ރަށްރަށުން މާލެއަށް ހިޖުރަ ކުރުން މިހާރު ނުހުއްޓިގެން އުޅޭ މައިގަނޑު ސަބަބަކީ ރަށުގައި މުނިފޫހިފިލުވުމަށް ކުރާނޭ ކަމެއް ނެތުން ކަމަށް ގަބޫލުކުރައްވާ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ތޮއްޑޫ ދާއިރާގެ މެންބަރު އަހުމަދު ޝިޔާން ހުށަހެޅުއްވި މާލެ އާއި ރަށްރަށުގެ ކަރަންޓު ހިދުމަތް ބިލް ކުރުމުގައި ގެންގުޅޭ ތަފާތުތައް ނައްތާލުމަށް ހުށަހެޅި ގަރާރުގެ ބަހުސްގެ ތެރެއިން ނަޝީދު ވަނީ "މާލެ-ރާއްޖެތެރެ" ބަހުސް އަށް ވަދެވަޑައިގެން އެމަނިކުފާނުގެ ހިޔާލު ހިއްސާ ކުރައްވައިފަ އެވެ.
"ރަށްރަށުން [މާލެއަށް] މިހާރު ހިޖުރާކުރާ ސަބަބުތަކުގެ ތެރޭގައި އަޅުގަނޑަށް މިހާރު ފާހަގަވޭ މުނިފޫހިފިލުވުމާއި ރަށްރަށުގައި ކުރާނެ ކަމެއް ނެތުމާއި މި އާބަން ދިރިއުޅުމަށް މިހާރުގެ ޖީލުގެ މާ ބޮޑަށް ޝައުގުވެރިވާ ކަމަށް،" ނަޝީދު ވިދާޅުވި އެވެ.
ރަށްފުށުގެ ދިރިއުޅުމަށް މިހާރުގެ ޖީލުގެ ދިވެހިން ޝައުގުވެރިނުވާ ކަމަށް ވެސް ނަޝީދު ވިދާޅުވި އެވެ.
މި ސަރުކާރުން ރަށުގެ ސައިޒަށް ބެލުމެއް ނެތި، ހުރިހާ ރަށަކަށް ވެސް އާންމު ހިދުމަތްތައް ފޯރުކޮށްދެމުން ކަން ފާހަގަކޮށް ނަޝީދު ވިދާޅުވީ މިކަން މިގޮތަށް އޮތް އިރު ވެސް ހިޖުރަ ކުރާ މީހުންގެ އަދަދަށް ބަދަލު ނައުމަކީ ވިސްނާލަން ޖެހޭ ކަމެއް ކަމަށެވެ.
ނަޝީދު މިފަދައިން ވިދާޅުވި ނަމަވެސް ރާއްޖޭގެ ރަށްރަށުން އެންމެ ގިނަ ބަޔަކު މާލެއަށް ހިޖުރަ ކުރަނީ ތައުލީމު ހޯދުމަށް ކަމަށް ހައުސްހޯލްޑް އިންކަމް އެންޑް އެކްސްޕެންޑިޗާ ސާވޭގެ (ހަޔަސް) 2019ގެ ރިޕޯޓުން ދައްކަ އެވެ.
މި ރިޕޯޓުން ދައްކާ ގޮތުގައި މާލޭގައި ދިރިއުޅޭ އާބާދީގެ 48 ޕަސެންޓު މީހުންނަކީ ހިޖުރަ ކޮށްފައިވާ މީހުންނެވެ. މީގެ ތެރެއިން 34 ޕަސެންޓު މީހުން ތައުލީމު ހޯދުމަށް ހިޖުރަކުރިއިރު، 22 ޕަސެންޓު މީހުން ހިޖުރަކޮށްފައިވަނީ އާއިލާއާއެކުގަ އެވެ. އަދި، 12 ޕަސެންޓު މީހުން މާލެ ހިޖުރަ ކުރަނީ ވަޒީފާ ހޯދުމަށެވެ.
ތައުލީމު ހޯދުމަށް ހިޖުރަކުރި މީހުންގެ ތެރެއިން އެންމެ ގިނަ ބަޔަކު ހިޖުރަ ކޮށްފައިވަނީ މަތީ ތައުލީމު ހޯދުމަށް ކަމަށް ވެސް ހަޔަސްގެ ރިޕޯޓުން ދައްކަ އެވެ.
