ގައުމުތައް ގުޅިގެން ނޫނީ ދިފާއީ ބާރު އިތުރުކުރެވެން ނެތް ޒަމާނެއްގައި، އަސްކަރީ އެއްބަސްވުންތަކުގެ މައިގަނޑު ބޭނުމަކަށް ވާން ވާނީ ކުދި ގައުމުތަކަށް އޭގެ ބޭނުން ފުއްދައިދިނުން ކަމަށް ރާއްޖޭގެ ޑިފެންސް މިނިސްޓަރު މާރިޔާ އަހުމަދު ދީދީ މިއަދު ވިދާޅުވެއްޖެ އެވެ.
އިންޑިއާ ސިފައިންގެ އަހަރީ ބައްދަލުވުން ނުވަތަ އިންޑިއާ ޑިފެންސް ކޮންކްލޭވްގައި، ވީޑިއޯ މެދުވެރިކޮށް މާރިޔާ ދެއްވި ހިތޯބެއްގައި ވިދާޅުވީ އިންޑިއާ ކަނޑުގެ ސަރަަހައްދަކީ ހަމައެކަނި އެންމެ ބާރުގަދަ އަސްކަރިއްޔާ އޮތް ގައުމަށް ވެސް ބެލެހެއްޓޭ ވަރަށް ވުރެ ބޮޑު ސަރަހައްދެއް ކަމަށެވެ.
ދުނިޔޭގެ ޖިއޯޕޮލިޓިކްސްގެ ވާދަވެރިކަން އިތުރުވެފައިވާ ހާލަތުގައި، އިންޑިއާ ކަނޑުގެ އަމާންކަމާއި އިންޑިއާ ކަނޑުގައި ހިމެނޭ ކޮންމެ ގައުމެއްގެ އަމާންކަން ވެސް މުހިންމު ކަމަށް މާރިޔާ ވިދާޅުވި އެވެ. އަދި އެއިން އެއްވެސް ގައުމަކަށް އެކަނި އެ ގައުމެއްގެ ދިފާއު ބެލެހެއްޓޭން ވެސް ނޯންނާނެ ކަމަށް އޭނާ ވިދާޅުވި އެވެ.
"މިއީ ކުރިއަށް އޮތް ތަނުގައި ދުނިޔޭގެ ޖިއޯޕޮލިޓިކްސްގެ މަރުކަޒު،" މާރިޔާ ވިދާޅުވި އެވެ.
މާރިޔާ ވިދާޅުވީ އަސްކަރީ އެއްބަސްވުންތަކެއް ގައުމުތަކުގެ މެދުގައި ގާއިމްކުރެވޭއިރު އެއީ ހަމައެކަނި ލިޔެކިޔުމުގައި އޮތް ފަލްސަފާއަކަށް އެކަނި ވެގެން ނުވާނެ ކަމަށެވެ. އަދި އަމަލީ ގޮތުން އެއްބަސްވުމުގައި އަމާޒުތައް ތަންފީޒު ކުރެވެން ޖެހޭނެ ކަމަށް މާރިޔާ ވިދާޅުވި އެވެ.
"މި ޑިފެންސް ކޯޕަރޭޝަންތަކުގެ އެންމެ މުހިންމު ކަމަކަށް އޮންނަން ވާނީ އަސްކަރީ ގޮތުން ބާރުގަދަ ގައުމުތަކުގެ އެހީގައި، ކޯޕަރޭޝްންގައި ބައިވެރިވާ ކުދި ގައުމުތަކުގެ އަސްކަރީ އަދި ދިފާއީ ބޭނުންތައް ފުއްދައިދިނުން،" މާރިޔާ ވިދާޅުވި އެވެ.
މާރިޔާ ދެން ވަނީ އިންޑިއާގެ ބޮޑު ވަޒީރު ނަރެންދްރަ މޯދީގެ ސަރުކާރުން ކޮވިޑް-19 ގެ ބަލިމަޑުކަމުގެ ހާލަތުގައި ރާއްޖެއަށް ވެދީފައިވާ އެހީތެރިކަމާއި، އިންޑިއާގެ އަސްކަރިއްޔާއިން ދިވެހި އަސްކަރިއްޔާއަށް ފޯރުކޮށްދޭ އަސްކަރީ އެހީތެރިކަމަށް ޝުކުރު އަދާކޮށްފަ އެވެ.
ސަރުކާރުގެ އިސް ބޭފުޅުން ވިދާޅުވާ ގޮތުގައި، އިންޑިއާގެ އަސްކަރީ އެހީ ހޯދަން ރައީސް ސޯލިހް ގެންގުޅުއްވާ ސިޔާސަތުގެ ބޭނުމަކީ ޓެރަރިޒަމާއި މަސްތުވާތަކެއްޗާއި ކަނޑުފޭރުން ފަދަ ކަންކަމުން ސަލާމަތްކޮށްދެވޭ ވަރުގެ އަސްކަރީ ގާބިލްކަން އިތުރު ކުރުމެވެ.
