މިހާރު ކުރިއަށްދާ ޓީ20 ޕްރިމިއާ ލީގު ކްރިކެޓް މުބާރާތުގައި މާލެ ސްޕޯޓްސް އަތުން ހަތް ލަނޑުން ބަލިވެ، މާލެ ވެޓެރަންސް އިން ލީގުގައި ބަލިނުވެ ދަމަހައްޓަމުން އައި ރެކޯޑް ނިމުމަކަށް އަތުވެއްޖެ އެވެ.
ގައުމީ ދުވަހުގެ މުނާސަބަތުގައި އައި ބަންދު ދުވަހު ޓީ20 ޕްރިމިއާ ލީގުގެ ދެ މެޗެއް ވަނީ ކުޅެފަ އެވެ. ކުޅިވަރު އެކުވެރި އެއް ނަމްބަރު ދަނޑުގައި މިއަދު ހެނދުނު ކުޅުނު މެޗުގައި މާލެ ވެޓެރަންސް އިން ހަތް ލަނޑުން މާލެ ސްޕޯޓްސް އަތުން ބަލިވިއިރު، މެންދުރު ފަހު ކުޅުނު މެޗުގައި ކޯމެޓްސް ކްރިކެޓް ކްލަބްގެ މައްޗަށް ކްލަބް ވިޔަންސާ ވަނީ ހަތް ވިކެޓުން ކުރިހޯދައިފަ އެވެ.
ޓީ20 ޕްރިމިއާ ލީގުގެ އެއް ވަނައިގައި އަދިވެސް އޮތީ މާލެ ވެޓެރަންސް އެވެ. އެއީ ދެ ވަނައިގައި އޮތް މިލާން ކްރިކެޓް ކްލަބާ އެއްވަރަށް 12 ޕޮއިންޓް ލިބުނު ނަމަވެސް ނެޓްރަންރޭޓުން ކުރިލިބޭތީ އެވެ. އެކަމަކު، މިލާނުން މެޗު ހަމަކުރާއިރު، މޮޅުވުމުގެ ރެކޯޑް ދަމަހައްޓައިފިނަމަ އެ ޓީމަށް އެއް ވަނަ އަށް އެރޭނެ އެވެ. އަންނަ ހުކުރު ދުވަހު މިލާނުން ވެސްޓް ސްޕޯޓްސްއާ ކުޅޭނެ އެވެ.
ފަސް މެޗުން 10 ޕޮއިންޓް ހޯދައި ވިޔަންސާ ވަނީ ތިން ވަނަ އަށް ޖެހިލައިފަ އެވެ. ޓީ20 ޕްރިމިއާ ލީގުގެ ގަދަ ހަތަރަކަށް ޓީ20 ޕްރެޒިޑެންޓްސް ކަޕުން ފުރުސަތު ލިބޭނެ އެވެ.
މިއަދު ހެނދުނުގެ މެޗުގައި މާލެ ވެޓެރަންސް އަށް ޓޮސް ދިމާވުމުން އެ ޓީމުން ނިންމީ އުކުމަށެވެ. މާލެ ސްޕޯޓްސް އިން ކުޅެން އަރައި 20 އޯވަރުގެ ތެރޭގައި ވަނީ ހަ ވިކެޓަށް 129 ލަނޑު އެއްކޮށްފަ އެެވެ. އެ ޓީމުން އެންމެ ރަނގަޅު ކުޅުމެއް ދެއްކީ 48 ލަނޑު އެއްކުރި މުހައްމަދު ރިޝްވާން އާއި 25 ލަނޑު ހެދި މުހައްމަދު ޝިޔާމް އަދި 22 ލަނޑު ހެދި އަބްދުލް ހާލިގު އެވެ.
ޖަވާބުގައި މާލެ ވެޓެރަންސް އިން ކުޅެން އަރައި، 20 އޯވަރު ހަމަވިއިރު، ނުވަ ވިކެޓަށް ހެދުނީ 122 ލަނޑެވެ. އެ ޓީމަށް އެންމެ ގިނަ ލަަނޑު ހަދައިދިނީ ޗަންދަނާ އަމަރަވިކްރަމަ އެވެ. އޭނާ ވަނީ 44 ބޯޅައިން 36 ލަނޑު ހަދައިފަ އެވެ.
މެންދުުރު ފަހު ކުޅުނު މެޗުގައި ކޯމެޓްސް އަށް ޓޮސް ދިމާވުމުން އެ ޓީމުން ނިންމީ ކުޅެން އެރުމަށެވެ. ކޯމެޓްސްގެ ހުރިހާ ކުޅުންތެރިން ނުބައިވެގެން އެ ޓީމަށް ސްކޯކުރެވުނީ 98 ލަނޑެވެ. ޖަވާބުގައި ވިޔަންސާ އިން ކުޅެން އަރައި ތިން ވިކެޓަށް 99 ލަނޑު ހެދީ 7.2 އޯވަރުގެ ތެރޭގަ އެވެ. ނަތީޖާ އަކީ ހަތް ވިކެޓުން ވިޔަންސާ މެޗުން މޮޅުވުމެވެ.
މިދިޔަ މަހުން ފެށިގެން ހަފްތާ ބަންދުގައި އަދި ބަންދު ދުވަސްތަކުގައި މެޗުތައް ކުޅޭގޮތަށް ރާވާފައިވާ ޓީ20 ޕްރިމިއާ ލީގު ދަނީ ގިނަ ގޮތްގޮތުން ފޯރިގަދަކޮށެވެ. އެ ގޮތުން މި މުބާރާތަށް އަމާޒުކޮށް ރާއްޖޭން ބޭރުން ވަނީ ބިދޭސީ ކުޅުންތެރިން ވެސް ގެނެސްފަ އެވެ. އެ ގޮތުން ސީބީއެލް ޓީމަށް އިންޑިއާގެ ދެ ކުޅުންތެރިން ކުޅޭއިރު، މާލެ ސްޕޯޓްސް އަށް ވަނީ ސްރީ ލަންކާ ކުޅުންތެރިއަކު ގެނެސްފަ އެވެ.
