މި އަހަރު އަމަލުކުރަން ފެށި މަދަނީ އިޖުރާއަތުގެ ގާނޫނުގެ ދަށުން ޝަރީއަތަކާ ނުލާ ފުރަތަމަ ފަހަރަށް ހުކުމެއް ކޮށްފި އެވެ.
ސިވިލް ކޯޓުން އިއްޔެ ކުރި މި ހުކުމަކީ ރާއްޖެއިން ބޭރުން ދޫނިތަކެއް ގެނައުމަށްޓަކައި އަނގަބަހުން ވެވުނު އެއްބަސްވުމެއްގެ ދަށުން ފަހުން ދައްކާ ގޮތަށް އެކި ފަހަރު މަތިން ފައިސާ ނެގުމަށްފަހު ދައުވާ ލިބޭ ފަރާތުން އެ ދޫނިތައް ގެނައުމަށްފަހު އެ ފައިސާ ދައުވާ ކުރާ ފަރާތަށް ދައްކާ ހަލާސްކޮށްފައިނުވާތީ ކުރެވުނު ދައުވާއެއްގެ ހުކުމެވެ.
އެ އެއްބަސްވުމުގެ ދަށުން ދައުވާ ލިބޭ ފަރާތުން ވަނީ ދައުވާ ކުރާ ފަރާތުގެ އަތުން ޖުމްލަ 50،000ރ. އަދި 7،000 އެމެރިކާ ޑޮލަރު ނަގާފަ އެވެ. އެ ފަރާތުން ދައުވާ ކޮށްފައިވަނީ މި ފައިސާ ހޯދުމަށް ކޯޓަށް ހުށަހަޅާ ވަކީލަށް ހޭދަކުރި 20،000ރ. އާއެކު ޖުމްލަ 70،000ރ. އަދި 7،000 އެމެރިކާ ޑޮލަރު ހޯދުމަށެވެ.
ދައުވާ ލިބޭ ފަރާތުން ދައުވާއަށް ރައްދު ދިނުމަށް ލިބުނު މުއްދަތުގައި އެކަން ކޮށްފައި ނުވާތީ ދައުވާ ކުރި ފަރާތުން ވަނީ ދައުވާ ލިބޭ ފަރާތުގެ ޣައިރު ހާޒިރުގައި މައްސަލައިގެ ހުކުމް ކޮށްދިނުމަށް އެދިފަ އެވެ.
ނިމިދިޔަ ޖޫން މަހު އަމަލުކުރަން ފެށި މަދަނީ އިޖުރާއަތުގެ ގާނޫނުގެ 100 ވަނަ މާއްދާގައި ވާގޮތުން ދައުވާގެ ލިޔެކިޔުންތަކާ ދައުވާ ލިބޭ ފަރާތުން ހަވާލުވުމަށްފަހު އެ ގާނޫނުގެ 103 ވަނަ މާއްދާގައި ބުނާ މުއްދަތުގެ ތެރޭގައި އެ ގާނޫނުގެ އެގާރަވަނަ ބާބުގައި ބުނާގޮތަށް ދައުވާއަށް އެއްބަސްވެފައިނުވާ ނަމަ ނުވަތަ އެ ގާނޫނުގެ ބާރަވަނަ ބާބުގައި ބުނާގޮތަށް ދައުވާއަށް ދިފާއެއް ހުށަހަޅާފައިނުވާނަމަ އެ މައްސަލައެއް ދައުވާ ލިބޭ ފަރާތާ ދެކޮޅަށް ނިންމައި ޣައިރު ހާޒިރުގައި ހުކުމެއް އިއްވުމަށް ދައުވާކުރާ ފަރާތަށް އެދެވޭނެ އެވެ.
ދައުވާ ލިބޭ ފަރާތަށް މަދަނީ އިޖުރާއަތުގެ ގާނޫނުން ލިބޭ 14 ދުވަހުގެ މުއްދަތު ހަމަވިއިރުވެސް ދައުވާ ލިބޭ ފަރާތުން ދައުވާއަށް އެއްބަސްނުވެ ދައުވާއަށް ދިފާއެއް ހުށަހަޅާފައެއްނުވެ އެވެ.
މައްސަލަ ބެއްލެވި ގާޒީ މަރިޔަމް ވަހީދު ކުރެއްވި ހުކުމްގައި ވިދާޅުވީ ގާނޫނުގައި ބަޔާންކޮށްފައިވާ ގޮތުގެމަތިން މައްސަލައިގެ ޝަރީއަތް ހިންގުމަކާ ނުލާ ދައުވާ ލިބޭ ފަރާތާ ދެކޮޅަށް އެފަރާތުގެ ޣައިރު ހާޒިރުގައި މައްސަލަ ނިންމަންޖެހޭކަމަށް ދެކޭ ކަމުގަ އެވެ.
އެހެންކަމުން ސިވިލް ކޯޓުން ވަނީ ދައުވާ ލިބޭ ފަރާތުން ކުރިން ބުނި 70،000ރ. އަދި 7،000 އެމެރިކާ ޑޮލަރު ދައުވާ ކުރި ފަރާތަށް އެއްމަސްދުވަހުގެ ތެރޭގައި ދެއްކުމަށް ހުކުމް ކޮށްފަ އެވެ.
