މޯލްޑިވްސް އިންލެންޑް ރިވެނިއު އޮތޯރިޓީ (މީރާ)ގައި ބޭއްވި ބައްދަލުވުމެއްގެ ޔައުމިއްޔާ ހޯދަން އެދުމުން، އެއީ މައުލޫމާތު ތެރޭގައި ހިމެނޭ ކަމެއް ނޫން ކަމަށް އިންފޮމޭޝަން ކޮމިޝަނުން އަންގާފައިވަނީ އިޖުރާއަތްތައް ފުރިހަމަ ނުކޮށް ކަމަށް ހައިކޯޓުން ހުކުމް ކޮށްފި އެވެ.
މީރާގައި 2017 ވަނަ އަހަރު ބޭއްވި ބައްދަލުވުމެއްގެ ޔައުމިއްޔާ ހޯދަން އެދިފައިވަނީ ލޯފާމެއް ކަމަށްވާ ސީޓީއެލް ސްޓެރެޓީޖް އިންނެވެ.
އެ ކުންފުންޏަށް ޖަވާބު ދެމުން މީރާއިން ވަނީ އެއީ ރަސްމީކޮށް ތައްޔާރުކޮށްފައިވާ ޔައުމިއްޔާއަކަށް ނުވާތީ ނުދެވޭނެ ކަމަށް އަންގާފަ އެވެ. އެ ނިންމުމާ ގުޅިގެން އައިކޮމުން ނިންމީ އެއީ މައުލޫމާތު ތެރޭގައި ހިމެނޭނެ ކަމެއް ނޫން ކަމަށެވެ.
އެ މައްސަލަ އައިކޮމްއިން ބެލީ މައުލޫމާތު ހޯދައި ލިބިގަތުމުގެ ގާނޫނާ ހިލާފަށް ކަމަށް ބުނެ ސީޓީއެލްއިން ވަނީ ހައިކޯޓުގައި އިސްތިއުނާފްކޮށްފަ އެވެ. އެގޮތުން އެ މައްސަލަ މީރާ ކޮޅަށް ނިންމާފައިވަނީ އެ މައުލޫމާތަކީ ދެވެން ނެތް މައުލޫމާތެއް ކަން މީރާއިން ސާބިތުކޮށްދީފައިނުވަނީސް ކަމަށް ވެސް ބުނެފައިވެ އެވެ.
ހައިކޯޓުގައި އެ މައްސަލަ ބެއްލެވީ ފަނޑިޔާރު ހުސައިން މަޒީދާއި އިސް ފަނޑިޔާރު ހާތިފް ހިލްމީ އާއި ފަނޑިޔާރު ހުސައިން ޝަހީދެވެ.
ފަނޑިޔާރު ހުސައިން މަޒީދުގެ ރައުޔުގައި ވަނީ ސީޓީއެލްގެ ފަރާތުން އެ އިސްތިއުނާފީ މައްސަލަ ދިވެހިރާއްޖޭގެ ހައިކޯޓަށް ހުށަހެޅި އިރު، މައްސަލަ ރައްދުވާ ފަރާތެއްގެ ގޮތުން އައިކޮމް ފިޔަވައި އިތުރު ފަރާތެއް ހިމަނާފައި ނުވާކަން ފާހަގަކުރައްވާފަ އެވެ.
އަދި މައްސަލަ ފުރިހަމައަށް ނިންމުމަށް މި މައްސަލައިގައި މަސްލަހަތު ހިމެނޭ މީރާއަށް ވެސް ދައުވާކުރުން ބޭނުންތެރި ކަމަށާއި އެކަމަށް ކޯޓުން އަމުރު ކުރެވިދާނެ ކަމަށް ބުނެފައިވެ އެވެ.
އައިކޮމް އިން ވަނީ މި މައްސަލަ ނިންމުމުގައި ފުރިހަމަ ކުރަން ޖެހޭ ގާނޫނީ އިޖުރާއަތްތައް ފުރިހަމަކޮށްފައިނުވާ ކަމަށް ކޯޓުގައި އިއުތިރާފްވެފަ އެވެ.
އެހެންކަމުން، މައްސަލައިގައި މީރާ ހިމެނި ނަމަވެސް މައްސަލައިގެ އާޚިރު ނަތީޖާއަކަށްވާނީ މައްސަލަ އިންފޮމޭޝަން ކޮމިޝަނަރުގެ އޮފީހަށް ތަހުވީލު ކުރެވިގެން ދިއުން ކަމަށް ފަނޑިޔާރު މަޒީދުގެ ރައުޔުގައިވެ އެވެ.
"މި މައްސަލައިގައި އޮތް އެންމެ އަދުލުވެރި ހައްލެއް ކަމަށް އަހުރެންނަށް ބުރަވެވެނީ މި މައްސަލައިގެ އިސްތިއުނާފް ފޯމުގައި އިސްތިއުނާފުރައްދުވާ ފަރާތެއްގެ ގޮތުގައި މީރާ ހިމަނާފައި ނެތަތީވެ ފޯމު ބާތިލުކުރުމުގެ ބަދަލުގައި، ގާނޫނީ އިޖުރާއަތުތަކާ އެއްގޮތަށް މައްސަލަ އަލުން ބެލުމަށް އިންފޮމޭޝަން ކޮމިޝަނަރުގެ އޮފީހަށް މި މައްސަލަ ތަހުވީލުކުރުން،" ފަނޑިޔާރު މަޒީދުގެ ރައުޔުގައިވެ އެވެ.
