މިހާރު ކުރިއަށްދާ މައިލޯ ޓީ20 ޕްރިމިއާ ލީގު، ކްރިކެޓް މުބާރާތުގައި ކުޅުނު ތިން ވަނަ މެޗުން ވެސް މޮޅުވެ، މާލެ ވެޓަރަންސް އިން އެއް ވަަނައިގައި މަގާމު ދަމަހައްޓައިފި އެވެ.
ދިހަ ޓީމު ވާދަކުރާ މި މުބާރާތުގައި މިހާތަނަށް ކުޅުނު ތިން މެޗުން ވެސް މޮޅުވި ހަމައެކަނި ޓީމަކީ މާލެ ވެޓަރަންސް އެވެ. އެ ޓީމުން އެންމެ ފުރަތަމަ ދެ މެޗުން މޮޅުވީ ކޯމެޓްސް ކްރިކެޓް ކްލަބާއި އޮއްފު އެފްސީ އަތުންނެވެ. އިއްޔެ ކުޅުނު މެޗުން ވިޔަންސާ އަތުން މޮޅުވީ ތިން ވިކެޓުންނެވެ.
ކުޅިވަރު އެކުވެނި ދަނޑުގައި އިއްޔެ ކުޅުނު މެޗުގައި ޓޮސް ދިމާވުމުން މާލެ ވެޓަރަންސް އިން ނިންމީ ފީލްޑް ކުރުމަށެވެ. ވިޔަންސާ އިން ކުޅެން އަރައި 20 އޯވަރުގެ ތެރޭ 10 ވިކެޓަށް ހެދުނީ 114 ލަނޑެވެ. އެންމެ ރަނގަޅު ކުޅުމެއް ދެއްކީ 38 ލަނޑު ހެދި ވިޔަންސާގެ މުހައްމަދު ބާބުލް ހުސައިން އެވެ. އެ ޓީމުގެ ސައީދުލް އިސްލާމް ވެސް ވަނީ 17 ލަނޑު އެއްކޮށްފަ އެވެ.
ޖަވާބުގައި ކުޅެން އަރައި، މާލެ ވެޓަރަންސް އިން ވަނީ 18.2 އޯވަރުގެ ތެރޭގައި ހަތް ވިކެޓަށް 117 ލަނޑު ހަދައި، މެޗުން މޮޅުވެފަ އެވެ. މާލެ ވެޓަރަންސަށް އެންމެ ރަނގަޅު ކުޅުމެއް ދެއްކީ 40 ލަނޑު ހެދި، ލަންކާ ކުޅުންތެރިޔާ، ޖަނަކަ މަލިންގާ ވެޑަގޭ އެވެ.
ހުކުރު ދުވަހު ކުޅުނު މެޗުން 89 ލަނޑުން މާލެ ސްޕޯޓްސް ކްލަބް ބަލިކޮށް ސީބީއެލް ސްޕޯޓްސް ދެ ވަނައިގައި އޮތީ ކުޅުނު ދެ މެޗުން ވެސް މޮޅުވެގެންނެވެ. ހުކުރު ދުވަހު ކުޅުނު އަނެއް މެޗުން ނިއުސްޓާގެ މައްޗަށް 95 ލަނޑުން ކުރި ހޯދި މިލާން ކްރިކެޓް އެކެޑަމީ ތިން ވަނައިގައި އޮތްއިރު އެ ޓީމު ވެސް ވަނީ ފުރަތަމަ ދެ މެޗު ކާމިޔާބުކޮށްފަ އެވެ.
މުބާރާތުގައި އިއްޔެ ކުޅުނު އަނެއް މެޗުން ކޯމެޓްސްގެ މައްޗަށް އަށް ވިކެޓުން ކުރިހޯދައި އައިޒީ ވަނީ މުބާރާތުގައި އެ ޓީމުގެ ފުރަތަމަ މޮޅު ހޯދައިފަ އެވެ.
