ހދ. ކުރިނބީ ބަނދަރު ހެދުމުގެ މަޝްރޫއު މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އާ ހަވާލުކޮށްފި އެވެ.
މިއަދު އެ މަސައްކަތް އެމްޓީސީސީއާ ހަވާލުކޮށްފައި ވަނީ 42.9 މިލިއަން ރުފިޔާއަށް 365 ދުވަހުގެ ތެރޭގައި ނިންމާ ގޮތަށެވެ.
އެ މަޝްރޫއުގެ ދަށުން ކުރިނބީ ބަނދަރު 4،389 ކިއުބިކް މީޓަރަށް ފުން ކުރުމާއެކު، ބަނދަރަށް އިތުރުކުރެވޭ ބައި 30،172 ކިއުބިކް މީޓަރަށް ފުން ކުރުމުގެ އިތުރަށް ބަނދަރަށް ވަންނަ ނެރު 2،040 ކިއުބިކް މީޓަރު ފުން ކުރާނެ އެވެ.
މެދު ދިޔައިން ފެށިގެން 3- މީޓަރު ހަމަވާ ވަރަށް ބަނދަރު ފުން ކުރުމަށް ހަމަޖެހިފައިވާއިރު، ބަނދަރަށް އިތުރުކުރެވޭ ބައި މެދު ދިޔައިން ފެށިގެން 3.5- މީޓަރު ހަމަވާ ވަރަށް ފުން ކުރާނެ އެވެ. ހަމައެއާއެކު، ބަނދަރަށް ވަންނަ ނެރު ފުން ކުރަނީ މެދު ދިޔައިން ފެށިގެން 4- މީޓަރު ހަމަވާ ވަރަށެވެ.
މަޝްރޫއުގެ ދަށުން ކުރަން ހަމަޖެހިފައިވާ އިތުރު މަސައްކަތްތައް:
- 295 މީޓަރު ބޮޑު ހިލައިގެ ބޭރުތޮށި ޖެހުން
- 70 މީޓަރުގެ ރިވެޓްމަންޓް ޖެހުން
- 314 މީޓަރުގެ ސްކޯރިން އެޕްރޮން ޖެހުން
- 2 ނެވިގޭޝަން ލައިޓް ހަރުކުރުން
- 314 މީޓަރުގެ އެއްގަމު ތޮށި
- 10 މޫރިން ބޮއި ހަރުކުރުން
- ރޭމްޕް ހެދުން، (10m x 9m)
- 16 މަގު ބައްތި ހަރުކުރުން
- 1،556.61 އަކަ މީޓަރު ޕޭވްމަންޓް ހެދުން
ކުރިނބީ ބަނދަރު ހެދުމުގެ މަޝްރޫއުގެ އެއްބަސްވުމުގައި އެމްޓީސީސީގެ ފަރާތުން އެ ކުންފުނީގެ ސީއީއޯ އާދަމް އާޒިމް ސޮއިކުރެއްވިއިރު، ޕްލޭނިން މިނިސްޓްރީގެ ފަރާތުން ސޮއި ކުރެއްވީ ޕާމަނަންޓް ސެކްރެޓަރީ ޒީނިޔާ އަހްމަދު ހަމީދެވެ.
