ރައްޔިތުންގެ މަޖިލީހުގެ މެމްބަރުންގެ އަދަދު މިހާރު އޮތް ވަރުގައި ހިފަހެއްޓުމަށް ޓަކައި ގާނޫނު އަސާސީއަށް ބަދަލުގެންނަން ރައްޔިތުންގެ މަޖިލީހުގެ މާމިނގިލި ދާއިރާގެ މެމްބަރު އަދި ޖުމްހޫރީ ޕާޓީގެ ލީޑަރު ގާސިމް އިބްރާހީމް ހުށަހެޅުއްވި ބިލު އަނބުރާ ގެންގޮސް، ޕާޓީތަކާ މަޝްވަރާކުރަން، އެމްޑީޕީގެ ޕާލަމެންޓްރީ ގްރޫޕްގެ ލީޑަރު މުހައްމަދު އަސްލަމް މިއަދު ގޮވާލައްވައިފި އެވެ.
ގާނޫނު އަސާސީއަށް ބަދަލު ގެންނަން ގާސިމް ހުށަހެޅުއްވި ބިލަށް މަޖިލީހުގެ މިއަދުގެ ޖަލްސާގައި ކުރިއަށް ގެންދާ ބަހުސްގައި އަސްލަމް ވިދާޅުވީ ގާނޫނު އަސާސީއަށް ބަދަލެއް ގެނައުން ފަދަ ބޮޑު ބަދަލެއް އަންނަ އިރު ވީހާވެސް ފުޅާ ދާއިރާއެއްގައި މަޝްވަރާކުރަން ޖެހޭނެ ކަމަށެވެ.
ގާނޫނު އަސާސީއަށް ބަދަލު ގެނައުމުގެ މަސްއޫލިއްޔަތު އޮތީ މަޖިލީހަށް ކަމަށް ވިޔަސް، އެކަމުގައި ސިޔާސީ އެހެން ފަރާތްތަކާ ވެސް މަޝްވަރާކުރަން ޖެހޭނެ ކަމަށް އޭނާ ވިދާޅުވި އެވެ.
"އެހެން ކަމުން އަޅުގަނޑު އެދެނީ މި ބިލާ ދޭތެރޭގައި އިތުރަށް ވިސްނައި، އިތުރަށް މަޝްވަރާކުރެއްވުމަށް އިއްޒަތްތެރި މެމްބަރު މި ބިލު އަނބުރާ ގެންދެވުމަށް،" އަސްލަމް ވިދާޅުވި އެވެ.
އޭނާ ވިދާޅުވީ އިތުރުވާ ކޮންމެ 5،000 މީހުންގެ އާބާދީއަކަށް މެމްބަރަކު އިތުރުވާ ގޮތަށް [މިހާރު އޮތް ގޮތަށްް] ގާނޫނު އަސާސީގައި ކަނޑައެޅީ އާބާދީ ބޮޑު ތަންތަން، މަޖިލީހުގައި ތަމްސީލުވާ ވަރު ކުޑަކަމަށް ފެނިގެން ކަމަށެވެ.
"މާލޭގައި ވެސް ދެ މެމްބަރުން އައްޑޫގައި ވެސް ދެ މެމްބަރުން، މި ދެންނެވިހެން ބައެއް ކުދިކުދި އަތޮޅުގައި, އެއްހާސް ދެހާސް ހަމަނުވާ އަތޮޅު ތަކަށް ވެސް ދެ މެމްބަރުން، އެހެންވީމާ އެއީ އިންސާފެއް ނޫން ކަމަށް އެ މަޖިލީހަށް ފެނިގެން [މިހާރު އޮތް ގޮތަށް ކަނޑައެޅީ]،" އަސްލަމް ވިދާޅުވި އެވެ.
އަސްލަމް ވިދާޅުވި ގޮތުގައި ރައްޔިތުންގެ މަޖިލީހުގެ މެމްބަރުންގެ އަދަދު ވަކިވަރެއްގައި ހިފަހައްޓަން އޭނާ ދެކޮޅެއް ނޫނެވެ.
އެކަމަކު މިހާރު މެމްބަރުން ތިއްބެވި އަދަދު ކަމަށްވާ 87 އެެއީ ކިހިނެތް އައި އަދަދެއްކަން ވިސްނައިލަން ޖެހޭ ކަމަށާއި އެއީ އަދަދެއް ކަަމަށް ބަލައި އިދާރީ ދާއިރާތަކަށް އެެ އަދަދު ބަހާލީމާ ދިމާވާ މައްސަލަތަކަށް ހައްލެއް ހޯދަން ޖެހޭނެ ކަމަށް ވެސް އޭނާ ވިދާޅުވި އެވެ.
އެކަމުގައި ވިސްނަން ޖެހޭ އެހެން ގިނަ ކަންތައްތައް އެބަހުރި ކަމަށް ވެސް އަސްލަމް ވިދާޅުވި އެވެ.
