މި ހަފްތާ ބަންދުގައި ފެށި ރާއްޖޭގެ ޓީ20 ޕްރިމިއާ ލީގުގެ ފުރަތަމަ ހަތަރު މެޗު ނިމިގެންދިޔައިރު، މުބާރާތުގައި ވާދަކުރާ ވަރުގަދަ ޓީމުތަކުން ވަނީ ފެށުން ރަނގަޅުކޮށްފި އެވެ.
ޖުމްލަ 10 ޓީމުގެ މެދުގައި ކުރިއަށްދާ ޓީ20 ޕްރިމިއާ ލީގުގައި ފުރަތަމަ ހަތަރު މޮޅު ހޯދި ޓީމުތަކަކީ މާލެ ވެޓަރަންސް، ވިޔަންސާ، މާލެ ސްޕޯޓްސް ކްލަބް އަދި މިލާން ކްރިކެޓް އެކެޑަމީ އެވެ.
ފުރަަތަމަ މެޗުގައި ހުކުރު ދުވަހު ހެނދުނު މާލެ ވެޓަރަންސް ނުކުތީ ކޯމެޓްސް ސްޕޯޓްސް ކްލަބާ ދެކޮޅަށެވެ. ކޯމެޓްސް އަށް ޓޮސް ދިމާވުމުން އެ ޓީމުން ނިންމީ ބެޓް ކުރުމަށެވެ. އެ ޓީމުން ވަނީ 20 އޯވަރުގެ ތެރޭގައި ފަސް ވިކެޓަށް 105 ލަނޑު ހަދައިފަ އެވެ. ޖަވާބުގައި ކުޅެން އަރައި 13 އޯވަރުގެ ތެރޭގައި 108 ލަނޑު ހަދައި، މާލެ ވެޓަރަންސް މޮޅުވީ 10 ވިކެޓުންނެވެ.
ދެ ވަނަ މެޗުގައި ވިޔަންސާ އިން އޮއްފު އެފްސީ ބަލިކުރީ 26 ލަނޑުންނެވެ. ވިޔަންސާ އިން ޓޮސް ދިމާވުމުން ބެޓް ކުރަން އަރަައި 20 އޯވަރު ތެރޭގައި ނުވަ ކުޅުންތެރިން ނުބައިވެގެން 157 ލަނޑު ހެދި އެވެ. ޖަވާބުގައި އޮއްފުން ކުޅެން އަރައި 19.5 އޯވަރު ތެރޭގައި ހުރިހާ ކުޅުންތެރިން ނުބައިވެގެން ހެދުނީ 131 ލަނޑެވެ.
މުބާރާތުގެ ތިން ވަނަ މެޗުގައި ވެސް ޓޮސް ދިމާވި ޓީމުން ނިންމީ ބެޓް ކުރުމަށެވެ. އެ ގޮތުން މާލެ ސްޕޯޓްސް ކްލަބުން ޓޮސް ދިމާވުމުން ބެޓް ކުރަން އަރައި، 20 އޯވަރުގެ ތެރޭގައި ތިން ކުޅުންތެރިން ނުބައިވެގެން 206 ލަނޑު ހެދި އެވެ. ޖަވާބުގައި ކުޅެން އަރައި، ވެސްޓް ސްޕޯޓްސް ކްލަބަށް 18.5 އޯވަރުގެ ތެރޭގައި ނުވަ ކުޅުންތެރިން ނުބައިވެގެން އެއް ކުރެވުނީ 82 ލަނޑެވެ. މާލެ ސްޕޯޓްސް ކްލަބް މޮޅުވީ 124 ލަނޑުންނެވެ.
އިއްޔެ ހަވީރު ކުޅުނު މެޗުގައި އައިޒީއާ ދެކޮޅަށް ނުކުމެ މިލާން ކްރިކެޓް އެކެޑަމީން ޓޮސް ދިމާވެގެން ނިންމީ ބެޓް ކުރުމަށެވެ. މިލާނުން ކުޅެން އަރައި، 20 އޯވަރުގެ ތެރޭގައި ތިން ވިކެޓަށް ވަނީ 173 ލަނޑު ހަދައިފަ އެވެ. އެ ޓީމުން އެންމެ ރަނގަޅަށް ކުުޅުނީ 55 ލަނޑު ހެދި މުހައްމަދު އައްޒާމާއި 37 ލަނޑު ހެދި އަހުމަދު ހަސަން އެވެ. ޖަވާބުގައި އައިޒީން ކުޅެން އަރައި، 20 އޯވަރުގެ ތެރޭގައި ހަތް ވިކެޓަށް އެއް ކުރެވުނީ 134 ލަނޑެވެ.
ހަފްތާ ބަންދުގައި މުބާރާތުގެ މެޗުތައް ކުޅޭއިރު، ދެން އެންމެ އަވަހަށް މެޗުތައް އޮތީ އަންނަ މަހުގެ ދެ ވަނަ ދުވަހު އެވެ. އެ ދުވަހު ހެނދުނު ސީބީއެލް އާއި ނިއު ސްޓާ ކުޅޭއިރު، އެ ދުވަހު ހަވީރު މާލެ ވެޓެރަންސް އާއި އޮއްފު ވާދަކުރާނެ އެވެ. އަންނަ މަހުގެ ތިން ވަނަ ދުވަހު ހެނދުނު ކޯމެޓްސް އާއި ވެސްޓް ސްޕޯޓްސް ބައްދަލުކުރާއިރު، އެ ދުވަހު ހަވީރު ވިޔަންސާ ކުޅެނީ އައިޒީއާ އެވެ.
ޓީ20 ޕްރިމިއާ ލީގުގެ ފޯމެޓް ރޭވިފައި އޮތް ގޮތަށް ބަލާއިރު، ފުރަތަމަ ކުޅޭ ލީގު ބުރުން އެއް ވަނަ އަށް ޗެމްޕިއަންކަން ލިބޭއިރު، ގަދަ ހަތަރެއް ކޮލިފައިވަނީ ޓީ20 ޕްރެޒިޑެންޓްސް ކަޕަށެވެ. މިއީ ރާއްޖޭގެ އެހެން ކުޅިވަރުތަކުގައި ވެސް މުބާރާތްތައް ގެންދާ ފޯމެޓެކެވެ.
މީގެ ހަތް މަސް ކުރިން ކްރިކެޓް ބޯޑުން ކުރިއަށް ގެންދިޔަ ޓީ20 ކްރިކެޓް ލީގާއި ޓީ20 ޕްރިމިއާ ޗެމްޕިއަންޝިޕްގެ ތަށި އުފުލާލީ މާލޭ ވެޓެރަންސް އިންނެވެ.
