ރާއްޖޭގައި ޓެކްސީތަކެއްގައި ޑޭޝް ކެމެރާ ހަރުކޮށްފައި ހުންނަން ޖެހޭ ގޮތަށް ޓްރާންސްޕޯޓް މިނިސްޓްރީން ޓެކްސީގެ ގަވައިދު ބަދަލުކޮށްފި އެވެ.
އެ މިނިސްޓްރީން އިއްޔެ ގެޒެޓްކުރި ގަވައިދުގައި ބުނާ ގޮތުން ޓެކްސީގެ ހިދުމަތްދޭ ހުރިހާ ވަގުތެއްގައި ޑޭޝް ކެމެރާއިން ރެކޯޑްކޮށް އެ ރެކޯޑިން، މަދުވެގެން ހަތް ދުވަހަށް ބަހައްޓަންޖެހޭނެ އެވެ.
މިކަމާ ގުޅިގެން ޑްރައިވާސް އެސޯސިއޭޝަންގެ ރައީސް އަބްދުﷲ އިބްރާހިމް "އަދަދު" އަށް ވިދާޅުވީ ކެމެރާ ހަރުކުރަން ގަވައިދުގައި ލިޔުނަސް ވަކި ބަދަލެއް ނާންނާނެ ކަމަށެވެ.
ޓެކްސީގެ ގަވައިދުން ޓެކްސީގެ މިންގަނޑުތަކަށް ގެނައި ބަދަލުގައި ބުނެފައިވާ ގޮތުން ކޮންމެ ޓެކްސީ ކާރެއްގައި ވެސް ދަތުރުތަކުގެ އަގު ލިސްޓު ފެންނަ ގޮތަށް ބަހައްޓަންޖެހެ އެވެ.
އަދި ޓެކްސީ ކާރުތައް އެއާކަންޑިޝަން ކޮށްފައި ހުރުމަކީ ވެސް ޝަރުތެކެވެ. ދިމާވާ މައްސަލައެއްގެ ސަބަބުން އެއާކަންޑިޝަން މަސައްކަތް ނުކުރާ ނަމަ އެކަން ފަސިންޖަރުންނަށް ކުރިން އެންގުމާއި އެފަދަ ހާލަތެއްގައި، ވައި ދައުރުވާ ގޮތަށް ޓެކްސީގެ ދޮރުތައް ހުޅުވާފައި ބެހެއްޓުމަށް ގަވައިދުގައިވެ އެވެ.
މީގެ އިތުރުން އޭގައި ބުނެފައިވާ ގޮތުންނަމަ ކޮންމެ ޓެކްސީ ސެންޓަރެއްގައި މަދުވުވެގެން 100 ޓެކްސީ ޑްރައިވަރުންނާއި 100 ޓެކްސީ އޮންނަން ޖެހޭނެ އެވެ.
އަބްދުﷲ ވިދާޅުވީ މި ބަދަލަކީ ޓެކްސީ އެސޯސިއޭޝަނުން އެދިގެން މިނިސްޓްރީން ގެނެސްފައިވާ ބަދަލެއް ކަމަށެވެ.
"އަޅުގަނޑުމެން އެ ބަދަލު ގެނެސްދިނުމަށް އެދުނީ، ކޮންމެ ދެ މީހަކު ވެގެން އެބަ ހަދާ ޓެކްސީ ސެންޓަރެއް. ކޮންމެ ސެންޓަރެއްގަ މި ތިބެނީ މަދު މީހަކު. އެހެންވެ އަޅުގަނޑުމެން އަމިއްލައަށް އެދުނީ 100 ހަމަކުރަން ކޮންމެ ސެންޓަރަކަށް،" އޭނާ ވިދާޅުވި އެވެ.
ކޮންމެ ސެންޓަރެއްގައި މިހާރުވެސް 100 އަށްވުރެ ގިނަ ޑްރައިވަރުންނާއި ޓެކްސީން ރަޖިސްޓާ ވެފައި ތިބި ކަމަށާއި ނަމަވެސް އަލަަށް ފެށި ދެ ތަނެއްގައި ތިބީ 60 ވަރަކަށް މީހުން ކަމަށް އަބްދުﷲ ވިދާޅުވި އެވެ. ނަމަވެސް މި ބަދަލާއެކު އެ ތަންތަނުން ވެސް އަދަދު ހަމަކުރާނެ ކަމަށް އޭނާ ވިދާޅުވި އެވެ.
ޓެކްސީގެ ގަވައިދަށް ބަދަލުތަކެއް ގެނެސްފައި މި ވަނީ މާލޭގައި މިނީ ބަހުގެ ހިދުމަތް ދިނުމަށް ފަހުގެ ތައްޔާރީތައް ވަމުން އަންނަނިކޮށެވެ.
އެކަމާ ގުޅިގެން ވާހަކަ ދައްކަވަމުން އަބްދުﷲ ވިދާޅުވީ މިނީ ބަހުގެ ހިދުމަތް ދޭން ފެށުމުން ޓެކްސީ ޑްރައިވަރުންނަށް ލިބޭ އާމްދަނީއަށް އަސަރުކުރާނެ ކަމަށާއި އެއީ މާލޭގައި ދަތުރު ކުރުމަށް އެޅޭ ހުރަހަކަށްވެސް ވާނެ ކަމަށް އޭނާ ވިދާޅުވި އެވެ.
ދުނިޔޭގެ ތެލުގެ ބާޒާރަށް އައި ބަދަލާ ގުޅިގެން ޓެކްސީ ޑްރައިވަރުން އެދުމުން މިހާރު ވަނީ ޓެކްސީ ތަކުގެ އަގުތައްވެސް ބޮޑުކޮށްފަ އެވެ.
