ޕީޕީއެމްގެ ވެރިކަމުގައި ޗައިނާއާއެކު ބޭއްވި ގާތް ގުޅުން ދިފާއު ކުރައްވައި، އަވައްޓެރި ވަކި ގައުމަކަށް ބަރޯސާވުން ނިމުމަކަށް ގެންނަން ޖެހޭ ކަމަށް ވިދާޅުވެ، ކުރީގެ ރައީސް އަބްދުﷲ ޔާމީން އަބްދުލްގައްޔޫމް ރޭ އިންޑިއާއަށް ނުސީދާކޮށް ރައްދު ދެއްވައިފި އެވެ.
އިދިކޮޅު ޕާޓީގެ ގޮތުގައި ޕީޕީއެމް/ޕީއެންސީން އެންމެ ގަދައަށް އަޑުއުފުލަނީ މި ސަރުކާރުން އިންޑިއާއާއެކު އޮންނަ ގުޅުމާ ދޭތެރޭގަ އެވެ. އެކަމާ ދެކޮޅަށް ޔާމީން އިސްވެ ހުންނަވައި "އިންޑިއާ އައުޓް"ގެ ނަމުގައި ވަރުގަދަ ކެމްޕެއިނެއް ވެސް އަންނަނީ ހިންގަމުންނެވެ.
"އެހެންނަމަވެސް ވަކި އަވައްޓެރިއަކު އެއީ ހުރިހާ ކަމެއް ކޮށްދޭ އެންމެ ބޮޑުބޭބެ ކަމަށް ދެކޭ ދެކުމަށް އެބަ ޖެހޭ ނިމުމަކަށް އަންނަން،" އިންޑިއާއާއެކު އޮންނަ ގުޅުމަށް ފާޑު ވިދާޅުވެ، އެމަނިކުފާނަށް ރިޔާސީ ޓިކެޓު އެރުވުމަށް ރޭ ކާނިވަލުގައި ބޭއްވި ޖަލްސާގައި ޔާމީން ވިދާޅުވި އެވެ.
"ހަވާލޭ ވަތަން" ނަމުގައި އިދިކޮޅުން ބޭއްވި ޖަލްސާއަށް ހާޒިރުވި ގިނަ އަދަދެއްގެ މީހުންނާ މުހާތަބު ކުރައްވައި ޔާމީން ވިދާޅުވީ ދައުލަތުން ދަރާފައި އޮތް ދަރަނީގެ ބޮޑު ބައި އޮތީ އެއް ގައުމަކަށް ނަމަ، އެ ދައުލަތެއް އެ ވަނީ "އަޅުވެތިވެފަ" އެވެ.
"ބަރޯސާއެއް ނޫން، މިއަދު [އިންޑިއާއަށް] އަޅުވެތި ވީ. މިއަދު މިތިބީ އަޅުވެތި ވެފައި. މި ވާހަކަ ދައްކަވާނެ ސިޔާސީ ލީޑަރަކު ނެތީމާ ހިތަށް އަރާ ސުވާލަކީ އަމިއްލަފުޅަށް އަޅުވެތިވެގެން ތިބި ސަބަބު ބަލާލަން އެބަ ޖެހޭ،" ޔާމީން ވިދާޅުވި އެވެ.
ޔާމީން ދެން އިޝާރާތް ކުރެއްވީ އެމަނިކުފާނުގެ ވެރިކަމުގައި ޗައިނާއާއެކު އޮތް ގުޅުމަށް އެއިރުގެ އިދިކޮޅުން އަމާޒުކުރި ފާޑުކިޔުންތަކަށެވެ. އެމަނިކުފާނުގެ ސަރުކާރުން ޗައިނާއާއެކު ބޭއްވި ގުޅުމުގެ ސަބަބުން "ދައުލަތުން ނުއުފުލޭ ވަރުގެ އެއްވެސް ތަކުލީފެއް" ޖެހިފައިނުވާނެ ކަމަށް ޔާމީން ވިދާޅުވި އެވެ.
"ޗައިނާގެ އެކި ކަންކަމަށް ދީފައި އޮތް 19 ރަށް ނުވަތަ 20 ރަށް ކޮބައިތޯ؟ ކޮބައިތޯ ޗައިނާ ސަރުކާރަށް އަޅުގަނޑުމެން ދަރާފައި އޮތް އަދާނުކުރެވޭވަރުގެ ދަރަނި؟،" ޗައިނާއާއެކު އޮތް ގުޅުން ދިފާއުކުރައްވައި ޔާމީން ވިދާޅުވި އެވެ.
