މާލޭ ސިޓީ ކައުންސިލުން ދޫކުރަން ޖެހޭ ހުއްދަތައް ލިބުމުން، ބޮޑުތަކުރުފާނު މަގުން ސްޓެލްކޯއާ ދިމާލުން މަގުގެ އަޑިން ލޮނު އަރާ މައްސަލަ ހައްލުކުރުމުގެ މަސައްކަތް މިހާރު ފަށާފައިވާ ކަމަށް ސްޓެލްކޯއިން ބުނެފި އެވެ.
ބޮޑުތަކުރުފާނުމަގުގެ ތާރުގަނޑު އަޑިން ސްޓެލްކޯއަށް ލޮނުފެން ނެގުމަށް އަޅާފައިވާ ހޮޅިއެއް ފަޅައިގެން ގޮސް މަގަށް ލޮނުފެން ލީކުވަމުންދާތީ އެކަން ހައްލުކުރުމަށް ސްޓެލްކޯއަށް އަންގާފައިވާނެ ކަމަށް ބުނެ މިއަދު ހެނދުނު ސިޓީ ކައުންސިލުން ވަނީ އިއުލާނެއްކޮށްފަ އެވެ.
އެ އިއުލާނާ ގުޅިގެން ސްޓެލްކޯއިން ވަނީ އެ މަސައްކަތް ނުކުރެވި ލަސްވަނީ މާލޭ ސިޓީ ކައުންސިލުން ދޫކުރަންޖެހޭ ހުއްދަތައް ނުލިބުމުގެ ސަބަބުން ކަމަށް ބުނެފަ އެވެ.
"މި ހުއްދަތައް އަވަސް ކުރުމަށް، މިކުންފުނިން ސިޓީ ކައުންސިލްގެ ކަމާ ގުޅުންހުރި ފަރާތްތަކާ މުއާމަލާތު ކުރުމަށް މަސައްކަތް ކުރި ނަމަވެސް މި ވަގުތާ ހަމަޔަށްވެސް އެ ފަރާތްތަކުން ފޯނު ނުނަންގަވާތީ އެހުއްދަތައް ލިބޭގޮތް ވަނީ ނުވެފައި،" ސްޓެލްކޯއިން މެންދުރު ފަހު ބުނެފައިވެ އެވެ.
މި މައްސަލައާ ގުޅިގެން ސްޓެލްކޯގެ މީޑިއާ އޮފިޝަލާ "އަދަދު" އިން މިރޭ ސުވާލުކުރުމުން ވިދާޅުވީ ސިޓީ ކައުންސިލުން ހުއްދަ ދިނީ ސްޓެލްކޯއިން އެކަމުގެ ކަންބޮޑުވުން ފާޅުކޮށް ޓްވީޓު ކުރި ފަހުން ކަމަށެވެ.
އަދި އެ ވަގުތާ ހަމައަށް ވެސް ހުއްދަ ހޯދުމުގެ ކަންކަން ކުރިއަށް ގެންދިޔަ ކަމަށާއި މިހާރު މަރާމާތުގެ މަސައްކަތް ފަށާފައިވާ ކަމަށް ވެސް އޭނާ ވިދާޅުވި އެވެ.
