ތާރު އަޅައިގެން މާލޭގެ އަމީނީ މަގު ހެދުމުގެ މަޝްރޫއު ފަށައިގެން ކުރިއަށްދާއިރު، އެ މަގުގައި ހުރި ގަސްތައް ކަނޑަމުންދިއުން ހުއްޓުވުމަށް ގޮވާލައި ރައްޔިތުންގެ މަޖިލީހަށް މައްސަލައެއް ހުށަހަޅައިފި އެވެ.
އަމީނީ މަގުގައި ތާރު އަޅައި ރަނގަޅު ފެންވަރަކަށް ހަދަން ހަވާލުވެފައިވާ ސަރުކާރުގެ ކުންފުނި އާރްޑީސީން މިހާރު އަންނަނީ އެ މަގުގައިވާ ގަސްތައް ނަގަމުންނެވެ. އެއާ އެކު ސޯޝަލް މީޑިއާގައި ބައެއް މީހުން ދަނީ އެކަމާ ކަންބޮޑުވުން ވެސް ފާޅުކުރަމުންނެވެ.
ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެންބަރު ހަސަން ލަތީފް ހުށަހަޅުއްވާފައިވާ މައްސަލާގައި ފުރަތަމަ ފާހަގަ ކޮށްފައިވާ ކަމަކީ މާލެއަކީ ހިތްފަސޭހަ ތަނަކަށް ހެދުމަކީ އެމްޑީޕީގެ ރިޔާސީ ވައުދެއް ކަމެވެ. އަދި އެ ކަމަށް މާލޭގެ ގުދުރަތީ ވެށި ނުގެއްލޭނެ ގޮތަށް ކަންކަން ރާވަން ޖެހޭނެ ކަމަށެވެ.
އަމީނީ މަގުގެ ހެންވޭރު ކޮޅުގައި އުފެދިފައި ހުރި ބޮޑެތި ގަސްތައް މިހާރު ވެސް ކަނޑާލާފައިވާއިރު، ގިނަ ސުވާލުތަކެއް އުފެދިފައިވާ ކަމަށް ވެސް ހަސަން ހުށަހަޅުއްވާފައިވާ މައްސަލާގައިވެ އެވެ.
އެ ގޮތުން އަމީނީ މަގުގެ ދެން ހުރި ހިސާބުތަކުގައި ތާރު އަޅަން ފަށާއިރު އެ ހިސާބުގެ ހުރި ގަސްތައް ކަނޑާލާނެތޯއާއި މާލޭގެ މަގުތައް ހެދުމަށް ސަރުކާރުން ކިހައި ގަހެއް ކަނޑާލަން ރާވާފައިވޭތޯ ސުވާލު އުފެދިފައިވާ ކަމަށް ހަސަން ވިދާޅުވެފައިވެ އެވެ.
"އަމީނީ މަގުގެ ގަސްތައް ނުކަނޑައި ހުރި ހިސާބުތަކާއި މާލޭގެ އެހެން މަގުތައް ވެސް ރަނގަޅު ފެންވަރަށް ހަދާއިރު ގުދުރަތީ ރީތިކަމާއި ހިތްފަސޭހަކަން ނުގެއްލޭ ގޮތަށް އަދި ވަކީން ހާއްސަކޮށް އެ މަގުތަކުގައި ހުރި ގަސްތައް ނުކަނޑައި އެ މަގުތައް ހެދުމުގެ މުހިންމުކަން ސަރުކާރުގެ ސަމާލުކަމަށް ގެނައުމަށް މި މައްސަލަ ހުށަހަޅަމެވެ." ހަސަން މަޖިލީހަށް ހުށަހަޅުއްވާ މައްސަލައިގެ ލިޔުމުގައިވެ އެވެ.
އަމީނީ މަގުގެ މަސައްކަތް ކުރިއަށް ދަނީ ކޮންސަލްޓެންޓުން ދިން ލަފައާ ޚިލާފަށް ކަމަށް، އެންވަޔަރަމެންޓް އެސެސްމަންޓް ރިޕޯޓް (އީއައިއޭ) ގައި ވެސް ފާހަގަކޮށްފައިވެ އެވެ.
ދާދި ފަހުން ރައްޔިތުންގެ މަޖިލީހުގެ ޖަލްސާއެއްގައި، މަޖިލީހުގެ ރައީސް މުހައްމަދު ނަޝީދު ވެސް ވަނީ އަމީނީ މަގުގެ ގަސްތައް ކަނޑައިގެން މަޝްރޫއު ކުރިއަށް ގެންދާ ނަމަ ފަރުދީ ހައިސިއްޔަތުން އެ މައްސަލަ ޝަރީއަތަށް ވެސް ގެންދާނެ ކަމަށް ވިދާޅުވެފަ އެވެ.
ކުންފުނީގެ ދިފާއު
އެ ކަންބޮޑުވުންތަކާ ގުޅިގެން އާރްޑީސީން މީގެ ކުރިން ބުނީ އަމީނީ މަގު ހަދައި ނިމޭ އިރު އެމަގުގައި އަލުން ގަސް އިންދާނެ ކަމަށެެވެ.
"...މިހާރު އަމީނީ މަގުގައި ހުރި ގަސްތައް ކެނޑުމުގެ ބަދަލުގައި އެގަސްތައް ނެގުމަށް ފަހު މިހާރު ތަރައްގީކުރަމުން އަންނަ ޕިކްނިކް އައިލެންޑް ކުޑަގިރި އަށް އެ ގަސްތައް ބަދަލުކުރެވޭނެ އެވެ. އަދި އަމީނީ މަގުގެ މަސައްކަތް ނިމޭ އިރު، އެ މަގުން ނަގާ ގަސްތަކުގެ ބަދަލުގައި ގަސް އިންދެން ހުރި ތަންތަނުގައި ގަސް އިންދާނެ އެވެ،" އާރްޑީސީގެ ބަޔާނުގައި ބުންޏެވެ.
އާރްޑީސީގެ މެނޭޖިން ޑިރެކްޓަރު މޫސާ އަލި މަނިކު (މޫކޭ) މީގެ ކުރިން "އަދަދު"އަށް ވިދާޅުވީ މަސައްކަތް ކުރަމުން އަންނަނީ ވީހާ ވެސް ތިމާވެއްޓާ ރައްޓެހި ގޮތަކަށް ކަމަށާއި އެހެން ނަމަވެސް މަގުގައި ހުރި ބައެއް ގަސްތައް ނަގަންޖެހޭ ކަމަށެވެ.
"އެކަމަކު މަގުން ނަގާ ގަސްތަކުގެ ބަދަލުގައި މަގު ނިމޭއިރުގައި ކޮންމެ ގަހަކަށް ގަހެއް އިންދިފައި ހުންނާނީ،" މޫކޭ ވިދާޅުވި އެވެ.
