އިންޑަސްޓްރިއަލް އައިލެންޑް ތިލަފުއްޓާއި ވިލިމާލެ އާއި ވެރިކަން ކުރާ ރަށް މާލެ ގުޅުވާލުމަށް ބްރިޖު އެޅުމުގެ މަސައްކަތުގައި ބޭނުންކުރަނިކޮށް ވިލިމާލޭ ފަރަށް އެރި ޕްލެޓްފޯމު މިއަދު ނަގައިފި އެވެ.
ޕްލޭނިން މިނިސްޓްރީން މިއަދު 'އަދަދު'އަށް ބުނީ އެ ޕްލެޓްފޯމު ނަގާފައި ވަނީ މިއަދު މެންދުރުގެ ވަގުތެއްގައި ކަމަށެވެ. ޕްލެޓްފޯމު އެތަނުން ނަގާފައި މިވަނީ ފަރަށް އެރިތާ 12 ދުވަސް ފަހުންނެވެ.
ބްރިޖުގެ މަސައްކަތް ކުރަމުންދާ އެފްކޯންސްގެ ފަރާތުން އަންގާރަ ދުވަހު ނެރުނު ބަޔާނެއްގައި ބުނީ އޯގަސްޓު 16، ގައި ފަރަށް އެރި އެ ޕްލެޓްފޯމް 48 ގަޑިއިރުގެ ތެރޭގައި ނަގާނެ ކަމަށެވެ. ނަމަވެސް ބުރާސްފަތި ދުވަހު ނެރުނު ކުރު ބަޔާނެއްގައި އެ ކުންފުނިން ބުނީ މޫސުން ގޯސްވުމުގެ ސަބަބުން ޕްލެޓްފޯމް ނެގުމުގެ މަސައްކަތް ހުއްޓާލަން ޖެހުނީ ކަމަށެވެ.
ވިލިމާލެ ފަރަށް އެރި ޕްލެޓްފޯމް ނެގުން ލަސްވެގެން ތިމާވެއްޓާ ގުޅޭ ޖަމިއްޔާތަކުން ވަނީ އެކަން ކުށްވެރިކޮށްފަ އެވެ. އަދި އެ ޕްލެޓްފޯމް ފަރަށް އަރާފައި އޮންނަ ކޮންމެ ދުވަހަކު ވެސް ފަރަށް ވަރަށް ބޮޑެތި ގެއްލުންތަކެއް ލިބޭނެ ކަމަށް ޖަމިއްޔާތަކުން ބުނެފައިވެ އެވެ.
ޕްލެޓްފޯމް ނެގުން ލަސްވެގެން އެ މައްސަލަ އިދިކޮޅު ފަރާތްތަކުން ވަނީ ރައްޔިތުންގެ މަޖިލީހަށް ވެސް ވައްދައިފަ އެވެ. އެ މައްސަލަ މަޖިލީހަށް ހުށަހެޅުއްވީ ވިލިމާލޭ ދާއިރާގެ މެމްބަރު އަހުމަދު އުޝާމެވެ.
ޕްލޭނިން މިނިސްޓްރީން އެ މައްސަލައިގައި ބުނެފައި ވަނީ ޕްލެޓްފޯމް އޮޔާދިޔުމަށް މެދުވެރިވީ ނަގިއްޔަށް ދިމާވި ޓެކްނިކަލް މައްސަލައަކުން ކަމަށެވެ.
މާލެ-ތިލަފުށި ބްރިޖް މަޝްރޫއަކީ މިހާތަނަށް އެންމެ ބޮޑު ހޭދައެއްކޮށްގެން ސަރުކާރުން ހިންގާ ޕްރޮޖެކްޓެވެ. މުޅި ޕްރޮޖެކްޓަށް 7.7 ބިލިއަން ރުފިޔާ ހަރަދުވާނެ ކަމަށް ބެލެވެ އެވެ. އެ ޕްރޮޖެކްޓަށް ހަރަދުކުރަނީ އިންޑިއާ އެގްޒިމް ބޭންކު މެދުވެރިކޮށް ހަމަޖައްސާފައިވާ 400 މިލިއަން ޑޮލަރުގެ ކްރެޑިޓް ފެސިލިޓީގެ ތެރެއިންނާއި އިންޑިއާ ސަރުކާރުން ދޭ 100 މިލިއަން ޑޮލަރުގެ ހިލޭ އެހީންނެވެ.
