އިންޓަގްރޭޓެޑް ނޭޝަނަލް ޕަބްލިކް ފެރީ ނެޓްވޯކު، ރާއްޖެ ޓްރާންސްޕޯޓު ލިންކް (އާރުޓީއެލް) އަށް ބޭނުންވާ 65 ފެރީ ބަނުމަށް މޯލްޑިވްސް ޓްރާންސްޕޯޓު އެންޑް ކޮންޓްރެކްޓިން ކޮމްޕެނޓީ (އެމްޓީސީސީ) އިން އަލްޝާލީ މެރިންއާ ހަވާލުކޮށްފި އެވެ.
މި 65 ފެރީއަކީ އާރްޓީއެލް ހައި ސްޕީޑް ފެރީން ރާއްޖެ ގުޅާލުމުގެ ދެވަނަ އަދި ތިންވަނަ ފިޔަވައްސަށް ބޭނުންވާ ފެރީތަކެވެ. މި ފެރީތައް ބަނުމަށް އަލްޝާލީއާ އެކު އެއްބަސްވުމުގައި ސޮއިކުރެއްވީ އެމްޓީސީސީގެ ސީއީއޯ އާދަމް އާޒިމް އެވެ. އަދި، އަލްޝާލީ މެރިންގެ ފަރާތުން ސޮއިކުރެއްވީ އެ ކުންފުނީގެ ޗެއާމަން އަބްދުﷲ ހުސައިން މުހައްމަދު އަލް ޝާލީ އެވެ.
މި މަޝްރޫއަކީ 567 މިލިއަން ރުފިޔާއަށް ދެ އަހަރު ދުވަހުގެ މުއްދަތުގައި ނިންމުމަށް ހަވާލުކުރި މަޝްރޫއެކެވެ.
ފަންސާސް މީހުންގެ ޖާގައިގެ އެއާ ކޮންޑިޝަން މި ފެރީތައް ބަނުމުގައި އިސްކަން ދޭނީ ދަތުރުވެރިންނަށް ހިތްފަސޭހަ ދަތުރެއް ކުރެވޭނެ ގޮތަކަށް ކަމަށް އެމްޓީސީސީން ބުނެ އެވެ.
އެމްޓީސީސީން ބުނީ ފެރީގެ ސީޓާއި ޕަސެންޖަރުންގެ ކެބިން ފަރުމާ ކޮށްފައި ވަނީ ހިތްފަސޭހަ ދަތުރުތަކަށް އެންމެ އެކަށޭނެ ގޮތަކަށް ކަމަށެވެ.
އިންޓަގްރޭޓެޑް ނޭޝަނަލް ޕަބްލިކް ފެރީ ނެޓްވޯކުގެ ފުރަތަމަ މަރުހަލާގެ ދަށުން ފެރީގެ ހިދުމަތް ދޭން ފަށާފައި ވަނީ ހއ، ހދ އަދި ށ އަތޮޅުގަ އެވެ.
އަދި، މިއަދު ސޮއިކޮށް، ބަނުމަށް ހަވާލުކުރީ ބާކީ17 އަތޮޅަށް ހިދުމަތް ދިނުމަށް ބޭނުންވާ ފެރީ އެވެ.
މި އަތޮޅުތަކަށް ހިދުމަތް ދޭން ފެށުމުން މުޅި ރާއްޖެ ކަންޑު ދަތުރުފަތުރުގެ ވިއުގައަކުން ގުޅާލެވިގެންދާނެ އެވެ.
އެމްޓީސީސީން މީގެ ކުރިން ބުނެފައިވާ ގޮތުގައި އަންނަ އަހަރުގެ ސެޕްޓެމްބަރު މަހު ރާއްޖޭގެ ހުރިހާ އަތޮޅެއްއިންޓަގްރޭޓެޑް ނޭޝަނަލް ޕަބްލިކް ފެރީނެޓްވޯކުން ގުޅާލާނެ އެވެ.
އެކި ޒޯންތަކަށް ބަހާލައިގެން ކުރިޔަށް ގެންދާ އިންޓެގްރޭޓަޑް ނޭޝަނަލް ޕަބްލިކް ފެރީ ނެޓްވާކުގައި މީހުން އުފުލާ ފެރީތަކުގެ އިތުރުން ކާގޯ ފެރީ ވެސް ހުރެ އެވެ. މި ޒަމާނީ ފެންވަރުގެ ފެރީތަކަކީ ބާރު ދުވެލީގައި ދަތުރުކުރާ، ފަސިންޖަރުން ބޭނުންވާ ހިދުމަތްތައް ލިބޭ ގޮތަށް ފަރުމާކޮށްފައިވާ ފެރީތަކެވެ.
