މި ސަރުކާރުން ރާއްޖޭގެ ދަރަނި ރެކޯޑު މިންވަރަކަށް އުފުލާލިއިރު އިގުތިސޯދު ދުޅަހެޔޮކޮށް އާރާސްތުކުރަން އެއްވެސް މަސައްކަތެއް ނުކުރާ ކަމަށް ވިދާޅުވެ ސަރުކާރުގެ އިގުތިސޯދީ ސިޔާސަތަށް ކުރީގެ ރައީސް އަބްދުﷲ ޔާމީން މިރޭ ވަރަށް ބޮޑަށް ފާޑުވިދާޅުވެއްޖެ އެވެ.
މިރޭ ކާނިވާ ސަރަހައްދުގައި ބޭއްވި ހާއްސަ ޖަލްސާގައި، އަންނަ އަހަރު އޮންނަ ރިޔާސީ އިންތިހާބުގައި ވާދަކުރަން އިދިކޮޅު ޕީޕީއެމް/ޕީއެންސީ ކޯލިޝަނުގެ ރިޔާސީ ޓިކެޓާ ހަވާލުވެވަޑައިގަތުމަށްފަހު ޔާމީން ދެއްކެވި ވާހަކަފުޅުގައި އިގުތިސޯދީ ހާލަތާއި ދަރަންޏާ ގުޅުވާ ވިދާޅުވީ އެންމެ ބޮޑު ކަންބޮޑުވުމަކީ ދަރަނިވެރިކަން އިތުރުވެފައިވާ މިންވަރު ކަމަށެވެ.
އެގޮތުން ވާލްޑް ބޭންކުގެ ރިޕޯޓަކާ ހަވާލާ ދެއްވައި ޔާމީން ވިދާޅުވީ ރާއްޖޭގެ ޖުމްލަ ދަރަނި ހުރީ 6،000 މިލިއަން ޑޮލަރުގައި ކަމަށެވެ. މިއީ އާބާދީގެ ކޮންމެ ބޮލަކަށް 250،000ރ. ކަމަށް ފާހަގަކުރައްވަމުން ޔާމީން ވަނީ އެ މަނިކުފާނުގެ ސަރުކާރުގައި ލޯނު ނަގައިގެން މަޝްރޫއުތައް ހިންގުމުން ފާޑުވިދާޅުވި މި ސަރުކާރުގެ ބޭފުޅުންނަށް ރައްދު ދެއްވާފަ އެވެ.
ޔާމީން ވިދާޅުވީ ގޮތަށް ވާލްޑް ބޭންކުން އެންމެ ފަހުން ނެރުނު މޯލްޑިވްސް އެކްސްޕެންޑިޗާ ރިވިއުގައިވާ ގޮތުގައި ގެރެންޓީ ދީފައިވާ ދަރަނި ހިމަނައިގެން ދައުލަތުގެ ޖުމްލަ ދަރަންޏަކީ 6.1 ބިލިއަން ޑޮލަރެވެ. އޭގެ ތެރެއިން 5.2 ބިލިއަން ޑޮލަރަކީ ސީދާ ސަރުކާރުގެ ދަރަންޏެވެ.
ރާއްޖޭގެ އިގުތިސޯދު މި ހާލަތުގައި އޮތްއިރު، ޔާމީން ވިދާޅުވީ މި ދަރަނި އަދާކުރާ ވަރަށް ރިޒާވުގައި ފައިސާ ނެތް ކަމަށެވެ. މިހާރު ބޭނުންކުރެވޭ ރިޒާވުގައި ހުރި ކަމަށް އެ މަނިކުފާނަށް އަންދާޒާ ކުރެވޭ ވަރު ހިއްސާކުރައްވަމުން ޔާމީން ވިދާޅުވި ގޮތުގައި މިހާރު ރިޒާވުގައި ހުރީ އެންމެ 280 މިލިއަން ޑޮލަރެވެ.
އަދި ދަރަނި އަދާކުރާނީ މި ސަރުކާރުން ނޫން ކަމަށް ވިދާޅުވަމުން، މިފަހުން އިންޑިއާއިން ނެގި 100 މިލިއަން ޑޮލަރުގެ ލޯނާ ގުޅުވާ ވިދާޅުވީ މި ސަރުކާރު ހިފަހައްޓަނީ އަދި "މި ސަރުކާރު ނޭވާލަމުން ދަނީ ޖިޒީ ދައްކަން ޖެހޭ، ރިސަސިޓޭޓް" ކުރަނީ އެގޮތަށް ލިބޭ ފައިސާއިން ކަމަށެވެ.
"އެމްއެމްއޭއިން ނެޓް ރިޒާވް ނޫނީ އަތްލެވޭ ފައިސާ ޝާއިއުކުރުން ހުއްޓާލައިފި، ގްރޮސް ރިޒާވަކީ ދައުލަތުގެ ފައިސާއެއް ނޫން. ދައުލަތުގެ ނެޓް ރިޒާވް މިހާރު ހުރީ 280 މިލިއަން ޑޮލަރު،" ޔާމީން ވިދާޅުވި އެވެ.
ދަރަންޏާ ގުޅުވައި، ޔާމީން ސަރުކާރަށް އަމާޒުކުރެއްވި އަނެއް ފާޑުކިޔުމަކީ ދައުލަތުގެ މުދާ ރަހުނުކޮށްގެން ސުކޫކް ވިއްކުމެވެ. މިއީ ދަރަނި ނުދެއްކިއްޖެ ހާލަތެއްގައި އަތުން ދޫވެގެން ދާނެ ތަންތަން ކަން ފާހަގަކުރައްވަމުން ޔާމީން ވިދާޅުވީ މި ސަރުކާރުން ވަނީ ދަރުމަވަންތަ ހޮސްޕިޓަލުގެ އިތުރުން ސްކޫލްތައް ވެސް ރަހުނުކޮށްފައި ކަމަށެވެ.
"ފައިސާ ނުދެއްކެންޏާ މިއީ ޝައްކެއްވެސް ނެތް ގޮތެއް، ފުރަ މާލޭގައި މިހުރި ޕްރޮޕަޓީތަކަށް މުސްތަގިއްލު ކަމެއް ނެތް. އެހެރީ ވިޔަފާރީގެ އެއްބަސްވުންތައް" ޔާމީން ވިދާޅުވި އެވެ.
ޔާމީން އެ އިޝާރާތްކުރެއްވީ މި ސަރުކާރުން ދަރުމަވަންތާ ސްކޫލާއި އޮލިމްޕަސް ފަދަ ތަންތަން ރަހުނުކޮށްގެން ސުކޫކް ވިއްކި މައްސަލައަށެވެ. މިއީ ޔާމީންގެ ސަރުކާރުގައި ވިއްކީ ޔޫރޯބޮންޑުގެ ފައިސާ އަދާކުރަން މި ސަރުކާރުން ވިއްކި ސުކޫކެކެވެ.
"މި ސަރުކާރު ނޫއިގުތިސޯދު މިއޮތީ ހަގީގަތުގައި ވެސް ނޫފައިގެންފައި،" ޔާމީން ވިދާޅުވި އެވެ.
