ރާއްޖެއިން ޔުނައިޓެޑް ސްޓޭޓްސް އޮފް އެމެރިކާއަށް ކަނޑައަޅާފައި ހުންނަވާ ސަފީރު ކަމުގެ މަގާމަށް އަބްދުލްޣަފޫރު މުހައްމަދު އައްޔަނުކޮށްފި އެވެ.
އޭނާ އެ މަގާމަށް އައްޔަނުކުރައްވައި، މަގާމުގެ ފަތްކޮޅު ހަވާލުކޮށްދެއްވީ އެކަމަށް ބޭއްވި ހާއްސަ ރަސްމިއްޔާތެއްގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހެވެ.
އެމެރިކާ ސަފީރުގެ މަގާމަށް އަބްދުލްޣަފޫރު އައްޔަން ކުރެއްވިއިރު، އޭނާ އެންމެފަހުން ހުންނެވީ ފޮރިން މިނިސްޓްރީގެ އެމްބެސެޑާ އެޓް ލާޖްގެ މަގާމުގަ އެވެ. އޭގެ ކުރިން އެ މިނިސްޓްރީގެ ފޮރިން ސެކްރެޓަރީގެ މަގާމާއި އެކުވެރި ދައުލަތްތަކުގެ މަރުކަޒުތަކަށް ރާއްޖެއިން ކަނޑައަޅުއްވާފައި ހުންނަވާ ދާއިމީ މަންދޫބުގެ މަގާމުގެ ވެސް އޭނާ ފުރުއްވި އެވެ. ހަމައެއާއެކު އަބްދުލްޣަފޫރު ވަނީ ފޮރިން މިނިސްޓްރީގެ ގިނަ އިސްމަގާމުތަކެއް ފުރުއްވާފަ އެވެ.
އަބްދުލްޣަފޫރު ތައުލީމު ހާސިލު ކުރެއްވީ އެމެރިކާގެ ޓަފްޓްސް ޔުނިވާސިޓީގެ ފްލެޗާ ސްކޫލް އޮފް ލީ އެންޑް ޑިޕްލޮމަސީންނެވެ. އޭނާ ވަނީ އިންޓަނޭޝަނަލް ރިލޭޝަންސް ދާއިރާއިން މާސްޓާސް ހާސިލުކުރައްވާފަ އެވެ.
