އަލުން ވެރިކަން ލިބިއްޖެނަމަ، އެމްއެމްޕީއާރްސީގެ ފައިސާއަށް ހިޔާނާތްތެރިވި އަސްލު ވަގުންނަކީ ކޮބާކަން ހާމަކުރައްވާނެ ކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެ އެވެ.
ރޭ އިހަަވަންދޫގައި ބޭއްވި ޖަލްސާގައި، އިދިކޮޅުގެ ރިޔާސީ ކެންޑިޑޭޓުގެ ހައިސިއްޔަތުން ވާހަކަދައްކަވަމުން ޔާމީން ވިދާޅުވީ އެމަނިކުފާނު ރިޔާސީ އިންތިހާބަށް ކުރިމަތިލެއްވުމުގެ އެންމެ ބޮޑު އެއް ބޭނުމަކީ ހަގީގީ ވަގުންނަކީ ކޮބާކަން ރައްޔިތުންނަށް ދެއްކުން ކަމަށެވެ.
"ދިވެހި ރައްޔިތުންގެ ހައްގެއް، ދިވެހި ރައްޔިތުންނަށް އެނގެން ޖެހޭނެ. މީހުންނާ ދިމާލަށް ވަގަށް ގޮވިދާނެ. އެކަމަކު މައްސަލަ ބަލާލީމަ އެނގޭނީ ކޮންބައެއްތޯ ވަގުންނަކީ. ބޮޑެތި ވަގުން ތިބީ އެމްޑީޕީ ސަރުކާރުގައި," ސަރުކާރާއި، ސަރުކާރު ހިންގާ ކޯލިޝަނުގެ އިތުރުން ރައްޔިތުންގެ މަޖިލީހުގެ މެންބަރުންނަށް ބޮޑެތި ތުހުމަތުތަކެއް ކުރައްވަމުން ޔާމީން ވިދާޅުވި އެވެ.
ޔާމީން ވިދާޅުވީ އެމްއެމްޕީއާރްސީ ހިޔާނާތުގެ ފައިސާގެ މަންފާ ކޮށްފައިވަނީ ރައްޔިތުންގެ މަޖިލީހުގައި އެމްޑީޕީގެ ގޮނޑިތަކުގައި ތިބި މީހުންނަށް ކަމަށެވެ. އަދި ރައީސް ސޯލިހަށް ތުހުމަތު ކުރައްވާ ޔާމީން ވިދާޅުވީ ރައީސުލްޖުމްހޫރިއްޔާ ކަމުގައި ހުންނަ މީހަކަށް އެފަދަ ތުހުމަތުތަކެއް ކުރެވުނީމަ ދުނިޔޭގެ އެހެން ގައުމުތަކުގައި އަމަލު ކުރާ ގޮތަކީ ފުރަތަމަ ވެސް މަގާމުން އިސްތިއުފާ ދިނުން ކަމަށެވެ. ޑިމޮކްރެސީއަކީ އެ ޒިންމާ އުފުލުންކަން ފާހަގަކުރައްވާ ޔާމީން ވިދާޅުވީ، އެފަދަ ތުހުމަތުތަކެއް އައިސްފިނަމަ އެކަން ތަހުގީގުކޮށްދިނުމަށް ފުލުހުން ކައިރީ އެދެވެން ވާނެ ކަމަށެވެ.
"މިހާރު ހުންނެވި ރައީސްގެ މައްޗަށް އުފެދޭ ތުހުމަތާއި، ބަދުނާމާއި، ކޮރަޕްޝަނުގެ އަމަލުތައް އެހެރީ ފެންނަން," ޔާމީން ވިދާޅުވި އެވެ.
ޔާމީން ތުހުމަތު ކުރެއްވީ، އެމްއެމްޕީއާރްސީ ހިޔާނާތުން ލިބުނު ފައިސާ، ކުރީގެ ނައިބު ރައީސް އަހުމަދު އަދީބު މެދުވެރިކޮށް އޭރު ރައްޔިތުންގެ މަޖިލީހުގައި ތިއްބެވި މެންބަރުންގެ ޖީބަށް ވަން ކަމަށެވެ. އެގޮތުން އޭރު މަޖިލީހުގައި ތިއްބެވި އެމްޑީޕީ މެންބަރުން އެކި ކަންކަމަށް ވޯޓު ދެއްވީ ރައްޔިތުންނަށް ރަނގަޅަކަށް ނޫން ކަމަށާއި، ޖީބަށް ފައިސާ ވަނީމަ ކަމަށް ވެސް ޔާމީން ވިދާޅުވި އެވެ.
"އެކޮން ފައިސާއެއް؟ އެއީ ހަމަ އެމްއެމްޕީއާރްސީ ކަޅު ފައިސާ ވަދެފައި ހުރީ. އެމީހުން ރައްޔިތުންނަށް ކަމެއް ކޮށްދޭން ބޭނުންވަންޏާމު ރައީސް ޔާމީނުގެ ފަސް އަހަރުގެ ފަސް ބަޖެޓަށް ވޯޓުދޭން ވާނެ," ޔާމީން ވިދާޅުވި އެވެ.
ޔާމީން ވިދާޅުވީ ހާލަތު ބަދަލުވެގެން ގޮސް، ސަރުކާރު ބަދަލުވެއްޖެ ނަމަ ކަށަވަރުކުރަން ބޭނުންވާ ކަމަކީ ފައިސާ ނެގީ ކޮން ބައެއް ކަމާއި، ވައްކަން ކުރީ ކޮން ބައެއްތޯ އާއި، ކޮރަޕްޝަން ހިންގާފައިވާ ބަޔަކީ ކޮން ބައެއްތޯ ހާމަކުރާނެ ކަމަށެވެ.
އެމްއެމްޕީއާރްސީގެ ހިޔާނާތުގެ މަންފާ މިހާރުގެ ސަރުކާރުގެ ވެރިންނަށް ލިބުނު ކަމަށް ތުހުމަތުކުރައްވާ ރައީސް ޔާމީން ވާހަކަދެއްކެވިއިރު، އެމްއެމްޕީއާރްސީގެ ރަށްތައް ވިއްކައިގެން ލިބުނު ފައިސާއަށް އެމަނިކުފާނު ހިޔާނާތްތެރިވި ކަމަށް ބުނެ ދެ ދައުވާއެއް އުފުލި ޝަރީއަތުގެ މަރުހަލާގައި ހިނގަމުން އެބަ ދެއެވެ.
