މަސްވެރިންނަށް ސަރުކާރުން އިހުމާލުވެފައިވާ ކަމަށް ބުނެ އިދިކޮޅު ޕީޕީއެމް/ޕީއެންސީ ކޯލިޝަނުން ކުރިއަށް ގެންދިޔަ މުޒާހަރާގައި ހައްޔަރުކުރި އެކަކު ފިޔަވައި އެހެން މީހުން ދޫކޮށްލައިފި އެވެ.
މަސްމާރުކޭޓް ސަރަހައްދުގައި އިއްޔެ ހަވީރު ބޭއްވި އެއްވުމުގެ ތެރެއިން ހައްޔަރުކޮށްގެން ފުލުހުންގެ ބެލުމުގެ ދަށަށް ގެންދިޔައީ ހަތް އަންހެނުންނާއި ތިން ފިރިހެނުންނެވެ.
އޭގެ ތެރެއިން ޕީޕީއެމްގެ ޔޫތު މެންބަރު އަލީ އިޒްހާން ފިޔަވައި އެހެން މީހުން ވަނީ ދޫކޮށްލައިފަ އެވެ. އިޒްހާންގެ ބަންދަށް ކޯޓުން ތިން ދުވަހުގެ މުއްދަތެއް ވެސް ވަނީ ޖަހައިދީފަ އެވެ.
ގާނޫނަށް ގެނެސްފައިވާ ބަދަލުގެ ސަބަބުން ހުއްދަ ނުހޯދައި މާލޭގައި މިހާރު މުޒާހަރާ ކުރެވޭނީ ކާނިވާ ސަރަަހައްދުގަ އެވެ. އެ ނޫން ސަރަހައްދުތަކުގައި ބާއްވާ އެއްވުންތައް ފުލުހުން ނުކުމެ ރޫޅާލަ އެވެ.
ޕީޕީއެމުން އަޑު އުފުލަމުން ގެންދަނީ މަސްވެރިންނަށް މި ސަރުކާރުން ވެފައިވާ ވައުދުތައް ފުއްދައި ނުދޭ ކަމުގަ އެވެ. އޭގެ ތެރޭގައި މަސްވެރިންނަށް ހަމަ އަގެއް ހޯދައިދިނުމާއި، ޑޮލަރުން ފައިސާ ދިނުމާއި ކަނޑުމަތީގައި މަސްވެރިންނަށް ޕްލެޓުފޯމްތަކެއް އެޅުމުގެ ވައުދު ހިމެނެ އެވެ.
ކިރާ މަހަށް ހަމަ އަގު ނުލިބުމާއި، ފަސޭހައިން މަސް ނުކިރުމާއި، ބޭނުންވާ މިންވަރަށް އައިސް ނުލިބި މަސްވެރިން ބާނާ މަސްކޮޅު އުކާލަން ޖެހުން ފަދަ ޝަކުވާތައް އަބަދުވެސް މަސްވެރިން ކުރެ އެވެ.