ރާއްޖޭގައި އިސްލާހީ ގިނަ މަސައްކަތްތަކެއް ކުރަން ޖެހޭ ކަމަށް ވިދާޅުވެ ޔާމީން ވިދާޅުވީ އެންމެ ފުރަތަމަ މަސައްކަތް ކުރަން ޖެހެނީ ރާއްޖޭގެ ސިޔާދަތާއި މިނިވަންކަމަށްޓ ކުރަން ޖެހޭ މަސައްކަތްތައް ކަމަށެވެ.
"އަޅުގަނޑުމެންގެ ސިޔާދަތާއި މިނިވަންކަމަށް އަރައިގަންނަ އަދި އަޅުގަނޑުމެންގެ ގުދުރަތީ ވަސީލަތްތަކަށް ހަރުމުދާތައް ގެއްލޭ ގޮތަށް ކޮމްޕްރޮމައިޒްވާ ގޮތަށް ހަދާފައި އެގްރީމެންޓުތައް ރާއްޖޭގެ ވުޖޫދުން ފުހެލަން އެބަ ޖެހޭ، ކެންސަލް ކުރަން ޖެހޭ، ބާތިލް ކުރަން ޖެހޭ،" އިންޑިއާއާއެކު މި ސަރުކާރުން ވެފައިވާ އެގްރީމެންޓުތަކަށް އިޝާރާތް ކުރައްވައި އެމަނިކުފާނު ވިދާޅުވި އެވެ.
ޔާމީންގެ އަދި އިދިކޮޅުން ކުރައްވާ އެ ތުހުމަތުތަކަށް ރައްދު ދެމުން ސަރުކާރުން ކުރިން ބުނެފައި ވަނީ ރާއްޖޭގެ މިނިވަންކަމަށް ބުރޫއަރާ އެއްވެސް މާއްދާއެއް އަދި ކަމެއް ނަމަވެސް އެގްރިމެންޓުތަކުގައި ނުހިމެނޭ ކަމަށެވެ.
ރޭގެ ޖަލްސާގައި ވާހަކަ ދައްކަވަމުން ޔާމީން އިތުރަށް ވިދާޅުވީ އަވައްޓެރި ވަކި ގައުމަކަށް ބަރޯސާ ނުވެ، އިސްލާމީ އުސޫލުތައް ކޮމްޕްރޮމައިޒް ނުވާ ފަދަ ހާރިޖީ ސިޔާސަތެއް ގާއިމްކޮށްދެއްވާނެ ކަމަށް ވެސް ޔާމީން ވިދާޅުވި އެވެ.
"އަޅުގަނޑުމެންގެ ހާރިޖީ ސިޔާސަތު އަނެއްކާ ވެސް ބިނާވެގެންދާނީ އެކުވެރިންނާއެކީ އެކުވެރިކަން، އިހުތިރާމް ކުރާ މީހުންނަށް އިހުތިރާމް ދިނުމާ އެކީ އިސްތިގުލާލަށް ލޯބިކުރާ އިސްތިގުލާލަށް އިހުތިރާމް ކުރާ ހުރިހާ ފަރާތްތަކާ އެކީ އަޅުގަނޑުމެން ގާތް ގުޅުމެއް ދެމި އޮންނާނެ، އަވައްޓެރިންނާއެކު އަޅުގަނޑުމެން ގުޅުން އަބަދުވެސް އޮންނާނެ،" ޔާމީން ވިދާޅުވި އެވެ.
ރޭ ޔާމީން ޕީޕީއެމްގެ ސަޕޯޓަރުންނާ މުހާތަބު ކުރެއްވީ އަނެއްކާ ވެސް ރިޔާސީ ކެންޑިޑޭޓެއްގެ ހައިސިއްޔަތުންނެވެ. އިންތިހާބުގައި ވާދަ ކުރެއްވުމަށް ގާނޫނީ ގޮތުން އެމަނިކުފާނަށް އެއްވެސް ހުރަހެއް ނެތް ނަމަ އަނެއްކޮޅުން ނިކުންނަވާނީ މިހާރު ވެރިކަން ކުރާ މޯލްޑިވިއަން ޑިމޮކްރެޓިކް ޕާޓީގެ ކެންޑިޑޭޓެވެ. އެމްޑީޕީގެ ޕްރައިމެރީގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ އިތުރުން ކުރީގެ ރައީސް މުހައްމަދު ނަޝީދު ވާދަ ކުރައްވާނެ ކަމަށް ބެލެވެ އެވެ.
