ރައީސް އިބްރާހިމް މުހައްމަދު ސޯލިހު ރަށްރަށަށް ވަޑައިގެން ކޮށްދެއްވާނެ ކަމަށް ވިދާޅުވާ ވާހަކަތަކަކީ ވައުދު ކަމަަށާއި އެކަންކަން ފުއްދަވާ ދެއްވާނެ ކަމަށް ސަރުކާރުން މިއަދު ބުނެފި އެވެ.
ރައްޔިތުުންގެ މަޖިލީހުގައި މިއަދުގެ ޖަލްސާގައި މަޖިލީހުގެ ރައީސް މުހައްމަދު ނަޝީދު ވިދާޅުވީ ސަރުކާރެއްގެ ވައުދުތަކަކީ ސިޔާސީ ޕާޓީތަކުގެ މެނިފެސްޓޯގައި ލިޔެފައި ހުންނަ ކަންތައްތައް ކަމަށެވެ. އަދި، ރަށްރަށަށް ވަޑައިގެން ކޮށްދެއްވަން ވިދާޅުވާ ވާހަކަތަކަކީ ވައުދު ނޫން ކަމަށް ނަޝީދު ވިދާޅުވި އެވެ.
އެކަމާ ގުޅިގެން "އަދަދު" އިން ސުވާލުކުރުމުން ސަރުކާރުގެ ތަރުޖަމާނު މިއުވާނު މުހައްމަދު ވިދާޅުވީ މިފަދަ ދަތުރުތަކުގައި ލިބޭ ހިޔާލާއި ޝަކުވާއަށް ހައްލެއް ހޯއްދަވައިދެއްވުމަށް ކޮށްދެއްވާނެ ކަމަށް ވިދާޅުވާ ކަންކަމަކީ ކަމާ ގުޅުން ހުރި ބޭފުޅުުންނާ މަޝްވަރާ ކުރެއްވުމަށް ފަހު ވިދާޅުވާ ވާހަކަތަކެއް ކަމަށެވެ.
"ކަމެއް ކޮށްދެއްވާނެކަމަށް، މައްސަލައަށް ހައްލެއް ހޯއްދަވައިދެއްވާނެކަމަށް ރައީސް ވިދާޅުވާ ކަންކަން ކޮށްދެއްވާނެ، އަދި އެކަން ހިނގަމުންދޭތޯ ރައީސް ބައްލަވާނެ؛ މިކަމުގައި ކުޑަ ރަށެއް، ބޮޑު ރަށެއް އަދި ސިޔާސީ ފިކުރަކަށް ނުބައްލަވާނެ،" މިއުވާން ވިދާޅުވި އެވެ.
މިއުވާން ވިދާޅުވި ގޮތުގައި މިކަންކަން ކޮށްދެއްވުމުގެ އިތުރަށް މެނިފެސްޓޯގައި ހުރި ކަންކަން ވެސް ތަންފީޒު ކުރާނެ ކަމަށެވެ.
"ހުރިހާ ވައުދުތަކަކީ މެނިފެސްޓޯގައި ހުރި ވާހަކަތަކަކަށް ނުވެދާނެ. މިސާލަކަށް ފެނާ ނަރުދަމާ ހުރިހާ ރަށެއްގައި ގާއިމްކުރުން. މެނިފެސްޓޯގައި ނޯންނާނެ އެވާހަކަ. އެހެންނަމަވެސް އެއީ ރައްޔިތުންނަށް ލިބެން ޖެހޭ އަސާސީ ހައްގަކަށްވާތީ،" މިއުވާން ވިދާޅުވި އެވެ.
އެގޮތުން ރައީސް ވެވަޑައިގަންނަވާ ހުރިހާ ވައުދަކާއި ކަންކަން ކޮށްދެއްވާނެ ކަމުގެ ޔަގީންކަން ތަރުޖަމާނު ދެއްވެވި އެވެ.
ސަރުކާރުން މިހެން ބުނިނަމަވެސް މީގެ ކުރިން މި ސަރުކާރުގެ ހައުސިން މިނިސްޓަރު މުުހައްމަދު އަސްލަމް ވަނީ ރައީސް ވެވަޑައިގަންނަވާ ހުރިހާ ވައުދަކީ ފުއްދޭނެ ވައުދުތަކެއް ނޫން ކަމަށް ވިދާޅުވެފަ އެވެ.
