ތަކުރާރުކޮށް އެކި ފަހަރުމަތިން ވައްކަމުގެ މައްސަލަތަކުގައި ހައްޔަރުކޮށްފައިވާ މީހަކު ފަނޑިޔާރެއްގެ ކުރިމައްޗަށް ހާޒިރުކޮށްގެން މެނުވީ ބަންދުން ދޫނުކުރަން ކްރިމިނަލް ކޯޓުން ފުލުހުންގެ މައްޗަށް އަމުރުކޮށްފި އެވެ.
ކްރިމިނަލް ކޯޓުން މި އަމުރު ކޮށްފައިވަނީ ސެންޓު ފުޅިއެއް ވަގަށް ނެގި ކަމަށް ތުހުމަތު ކުރެވޭ މީހެއްގެ ބަންދާ މެދު ގޮތެއް ނިންމުމަށް އިއްޔެ ކޯޓަށް ހާޒިރުކުރުމުންނެވެ. އޭނާގެ ބަންދަށް ވަނީ 30 ދުވަސް ޖަހައިފަ އެވެ.
ބަންދު އަމުރުގައި ފާހަގަކޮށްފައިވާ ގޮތުގައި އާންމު ގޮތެއްގައި ވައްކަމުގެ މިފަދަ މައްސަލަތަކަކީ ކުދި ކުށްތަކަށް ވެފައި ކޯޓުން އާންމުކޮށް އަމަލު ކުރަމުން އަންނަ އުސޫލަކީ ކުރު މުއްދަތެއްގައި ބަންދުގައި ބެހެއްޓުމެވެ.
މުއްދަތު ހަމަވުމުގެ ކުރިން މިފަދަ ބައެއް މީހުން ފުލުހުން ވެސް ދޫކޮށްލާ ކަމަށާއި އެހެންނަމަވެސް ބަންދުން ދޫކުރުން ތަކުރާރުކުރާނަމަ މުޖުތަމައުގެ ސަލާމަތަށް އެކަމުން ނުރައްކާ ވެދާނެ ކަމަށް ވެސް އަމުރުގައިވެ އެވެ.
މި މައްސަލައިގައި ހައްޔަރުކޮށްފައިވާ މީހާއަކީ ވައްކަމުގެ ރިކޯޑު އޮތް މީހެއް ކަން ފާހަގަކޮށް، ބަޔާނުގައި ވަނީ ފަނޑިޔާރެއްގެ ކުރިމައްޗަށް ހާޒިރުކޮށްގެން މެނުވީ އޭނާ ބަންދުން ދޫނުކުރަން ފުލުހުންގެ މައްޗަށް އަމުރުކޮށްފަ އެވެ.
