ޖުޑީޝަލް ސާވިސް ކޮމިޝަން (ޖޭއެސްސީ)އަށް ހުށަހަޅާ މައްސަލަތައް ބެލުމަށް ކަނޑައަޅާފައި އޮންނަ މުއްދަތު އިތުރު ކުރުމަށް ރައްޔިތުންގެ މަޖިލީހުން މިއަދު ފާސްކޮށްފި އެވެ.
ގާނޫނުގައި މީގެ ކުރިން ބަޔާންކޮށްފައި އޮންނަނީ މައްސަލަތަކާމެދު ކޮމިޓީން ގޮތެއް ނިންމައި ފަސް ދުވަހުގެ ތެރޭގައި ކޮމިޝަނަށް ހުށަހަޅަން ވާނެ ކަމަށެވެ. ސަރުކާރުގެ ފަރާތުން، މަރަދޫ ދާއިރާގެ މެމްބަރު އިބްރާހީމް ޝަރީފް ހުށަހަޅުއްވި މި ގާނޫނަށް އިސްލާހު ގެނައުމުގައި ބިލުގައި އޮތީ އެ މުއްދަތު 14 ދުވަހަށް ބަދަލު ކުރުމަށެވެ.
އޭގެ އިތުރުން، އެ މައްސަލައެއްގެ ރިޕޯޓާ ގުޅިގެން ފަނޑިޔާރުން ތަހުގީގު ކޮމިޓީއަށް ހުށަހަޅަން ބޭނުންވާ ކަންކަމާއި ރިއާޔަތް ކުރަން ބޭނުންވާ ކަންކަން ހުށަހެޅުމަށް ހަތް ދުވަހުގެ މުއްދަތެއް ދިނުމަށް ވެސް ވަނީ ހިމަނާފަ އެވެ. މީގެ ކުރިން އެކަމަށް ލިބެނީ ފަސް ދުވަހެވެ.
ޖުޑީޝަރީ ކޮމިޓީން މާބޮޑު ބަދަލުތަކެއް ނުގެނެސް ބިލު ހުށަހެޅިއިރު، ތަޅުމުގައި އެ ކޮމިޓީގެ މުގައްރިރު އިމްތިޔާޒް ފަހުމީ ވަނީ އިސްލާހެއް ހުށަހަޅުއްވާފަ އެވެ. އިމްތިޔާޒް ހުށަހެޅުއްވީ ތަހުގީގު ކޮމިޓީން އެކުލަވާލާ ރިޕޯޓު މައްސަލަ ރައްދުވާ ފަނޑިޔާރަކަށް ޖޭއެސްސީން ފޮނުވަން ޖެހޭނެ ކަމަށެވެ.
އިމްތިޔާޒް ހުށަހެޅުއްވި އިސްލާހާއެކު މަޖިލީހުގެ މިއަދުގެ ޖަލްސާގައި މި ބިލު ފާސްކުރީ ވޯޓުގައި ބައިވެރިވެވަޑައިގެންނެވި 54 މެމްބަރުންގެ ވޯޓުންނެވެ. ނުފެންނަ ކަމަށް އެއްވެސް މެމްބަރަކު ވޯޓު ނުދެއްވާއިރު ވަކި ގޮތަކަށް ވޯޓު ދޭން ބޭނުންނުވާ ކަމަށް އެއް މެމްބަރަކު ވޯޓު ދެއްވި އެވެ.
