މާލޭގެ ތަރައްގީގެ ޕްލޭން އެކުލަވައިލުމަށް މާލެ ސިޓީ ކައުންސިލުން ކުރަމުންދާ މަސައްކަތް ބައްލަވައިލައްވައި އެ މަސައްކަތުގެ މަޝްވަރާގައި އެމްޑީޕީގެ ޗެއާޕާސަން، މުހައްމަދު ނަޝީދު ބައިވެރިވެވަޑައިގެންފި އެވެ.
މާލެ ސިޓީ ކައުންސިލަށް ނަޝީދު ވަޑައިގަތީ މިއަދު ހެނދުނު އެވެ. މާލެ ސިޓީއަށް އަލަށް އިންތިހާބުވެވަޑައިގެންނެވި މެންބަރުންނާ ބައްދަލުކުރެއްވުމަށްފަހު އެމަނިކުފާނު ވަނީ "ރީތިންކް މާލެ ސިޓީ" ގެ މަޝްވަރާ ބައްދަލުވުމުގައި ބައިވެރިވެވަޑައިގެންފަ އެވެ.
ސެރެޓް ސްޓޫޑިއޯއާ ހަވާލުކޮށްގެން މާލެ ސިޓީ ކައުންސިލުން އެކުލަވައިލުމުގެ މަސައްކަތް ކުރަމުންދާ "ރީތިންކް މާލެ ސިޓީ" އަކީ ތޮއްޖެހިފައިވާ މާލެ ސިޓީގައި ހުރި ގޮންޖެހުންތަކަށް ހައްލު ހޯދުމަށް ކުރަމުންދާ މަސައްކަތެކެވެ.
އެ ޕްލޭން މައިގަނޑު ގޮތެއްގައި ބިނާވަނީ ތިމާވެށްޓާއި އިގުތިސާދުގެ އިތުރުން އިޖުތިމާއީ ދާއިރާއާ ގުޅޭ މުހިންމު ހަތް ކަމެއްގެ މައްޗަށެވެ. އެއީ:
- އަމިއްލަ އުޅަނދުތަކަށް ބަރޯސާވާ މިންވަރު މަދުކޮށް އާންމު ދަތުރުފަތުރާއި ހިނގާފައި އުޅޭ މީހުންނަށް އިސްކަން ދިނުން
- ގަސް އިންދުން އިތުރުކޮށް މާލޭގައި ފެންބޮޑުވާ މައްސަލައަށް ހައްލެއް ހޯދުމާއެކު ހޫނުމިން ކުޑަކުރުން
- މީހުން ދިރިއުޅޭ ސަރަހައްދުތަކާ ދުރަށް ސިނާއީ މަސައްކަތް ކުރާ ތަންތަން ގެންދިޔުން
- އިގުތިސާދީ ހާއްސަ ޒޯންތަކާއި ވަޒީފާގެ ފުރުސަތުތައް އިތުރުވާނެ ފަދަ ސަރަހައްދުތައް ކަނޑައެޅުން
- ހުރިހާ ފަންތިއެއްގެ ރައްޔިތުންނަށް ވެސް އެކަށީގެންވާ ބޯހިޔާވަހިކަމާއި އިޖުތިމާއީ މައިދާންތައް ފަސޭހައިން ލިބޭނެ މަގު ފަހިކުރުން
- މާލޭގެ ބިނާތަކާއި އާސާރީ ތަންތަން ރައްކާތެރިކޮށް ސަގާފީ މުއްސަނދިކަން އަންނަން އޮތް ޖީލުތަކަށް ފޯރުކޮށްދިނުން
- އުމުރުން ދުވަސްވީ މީހުންނަށް ފަސޭހަ އަދި އިޖުތިމާއީ ރައްކާތެރިކަން ކަށަވަރުވެފައިވާ މާލެއެއް ބިނާކުރުން
