ސަރުކާރުން ރައްޔިތުންގެ މަޖިލީހަށް ފޮނުވާ ބިލުތަކުގައި އުސޫލީ މައްސަލަ ގިނަވާތީ މަޖިލީހުގެ މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ މިއަދު ކަންބޮޑުވުން ފާޅުކުރައްވައިފި އެވެ.
ފަނޑިޔާރުންގެ ގާނޫނަށް ބަދަލު ގެނައުމަށް ސަރުކާރުން މަޖިލީހަށް ހުށަހަޅާފައިވާ ބިލަށް ބަހުސް ކުރައްވަމުން އިމްތިޔާޒް މިއަދު ވިދާޅުވީ މި ބިލު މަޖިލީހަށް ފޮނުވުމުގެ މަގުމަތީގައި ވަނިކޮށް، ބިލަށް އިތުރު އިސްލާހެއް ގެނައުމަށް ހުށަހަޅާފައިވާ ކަމަށެވެ.
"އެއީ ޕެންޝަނާއި ރިޓަޔަމެންޓު އޭޖާއި ބެހޭ ގޮތުންނާއި ފަނޑިޔާރުންނަށް ފްލެޓު ދިނުމާ ބެހޭ ގޮތުން އެ ދެކެވުނު ވާހަކައެއްގެ ތެރެއިން އަނެއްކާ އެ ބިލަށް ވެސް އިސްލާހެއް ވެސް ފޮނުވާފައި،" އިމްތިޔާޒް ވިދާޅުވި އެވެ.
މިފަދަ އުސޫލީ މައްސަލަތައް މި ފަހުން ގިނަކަން ފާހަގަކުރައްވައި އިމްތިޔާޒް ވިދާޅުވީ ސަރުކާރުގެ ފަރާތުން މަޖިލީހަށް ބިލެއް ހުށަހެޅުމުން، އެ ބިލު ދިފާއުކޮށް ވާހަކަ ދެއްކުމާމެދު ސުވާލު އުފެދޭ ކަމަށެވެ.
މިހެން ދިމާވަނީ ބިލުތައް ޑްރާފްޓުކޮށްފައި ހުށަހެޅުމުގައި ކަމާ ބެހޭ އިދާރާތަކާ މަޝްވަރާ ކުރުމެއް ނެތި ފޮނުވުމުންތޯ އޭނާ ވަނީ ސުވާލު އުފައްދަވާފަ އެވެ.
އިމްތިޔާޒް ދެން ފާހަގަކުރެއްވީ ކޮމިޓީ މަރުހަލާގައި މިހާރު އޮތް ހާރިޖީ މަސްލަހަތު ހިމާޔަތް ކުރުމުގެ ބިލު ފޮނުވުމުގައި ފޮރިން މިނިސްޓްރީގެ ހިޔާލު ހޯދާފައި ނުވާ ކަމުގެ ކަންބޮޑުވުމެވެ. އެގޮތުން ބިލަށް ހިޔާލު ހޯދުމަށް ފޮރިން މިނިސްޓްރީއަށް ލިޔުމުން، އެ މިނިސްޓްރީގެ ޖަވާބުން ކޮމިޓީ މެންބަރުން ހައިރާންވާން ޖެހުނު ކަމަށް އިމްތިޔާޒް ވިދާޅުވި އެވެ.
"ފޮރިން މިނިސްޓްރީން ވިދާޅުވީ ސަރުކާރުގެ ފަރާތުން ހުށަހަޅާފައިވާ އެ ބިލުން ހާސިލުކުރަން އުޅޭ މަގުސަދު ހާސިލުވުމަށް ޓަކައި އޭގެ ބަޔާންކޮށްފައި ހުރި ކަންތައްތައް ފަހުމު ނުވާ ކަމަށް ފޮރިން މިނިސްޓަރު ވިދާޅުވި ކަމަށް ދަންނަވަން، އަދި އެ ބިލު ޑްރާފްޓު އިސްލާހު ކުރުމުން މެނުވީ ކޮމެންޓެއް ކުރައްވަން އެނގިވަޑައިނުގަންނަވާނެ ކަމަށް،" އިމްތިޔާޒް ވިދާޅުވި އެވެ.
