތިކާ މެދު މަޝްވަރާ ކުރުމަށް މޯލްޑިވްސް އިމިގްރޭޝަން އިން ބާއްވާ 'މޯލްޑިވްސް ބޯޑާ ސެކިއުރިޓީ ސިމްޕޯޒިއަމް' ފަށައިފި އެވެ.
މިއަދު ފެށި މި ސިމްޕޯޒިއަމްގައި އިމިގްރޭޝަންގެ އިތުރުން އެމްއެންޑީއެފް، ކަސްޓަމްސް، އޭވިއޭޝަން ސެކިއުރިޓީ ކޮމާންޑް އަދި ފުލުހުންގެ އިސްވެރިން ބައިވެރިވެވަޑައިގަންނަވާނެއެވެ. މީގެއިތުރުން އިންޓަނޭޝަނަލް އޯގަނައިޒޭޝަން ފޯ މައިގްރޭޝަން (އައިއޯއެމް) އާއި އދ. ގެ ޑްރަގް އެންޑް ކްރައިމް އޮފީސް (ޔޫއެންއޯޑީސީ)ގެ ފަރާތުންވެސް މި ސިމްޕޯޒިއަމްގައި ބައިވެރިވުމަށް ވަނީ ހަމަޖެހިފަ އެވެ.
ދެ ދުވަހުގެ މުއްދަތަކަށް ކުރިއަށްދާ މި ސިމްޕޯޒިއަމް ފެށުމުގެ ގޮތުން މިއަދު ބޭއްވި ރަސްމިއްޔާތުގައި ވާހަކަދައްކަވަމުން އިމިގްރޭޝަން ކޮންޓްރޯލަރު މުހައްމަދު އަހުމަދު ހުސައިން (ހަނަފީ) ވިދާޅުވީ މި ސިމްޕޯޒިއަމް އަކީ ބޯޑާ ސެކިއުރިޓީގައި ދިމާވާ މައްސަލަތަކަށް ކަމާގުޅުންހުރި ހުރިހާ އިދާރާތަކެއްގެ އިސްވެރިން އެއް މޭޒެއްގެ ދަށުން ދިމާވެ ހައްލު ހޯދުމަށް ބޭއްވޭ ވަރަށް މުހިންމު ސިމްޕޯޒިއަމްއެއް ކަމަށެވެ.
ހަނަފީ އިތުރަށް ވިދާޅުވެފައިވަނީ މި ސަރުކާރުގެ އަމާޒަކީ ބޯޑާ ސެކިއުރިޓީ ސްޓްރެޓެޖީއެއް އެކުލަވާލާ ކުރިއަށް އޮތްތަނުގައި ރާއްޖޭގެ ބޯޑާ ސެކިއުރިޓީ އަށް ނުރައްކަލެއް ކުރިމަތިނުވާނެ ގޮތަށް ކަންކަން ކުރުމަށް ހުރިހާ އިދާރާތަކެއް އެކުގައި މަސައްކަތް ކުރުން ކަމަށެވެ.
