އިންޑިއާގެ ކަނޑުގެ ސިފައިންނާއި އެމްއެންޑީއެފް ގުޅިގެން "އެކްސަސައިޒް އެކަތަ 2022"ގެ ނަމުގައި މިއަދު ފަރިތަކުރުންތަކެއް ފަށައިފި އެވެ.
އެމްއެންޑީއެފުން ބުނި ގޮތުގައި އެ ފަރިތަކުރުންތައް ކުރިއަށް ގެންދަނީ ސެންޓްރަލް އޭރިއާ ކޮމާންޑް ސަަރަހައްދުގަ އެވެ. އެ ހަރަކާތް ކުރިއަށް ގެންދާނީ އަންނަ އޮކްޓޫބަރު މަހުގެ ތިން ވަނަ ދުވަހާ ހަމައަށެވެ.
އެމްއެންޑީއެފުން ބުނީ ފަރިތަކުރުން ފެށުމުގެ ރަސްމިއްޔާތު ބޭއްވީ ސެންޓްރަލް އޭރިއާ ކޮމާންޑް ހެޑްކްއޯޓަރު ލ.ކައްދޫގައި ކަމަށެވެ.
އެ ރަސްމިއްޔާތު ޝަރަފުވެރިކޮށްދެއްވީ އެމްއެންޑީއެފް މެރިން ކޯގެ ޑައިރެކްޓަރު، ލެފްޓިނެންޓް ކާނަލް އިބްރާހީމް ނަވީން ޒުބައިރު އެވެ. އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ޑިފެންސް އެޑްވައިޒަރު ކެޕްޓަން މަހޭޝް ސީ. މޯޑްގިލްގެ ވެސް އެ ރަސްމިއްޔާތުގައި ބައިވެެރިވެވަޑައިގެންނެވި އެވެ. އެމްއެންޑީއެފް ސެންޓްރަލް އޭރިއާ ކޮމާންޑްގެ ޑެޕިއުޓީ ކޮމާންޑަރު ލެފްޓިނެންޓް ކާނަލް މުހައްމަދު ފަސީހު ވެސް އެ ރަސްމިއްޔާތުގައި ބައިވެރިވެވަޑައިގެންނެވި އެވެ.
އެމްއެންޑީއެފް މެރިން ކޯ ސްޕެޝަލް އޮޕަރޭޝަންސް ގުރޫޕްގެ 30 މެރީންސް އާއި އިންޑިއަން ނޭވީގެ 10 މެރިން ކޯމާންޑޯސް ބައިވެރިވާ އެ ފަރިތަކުރުންތަކުގައި އަމާޒަށް ބަޑިޖެހުމާއި އުޅަނދުފަހަރަށް އަރައި ބަލައި ފާސްކޮށް ހިފެހެއްޓުން ފަދަ ކަންތައްތައް ފަރިތަކުރާނެ އެވެ. އެމްއެންޑީއެފުން ބުނި ގޮތުގައި ޑިމޮލިޝަން، ސީކިއުބީ، ޑައިވޭޓަރް ޑައިވިން، ރީބްރީތަރް ޑައިވިންގެ އިތުރުން ޑައިވިން އޮޕަރޭޝަން ފަދަ ބައިތައް ވެސް އެ އެ ހަރަކާތުގައި ކުރިއަށް ގެންދާނެ އެވެ.
