ރައްޔިތުންގެ މަޖިލީހުގެ ގައުމީ ތަރައްގީ އާއި ތަރިކައިގެ ކޮމިޓީގެ މިއަދުގެ ބައްދަލުވުމަށް ޓްރާންސްޕޯޓް މިނިސްޓަރު އައިޝަތު ނަހުލާ ހާޒިރުވުން ލަސްވުމުން، "އަމުރު ނެރެގެން ވިޔަސް" މިނިސްޓަރު ހާޒިރު ކުރަން ކޮމިޓީން ނިންމައިފި އެވެ.
ކޮމިޓީގެ މިއަދުގެ ޖަލްސާގައި ތާވަލްކޮށްފައި އޮތީ ޓްރާންސްޕޯޓް މިނިސްޓްރީގެ އަހަރީ ރިޕޯޓު އިއްވުމެވެ.
"ޓްރާންސްޕޯޓް މިނިސްޓްރީގެ ބޭފުޅުން ހާޒިރުވާން ދަންނަވާފައި ވަނީ، ކޮމިޓީގެ އިއްޒަތްތެރި މެންބަރުން ވިދާޅުވީ މިނިސްޓަރު ވަޑައިނުގެންނެވީ ކަމަށް ބަލާފައި ކެންސަލް ކޮށްލަން، ދެން އަންނަ ދުވަހަކަށް އަމުރު ނެރެގެން ވިޔަސް ހާޒިރުކުރުމަށް،" މިނިސްޓަރު ވަޑައިގަންނަވާތޯ މަޑުކުރުމަށް ފަހު، ޖަލްސާ ކެންސަލް ކޮށްލައްވަމުން ކޮމިޓީގެ މުގައްރިރު ބާރަށު ދާއިރާގެ މެންބަރު އަހުމަދު އަބްދުﷲ ވިދާޅުވި އެވެ.
މިކަމާ ގުޅިގެން ކޮމިޓީގައި ބައިވެރިވެވަޑައިގެންނެވި މެންބަރަކު ނަން ނުޖެހުމަށް ޝަރުތުކޮށް "އަދަދު" އަށް ވިދާޅުވި ގޮތުގައި ކޮމިޓީން އަންގާފައިވާނީ މިނިސްޓަރު ހާޒިރުވުމަށް ކަމަށެވެ. އެހެންނަމަވެސް މީގެ ކުރިން ދެ ދުވަހެއްގެ މަތިން ވެސް ފޮނުވާފައިވަނީ މިނިސްޓްރީގެ އެހެން ބޭފުޅުންނެވެ.
"މިނިސްޓްރީގެ ބޭފުޅުން މިއަދު ވެސް ވަޑައިގެންނެވީ، މިނިސްޓަރު ވެސް ވަޑައިގަންނަވަން އުޅުއްވާ ކަމަށް އެ ބޭފުޅުން ވިދާޅުވި، އެހެންނަމަވެސް 11 ޖެހިއިރު ކޮމިޓީ ފަށައިގެން 11:15 ވީއިރު ވެސް ވަޑައިނުގަނެވުނު މިނިސްޓަރަށް،" އެ މެންބަރު ވިދާޅުވި އެވެ.
މިކަމާ ގުޅިގެން ޓްރާންސްޕޯޓް މިނިސްޓްރީގެ ޑެޕިއުޓީ މިނިސްޓަރ ހަމަދު އަބްދުލްގަނީ "އަދަދު" އަށް ވިދާޅުވީ މިނިސްޓަރު ހާޒިރުވުން ލަސްވީ ކުއްލި ކަމެއް ދިމާވުމުން ކަމަށާއި އެކަން މަޖިލީހަށް އަންގާފައިވާނެ ކަމަށެވެ.
"މަޖިލީހުގެ އިދާރީ ބޭފުޅުންނަށް ވެސް އިންފޯމް ކުރިން 11:03 ވީއިރު، އެންގިން ލަސްވާނޭ ފައިވް މިނަޓްސް ވަރު، އެ ހިސާބަށް ގޮސް އެތާ ތިރީގައި ހުއްޓާ [ޖަލްސާ ނިންމާލީ]، ތިރިއަށް އެސްކޯޓު ކުރާކަށް ވެސް ބޭފުޅަކު ނުދޭ، ދިޔައިރު ގޭޓު ވެސް ލައްޕާފައި ހުރީ،" ހަމަދު ވިދާޅުވި އެވެ.
ހަމަދު ވިދާޅުވި ގޮތުގައި މިނިސްޓަރަށް ވަޑައިގެންނެވުނީ 11:09 ވީއިރު އެވެ. އެހެންނަމަވެސް ގޭޓު ހުޅުވުން ލަސްވެ އެތެރެއަށް ވަޑައިގެންނެވުނުއިރު 11:14 ވެއްޖެ އެވެ.
"ހާޒިރުވެވަޑައިނުގެންނެވީކީ ނޫން، އިންފޯމްކޮށްފައި އޮއްވާ ކެންސަލް ކުރުމަކީ އަޅުގަނޑަށް ހީވަނީ ޒާތީ ކަމެއްހެން،" އޭނާ އިތުރަށް ވިދާޅުވި އެވެ.
އެނގިފައިވާ ގޮތުގައި ދެން މި ކޮމިޓީގެ ކެންސަލް ކުރި ޖަލްސާ އޮންނާނީ އަންގާރަ ދުވަހު އެވެ. މި ޖަލްސާއަށް ހާޒިރުވުމަށް މަޖިލީހުގެ ރައީސް މުހައްމަދު ނަޝީދު ސޮއިކުރައްވައި ހާޒިރުވުމަށް މިނިސްޓަރު ނަހުލާއަށް އަމުރު ފޮނުވާނެ ކަމަށް ބެލެވެ އެވެ.
