ގާފަރު މަސް ދޯންޏެއް ފ. އަތޮޅު ފަރަކަށް އަރައި، ދޯނި ބިންދައިގެން ހިނގައްޖެ އެވެ.
އެ ދޯނި އަރާފައި ވަނީ ރިސޯޓެއް ހަދަން ދޫކޮށްފައިވާ ފ. ހިމިތީ ފަރަށެވެ. އެއީ ކ. ގާފަރު "ހުދަންބަރު 12" ނަމަކަށް ކިޔާ ދޯންޏެކެވެ. އެ ދޯނި ފަރަށް އަރާފައި ވަނީ ރޭ މެންދަމު އެވެ.
އެ ދޯނި ފަރަށް އެރިއިރު ދޯނީގައި ބިދޭސީންނާ އެކު ޖުމްލަ 12 މީހަކު ތިއްބެވެ.
ފީއަލި ކައުންސިލްގެ ރައީސް މޫސާ އަހްމަދު "އަދަދު" އަށް ވިދާޅުވީ އެ އަތޮޅުގެ ފަރަކަށް އަރާފައިވާ ދޯންޏަކީ މަސް ބޭނުމަށްފަހު ދަތުރު ކުރަމުން ދިޔަ ދޯންޏެއް ކަމަށެވެ.
ރިސޯޓެއް ހަދަން ދޫކޮށްފައިވާ ފ. ހިމިތީ ފަރަށް އެރި ގާފަރު މަސް ދޯންޏި އެ ރަށޫ ފަރުމަތީގައި-- ފޮޓޯ: ފީއަލި ކައުންސިލް
"އަޅުގަނޑުމެންނަށް މައުލޫމާތު ލިބޭ އެ ދޯނީގަ 10 ޓަނު މަސް ހުރި ކަމަށް. މީހުން ސަލާމަތް ކޮށްފި،" އޭނާ ވިދާޅުވި އެވެ.
ގާތްގަނޑަކަށް 80 ވަރަކަށް ފޫޓުގެ އެ މަސް ދޯނި ފަރަށް އެރިކަމުގެ މައުލޫމާތު ކައުންސިލަށް ލިބުމާ އެކު ފީއަލީގެ ދެ ދޯންޏެއް އެ ސަރަހައްދަށް ގޮސް ދޯންޏަށް އެހީވުމުގެ މަސައްކަތް ކުރަމުންދާ ކަމަށްވެސް އޭނާ ވިދާޅުވި އެވެ.
"މިވަގުތު ސިފައިން ވެސް އެ ސަރަހައްދުގައި ހަރަކާތްތެރިވަމުން ދަނީ. އެ ދޯނި މިހާރު ވަނީ ދެ ބުރިއަށް ބިންދައިގެން ގޮއްސަ،" މޫސަ ވިދާޅުވި އެވެ.
