ފޮޓޯތަކަށް ރަނގަޅަށް ބަލާލާށެވެ.
ހަގީގަތަކީ މިއެވެ؛ އެއީ ވިލިމާލޭ ފަރެވެ. އެ ފެންނަނީ ތިލަމާލޭ ބްރިޖުގެ މަސައްކަތުގައި އިންޑިއާގެ އެފްކޮން ކުންފުނިން ބޭނުންކުރާ ސެލްފް އެލެވޭޓިން ޕްލެޓްފޯމެއް އުރުމުން، އެ ފަރަށް ލިބުނު ގެއްލުމާއި އުފެދިފައިވާ 10 ފޫޓުގެ ފުން ވަޅުގަނޑުތަކެވެ.
އެންވަޔަރަމެންޓް ޕްރޮޓެކްޝްޝަން އެޖެންސީ (އީޕީއޭ)ގެ ޑިރެކްޓަ ޖެނެރަލް އިބްރާހިމް ނައީމް ވިދާޅުވީ ތިލަމާލޭ ބްރިޖުގެ މަސައްކަތް ކުރާ ޕްލެޓްފޯމު އުރުމުން ފަރަށް ލިބުނު ގެއްލުން ސާވޭކޮށް އިއްޔެ ނިންމާފައިވާ ކަމަށެވެ.
ފަރަށް ލިބިފައިވާ ގެއްލުންތަކުގެ ފޮޓޯތައް އީޕީއޭއިން އިއްޔެ ސޯޝަލް މީޑިއާއަށް ދޫކޮށްލި އެވެ. އޭގެތެރެއިން ފުން ވަޅުގަނޑެއްގެ ތެރޭގައި ފެންނަން އެ އޮތީ އީޕީއޭގެ ޑިރެކްޓަ ޖެނެރަލް ނައީމް އެވެ.
"ލިބިފައި ހުރި ގެއްލުންތައް ހުރީ ވަރަށް ފުންކޮށް. ފުން ހަތަރު ވަޅުގަނޑު އެބަހުރި. އޭގެ ތެރެއިން އެއް ވަޅުގަނޑަށް އެއްޗެހި އެޅި ހުރީ ބެދެން ގާތްވެފައި. ބައެއް ވަޅުގަނޑުތަކުގެ ފުން މިނުގައި 10 ފޫޓު އެބަ ހުރި،" ނައީމު ވިދާޅުވި އެވެ.
ޕްލެޓްފޯމް ވިލިމާލޭ ފަރަށް އުރިފައި. -- ފޮޓޯ: އަދަދު
އުރުނު ދަގަނޑު ޕްލެޓްފޯމް ފުން ކުރެވުނީ 12 ދުވަސް ފަހުން، އޯގަސްޓް 27 ވަނަ ދުވަހު އެވެ.
ޕްލެޓްފޯމު އުރިފައި ހުރިއިރު ރާޅުގެ ބާރުގައި ދެފަރާތަށް ތެޅުވުމުގެ ސަބަބުން، އޭގައި ހަރުކޮށްފައި ހުރި ގަދަނޑު ހޮޅިތައް ބިންދައިގެން ގޮސް ވެއްޓުނެވެ. ޕްލެޓުފޯމް ފުންކުރި ނަމަވެސް، އެ ހޮޅިތަކާއި ޕްލެޓުފޯމުން މޫދަށް އެޅުނު ތަކެތި ނަގައި ފަރު ސާފުކޮށް ނިންމީ މި މަހުގެ 4 ގަ އެވެ.
"ފަރުގައި އުފެދިފައިވާ ފުން ވަޅުގަނޑުތަކަކީ ޕްލެޓްފޯމުގެ ފައިކަށިތަކުން ޖެހިޖެހި ލިބިފައިވާ ގެއްލުން،" ނައީމު ވިދާޅުވި އެވެ.
އޭގެ އިތުރަށް ވެސް ފަރުގެ ބޮޑު ބަޔަކަށް ގެއްލުންވެފައިވާ ކަމަށް އޭނާ ވިދާޅުވި އެވެ.
ތިމާވެށި ރައްކާތެރި ކުރުމުގެ ގާނޫނުގެ ދަށުން ފަރަށް ލިބޭ ގެއްލުމުގެ ބަދަލުގެ ގޮތުގައި 100 މިލިއަން ރުފިޔާއާ ހަމައަށް ޖޫރިމަނާ ކުރެވޭނެ އެވެ.