މިފަދަ އުސޫލީ މައްސަލަތައް ގިނަަކަން ފާހަގަކުރައްވައި އޭނާ ވަނީ ވަރަށް ބޮޑަށް ކަންބޮޑުވުން ފާޅުކުރައްވައިފަ އެވެ.
"މިފަދަ އުސޫލީ މައްސަލަތަކަށް ރަނގަޅު ނިޔަތުގައި އެޑްރެސްކޮށްގެން މެނުވީ އަޅުގަނޑު ހިތުން މިކަހަލަ ކަންތައްތައް ރަނގަޅެއް ނުވާނެ،" ވާހަކަ ނިންމާލައްވަމުން ވެސް އޭނާ ވިދާޅުވި އެވެ.
މައްސަލައިގެ ފަސްފަހަތް؛
ފަނޑިޔާރުންގެ ގާނޫނަށް ހުށަހަޅާފައިވާ އިސްލާހަށް އަމަލުކުރަން ފަށާތާ ވަކި މުއްދަތެއްގެ ތެރޭގައި ރިޓަޔާކުރަން ބޭނުންވާ 65 އަހަރުން ދަށުގެ ފަނޑިޔާރުންނަށް ރިޓަޔާ ކުރެވޭނެ ގޮތަށް އެ ގާނޫނަށް އިސްލާހު ހުށަހަޅުއްވާނެ ކަމަށް އެޓާނީ ޖެނެރަލް (އޭޖީ) އިބްރާހީމް ރިފްއަތު ވިދާޅުވެފައިވަނީ ބިލު މަޖިލީހަށް ފޮނުވުމަށް ފަހުގަ އެވެ.
ފަނޑިޔާރުންގެ ގާނޫނަށް އިސްލާހު ގެންނަން އެޖީ އޮފީހުން ޑްރާފްޓްކޮށް މަޖިލީހަށް ފޮނުވި ބިލުގައި ވަނީ ފަނޑިޔާރުން އަމިއްލައަށް އެދިގެން ފަނޑިޔާރުކަމުގެ މަގާމުން ވަކިވެވޭނެ އުމުރަކީ 65 އަހަރު ކަމުގައި ކަނޑައެޅުމަށެވެ.
މިހާރު ކޮންމެ އުމުރެއްގައި ވެސް ފަނޑިޔާރު ކަމުގެ ހިދުމަތް ކުރެއްވުމަށް ފަހު ރިޓަޔާވެވޭނެ އެވެ. އަދި، އެ ފުރުސަތު އަދިވެސް އޮންނަން ވާނެ ކަމަށް ވިދާޅުވެ ޝަރުއީ ދާއިރާގެ ބައެއް ބޭފުޅުން ޝުއޫރު ފާޅު ކުރައްވާފައިވެ އެވެ.
އޭޖީ އޮފީހުން މިފަހުން ސަރުކާރަށް ފޮނުވާފައިވާ ގިނަ ބިލުތަކެއްގައި މައްސަލަ ހުރުމުން އެ ކަން އިސްލާހު ކުރުމަށް އިތުރު ބިލު ފޮނުވާފައިވެ އެވެ. އެގޮތުން ގްރީން ޓެކްސް ނެގޭނެ މުއްދަތާ މެދު ސުވާލު އުފެދުނު ބިލާއި ހެއްކާ ބެހޭ ގާނޫނު ފާސްކުރިއިރު އޭގައި ހުރި ނޫސްވެރިންގެ ކަންބޮޑުވުންތައް ހައްލުކުރުމަށް މަޖިލީހަށް މިއަދު ހުށަހެޅި ބިލަކީ ފާހަގަކޮށްލެވޭ ބިލުތަކެވެ.
