އިސްލާމް ދީނާ ދެކޮޅު އަމަލު ހިންގާ މީހުންނަށް ގާނޫނުލްއުގޫބާތުގައި ބަޔާންކޮށްފައިވާ ކުށުގެ އަދަބުގެ ދަރަޖަ ބޮޑު ކުރުމަށާއި އިތުރު ބައެއް އިސްލާހުތަކެއް މާމިގިލި ދާއިރާގެ މެންބަރު ގާސިމް އިބްރާހިމް ރައްޔިތުންގެ މަޖިލީހަށް ހުށަހަޅުއްވައިފި އެވެ.
އިސްލާމް ދީނާ ދެކޮޅު އަމަލު ހިންގުން ގާނޫނުލްއުގޫބާތުގައި ބަޔާންކޮށްފައިވަނީ ޖުނަހުގެ އެއްވަނަ ދަރަޖައިގެ ކުށެއްގެ ގޮތުގަ އެވެ.
ގާސިމް އިސްލާހު ހުށަހެޅުއްވީ މި ކުށް ޖިނާޔަތުގެ ދެ ވަނަ ދަރަޖައިގެ ކުށެއް ކަމުގައި ކަނޑައެޅުމަށެވެ. މިއީ 10 އަހަރުގެ ޖަލު ހުކުމެއް އަތުވެދާނެ ފަދަ ކުށެކެވެ.
އޭނާ ހުށަހެޅުއްވި ބިލުގައި ފާހަގަކޮށްފައިވާ ގޮތުގައި އިސްލާމީ ޝަރީއަތުގައި ހައްދު ކަނޑައެޅިފައިވާ ކުށެއް ކަމަށްވާ މުރުތައްދުވުން އިސްލާމީ ޝަރީއަތާ އެއްގޮތަށް ސާބިތުވާނަމަ، ދެވޭ ތައުޒީރީ އަދަބަކީ ޖުނަހުގެ ނުވަތަ ކުޑަ ކުށެއްގެ މިންގަނޑެއް ކަމުގައި އޮތުމަކީ އިސްލާމީ ޝަރީއަތަކަށް ކުރެވޭ ތައުހީނަކަށް ވެ އެވެ.
މި އިސްލާހުގެ އިތުރުން ގާސިމް ވަނީ ލިވާތު ކުރުމާއި ސިހާގުގެ ކުށަކީ ޖިނާއީ ބޮޑެތި ކުށްތަކުގެ ތެރޭގައި ހިމެނޭ ދެ ކުށް ކަމުގައި ކަނޑައެޅުމަށް ޖިނާއީ އިޖުރާއަތުގެ ގާނޫނަށް އިސްލާހު ގެނައުމަށް ވެސް ހުށަހަޅައިފަ އެވެ.
މިހާރު ގާނޫނު އޮތް ގޮތުން, ޖިނާއީ ބޮޑެތި ކުށްތައް ގޮތުގައި ކަނޑައަޅާފައިވަނީ 12 ކުށެކެވެ.
އެ އިސްލާހު ހުށަހަޅުއްވައި ގާސިމް ވިދާޅުވެފައިވަނީ އެ ދެ އަމަލަކީ އިސްލާމް ދީނުގައި ވަރަށް ބޮޑަށް ނަހީކުރައްވާފައިވާ ހުތުރު ފާހިޝް އަމަލެއް ކަމަށެވެ. އެހެންވެ, އެ ދެ ކުށަކީ ރާއްޖޭގައި ޖިނާއީ ބޮޑު ކުށެއް ކަމަށް ކަނޑައަޅާފައި އޮންނަން ޖެހޭ ކަމަށް ގަބޫލު ކުރައްވާ ކަމަށް އޭނާ ވިދާޅުވި އެވެ.
ގާސިމް ދެން އިސްލާހު ހުށަހަޅުއްވާފައިވަނީ ރައްޔިތުންގެ މަޖިލީހުގެ މެންބަރުންގެ އަދަދު, 87 ގައި ހިފަހައްޓައި އެއަށްވުރެ އެ އަދަދު ގިނަ ނުވާނެ ގޮތް ހެދުމަށް ގާނޫނު އަސާސީއަށް އިސްލާހު ގެނައުމަށެވެ.
ގާނޫނުއަސާސީގެ 71 ވަނަ މާއްދާގައި މިހާރު ބުނެފައިވާ ގޮތުގައި ދިވެހިރާއްޖޭގެ ކޮންމެ އިދާރީ ދާއިރާއެއްގައި ރަޖިސްޓަރީކުރެވިފައިވާ އާބާދީގެ ފުރަތަމަ ފަސްހާސް މީހަކަށް ނުވަތަ ފަސްހާސް މީހުން ހަމަނުވާ ކޮންމެ އިދާރީ ދާއިރާއަކަށް ދެ މެންބަރުން ތިބެންޖެހޭނެ އެވެ.
އަދި, އިދާރީ ދާއިރާއެއްގައި ރަޖިސްޓަރީކުރެވިފައިވާ އާބާދީ ފަސްހާހަށްވުރެ އިތުރުވާނަމަ، އާބާދީގެ ފުރަތަމަ ފަސްހާސް މީހުންނަށްވުރެ އިތުރުވާ ކޮންމެ ފަސްހާސް މީހަކަށް މެންބަރެއް ހުންނަން ޖެހޭނެ އެވެ.
ގާސިމް, އިސްލާހު ހުށަހަޅުއްވާފައިވަނީ މި މާއްދާ ބަދަލުކުރުމަށެވެ. އެގޮތުން އޭނާގެ ހުށަހެޅުމަކީ, ރައްޔިތުންގެ މަޖިލީހުގެ މެންބަރުންގެ އަދަދަކީ 87 ކަމަށް އެ މާއްދާގައި ބަޔާން ކުރުމެވެ. އަދި, 87 އިންތިހާބީ ދާއިރާ ކަނޑައެޅުމަށްފަހު, އެއިން ކޮންމެ އިންތިހާބީ ދާއިރާއަކުން އެއް މެންބަރަކު އިންތިހާބު ކުރުމެވެ.
