ނިމިދިޔަ ސެޕްޓެމްބަރު މަހު ޖެންޑާ މިނިސްޓްރީއަށް 219 މައްސަލައެއް ހުށަހަޅާފައި ވާއިރު އޭގެ ތެރޭގައި، އަނިޔާގެ 128 މައްސަލައެއް ހިމެނޭކަން ތަފާސްހިސާބުތަކުން ދައްކައިފި އެވެ.
މިނިސްޓްރީން މިއަދު ނެރުނު މިދިޔަ މަހުގެ ތަފާސްހިސާބުތަކަށް ބަލާއިރު، ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ 92 މައްސަލަ ރިޕޯޓުކޮށްފައިވެ އެވެ. އޭގެ އިތުރުން، ވަކި ޖިންސަކަށްވީތީ ކުރާ އަނިޔާ އާއި ގެވެށި އަނިޔާގެ 36 މައްސަލަ ވެސް ރިޕޯޓުކުރި އެވެ.
ކުޑަކުދިންނަށް ކުރާ އަނިޔާގެ ގޮތުގައި ރިޕޯޓުކޮށްފައި ވަނީ، އިހުމާލުވުމުގެ މައްސަލަ އާއި، ޖިންސީ، ޖިސްމާނީ އަދި ނަފްސާނީ ހާނިއްކައިގެ މައްސަލަތަކާއި، ގެވެށި އަނިޔާގެ އަމަލެއް ކުރާތަން ކުއްޖަކަށް ދެއްކުމާއި، އެހެން ކުދިންގެ ފަރާތުން ގަނާ ލިބުމާއި، ބްލެކްމެއިލް ކުރުމާއި، ފުރައްސާރައިގެ ޝިކާރައަކަށްވުމުގެ މައްސަލަތަކެވެ. އޭގެ ތެރެއިން އެންމެ ގިނައީ އިހުމާލުވުމުގެ މައްސަލަ އާއި އެކި ކަހަލަ ހާނިއްކައިގެ މައްސަލަ އެވެ.
ވަކި ޖިންސަކަށް ވީތީ ކުރާ އަނިޔާ އަދި ގެވެށި އަނިޔާގެ މައްސަލަތަކުގެ ތެރެއިން އެންމެ ގިނައިން ރިޕޯޓުކޮށްފައި ވަނީ ނަފްސާނީ، ޖިސްމާނީ އަދި ޖިންސީ އަނިޔާކުރުމުގެ މައްސަލަތަކެވެ. އޭގެ އިތުރަށް ހިފެހެއްޓުމުގެ މައްސަލައާއި، ގަދަކަމުން ޖިންސީ ގޯނާ ކުރުމުގެ މައްސަލަ އަދި ބިރުދެއްކުމުގެ މައްސަަލަތައް ވެސް ރިޕޯޓުކޮށްފައި ވެއެވެ.
ހަމައެއާއެކު، ކުޑަކުދިންނާ ގުޅުންހުރި އިތުރު 19 މައްސަލަ ވެސް މިދިޔަ މަހު ޖެންޑާ މިނިސްޓްރީއަށް ހުށަހެޅި އެވެ. އޭގެ ތެރޭގައި ހިމެނެނީ އަހުލާގީ މައްސަލަތަކާއި، ހައްގުތަކުން ކުދިން މަހުރޫމު ކުރުމުގެ މައްސަލަތަކެވެ.
- ސްކޫލަށް ދާން ބޭނުން ނުވުމުގެ ފަސް މައްސަލަ
- ސްކޫލަށް ނުފޮނުވުމުގެ ހަތަރު މައްސަލަ
- ގެއިން ނިކުމެގެން ދިއުމުގެ ތިން މައްސަލަ
- ސްލޫކީ ތިން މައްސަލަ
- ރުޅި އިސްކުރުން / ރުޅިގަދަވެގެން އުޅުމުގެ މައްސަލައެއް
- ރުޅިވެރި، ގަވާއިދާ ހިލާފު ނުވަތަ އިޖްތިމާއީ ގުޅުން ބަދަހި ކުރުމަށް އުޒުރުވެރިވުމުގެ މައްސަލައެއް
- އައިޑީކާޑު/ޕާސްޕޯޓު/އުފަންދުވަހުގެ ސެޓްފިކެޓް ހޯދުމާ ގުޅޭ މައްސަލައެއް
- ކުށުގެ ވެއްޓަށް ހުށަހެޅިދާނެފަދަ އަމަލުކުރުމުގެ މައްސަލައެއް
އޭގެ އިތުރަށް އަމިއްލަ ނަފްސަށް ގެއްލުން ދިނުމާއި އަމިއްލައަށް މަރުވާން އުޅުމާ ގުޅޭ 19 މައްސަލައެއް ވެސް މިދިޔަ މަހު ޖެންޑާއަށް ހުށަހެޅިއެވެ. އަދި، ނުކުޅުދުންތެރިކަން ހުންނަ މީހުންނާއި އުމުރުން ދުވަސްވީ މީހުންނަށް އަޅައިލުމާއި އެހީތެރިކަން ބޭނުންވެގެން ވެސް ޖެންޑާއަށް 18 މައްސަލަ ހުށަހަޅާފައިވާއިރު، ސިއްހީ ފަރުވާ ފޯރުކޮށްދިނުމުގެ ކުޅަދާނަކަން ނެތުމުގެ ސަބަބުން ވެސް އެއް މައްސަލަ އެ މިނިސްޓްރީއަށް ހުށަހެޅި އެވެ.
މިދިޔަ ސެޕްޓެމްބަރު މަހުގެ ނިޔަލަށް ދައުލަތުގެ ބެލުމުގެ ދަށުގައި ތިބި ކުދިންގެ ޖުމްލަ އަދަދަކީ 186 އެވެ. އެގޮތުން، މިދިޔަ މަހު ހަތަރު ކުއްޖަކު ދައުލަތުގެ ބެލުމުގެ ދަށަށް ނަގާ، ތިން ކުއްޖެއް ރީއިންޓަގްރޭޓްކޮށް، ދެ ކުއްޖަކު ވަނީ ފޯސްޓާ ކޮށްފަ އެވެ. އޭގެ އިތުރުން ދައުލަތުގެ ބެލުމުގެ ދަށުގައި ހުރި ކުއްޖަކަށް 18 އަހަރު ފުރުމާ ގުޅިގެން އެ ކުއްޖާއަށް ވަނީ ވަޒީފާ ހޯދައި ދީފަ އެވެ.
