ދުނިޔޭގައި ވެސް ފުރަތަަމަ ފަހަރަށް ހުސް އަންހެނުން އެކުލެވޭ އެކުއަނޯޓުގެ ޓީމާއެކު މޫސުމީ ބަދަލުތަކުން ރާއްޖެ ސަލާމަތް ކުރުމުގެ މަސައްކަތް ފަށަން ތައްޔާރުވެއްޖެ އެވެ.
މި މިޝަންއަކީ އިނގިރޭސިވިލާތުގެ މެރިން ރިސާޗު އިންސްޓިޓިއުޓެއް ކަމުގައިވާ ނެކްޓަންއާއި ދިވެހި ސަރުކާރުން ގުޅިގެން ކުރިއަށް ގެންދާ ހަރަކާތެކެވެ. މި ހަރަކާތް ފަށަނީ ސެޕްޓެމްބަރު މަހުގެ ހަތަރުވަނަ ދުވަހުގަ އެވެ.
ދިހަ ސައިންސްވެރިން ހިމެނޭ ބައިނަލްއަގްވާމީ ޓީމާއެކު ރާއްޖޭގެ ފުން ކަނޑުތައް ދިރާސާކުރުމަށް ހަމަޖެހިފައިވާ ނެކްޓަން މިޝަންގައި ދިވެހި ދެ އަންހެނުން ބައިވެރިވާނެ އެވެ.
މީގައި ބައިވެރިވާ ދިވެހިންގެ ޓީމު ލީޑް ކުރާނީ މޯލްޑިވްސް މެރިން ރިސާޗު އިންސްޓިޓިއުޓްގެ ޑިރެކްޓަރު ޖެނެރަލް ޝާފިޔާ ނައީމެވެ. އޭނާއާއެކު ނެކްޓަން މޯލްޑިވްސްގެ ރިސާޗު އެސިސްޓަންޓެއް ކަމުގައިވާ ފަރާހް އަމްޖަދު ބައިވެރިވާނެ އެވެ. ދެން ބައިވެރިވާނީ ސަބްމާސިބަލްގެ ޕައިލަޓް ކިމްލީ ޑޯ އެވެ.
ޝާފިޔާ ނައީމް ވިދާޅުވީ މި ސަބްމާސިބަލް ޑައިވްތަކުގެ ބޭނުމަކީ ކަނޑުގައިވާ ދިރުންތަކާ ގުޅޭ ގޮތުން އިތުރަށް މައުލޫމާތު ހޯދުން ކަމަށެވެ. އަދި މި މައުލޫމާތުގެ އަލީގައި މި ވެއްޓާ އޭގައިވާ ދިރުންތައް ފުރިހަމަ ގޮތުގައި ހިމާޔަތް ކުރަން ޖެހޭ ކަންކަން ދެނެގަނެވޭނެ ކަމަށް ވެސް އޭނާ ވިދާޅުވި އެވެ.
"އަޅުގަނޑުމެންގެ ކަނޑުތަކުގައި 40 ވައްތަރުގެ މިޔަރާއި 18 ވައްތަރުގެ މަޑި ފުޑްޗެއިންގެ އެންމެ މަތީގައި އެބަ އުޅޭ، މި މިޝަންއާއެކު ފުރަތަމަ ފަަހަރަށް ފުނުގައި މި ދިރުންތައް އާލާވެފައިވާ މިންވަރު ދެނެގަނެވޭނެ. މިއީ ކަނޑުތަކުގެ ހާލަތު ދެނެގަތުމަށް ހޯދިގެންދާނެ ވަރަށް މުހިންމު މައުލޫމާތެއް،" ޝާފިޔާ ވިދާޅުވި އެވެ.
ނެކްޓަންގެ ޕްރިންސިޕަލް ސައިންޓިސްޓް އަދި ޔުނިވާސިޓީ އޮފް އޮކްސްފޯޑްގެ ބަޔޮލޮޖިސްޓްއެއް ކަމަށްވާ ލޫސީ ވުޑާލް ވިދާޅުވީ އުތުރު އިންޑިއާ ކަނޑުގެ އަޑީގައިވާ ފަރުބަދަތައް ކައިރިން 1000 މީޓަރު އަޑިއަށް ފީނާނެ ކަމަށެވެ.
"މިޝަންގެ ހައިލަޓަކަށް ވެގެން ދާނީ މި ފަރުބަދަތައް ކައިރިން 1000 މީޓަރު އަޑިއަށް ފީނައި އެ ތަންތަން މެޕްކޮށް ޑޮކިއުމަންޓް ކުރެވިގެން ދިއުން، މި ޑިސެންޓްތަކުގައި މި ފަރުބަދަތައް ކައިރިން ވަަރުގަދަ އޮއިވަރު ހުންނާނެ ކަމަށް ބެލެވޭ، އެ އޮޔާއާ ހެދި ޑައިވްތައް ކުރުން އުނދަގޫ ވެސް ވެދާނެ،" އޭނާ ވިދާޅުވި އެވެ.
ދުނިޔޭގައި 1000 މީޓަރަށް ވުރެ އުހުގައި ކަނޑުގެ 100،000 ފަރުބަދަ ހުރެ އެވެ. ރާއްޖޭގައި މީގެ 34 ފަރުބަދަ ހުރެ އެވެ. މިއީ ރާއްޖޭގައި ކަނޑުމަސް އާލާވާ މުހިންމު ތަންތަނެވެ.
މި މިޝަންއާއެކު ރާއްޖޭގައި އިންސާނުން ގޮވައިގެން ފުންކަނޑަށްދާ އެންމެ ފަހުގެ ދެ ސަބްމާސިބަލް އަދި ރޮބޮޓިކް ސިސްޓަމްތައް ބޭނުން ކުރެވިދާނެ އެވެ.
މި މިޝަންގައި ޖުމުލަ 40 ޕާޓްނަރުން ބައިވެރިވެ އެވެ. އެއީ ދިވެހި 16 ޕާޓްނަރުންނާއި، ބައިނަލްއަގްވާމީ 24 ޕާޓްނަރެކެވެ.
