ދަކަންދޫ ކުއްޔަށް ދޭން ބ. އަތޮޅު ކައުންސިލުން ނުރުހޭ؛ އެދުނީ ބާކީ ހުރި ރަށްތައް ވެސް ހަވާލުކުރަން

ބ. އަތޮޅުގައި އެއްވެސް ބަޔަކާ ހަވާލުނުކޮށް މިހާރު އޮތް ހަމައެކަނި ރަށް ކަމުގައި ދަކަންދޫ ވަރުވާއަށް ނުވަތަ ކުއްޔަށް ދޭން ބޭނުންވެގެން ފިޝަރީޒް މިނިސްޓްރީން އެދުމުން، އެ ރަށް އެއްވެސް ބަޔަކަށް ކުއްޔަށް ދޭން ނުފެންނަ ކަމަށް އެ އަތޮޅު ކައުންސިލުން ނިންމައިފި އެވެ.

މި ރަށް ބަޔަކަށް ދިނުމާ މެދު އަތޮޅު ކައުންސިލުގެ މަޝްވަރާ ހޯދުމަކީ މިހާރު އަމަލުކުރަމުންދާ ލާމަރުކަޒީ ގާނޫނުގެ ދަށުން ކޮންމެހެން ކުރަންޖެހޭ ކަމެކެވެ.

އެގޮތުން, އަތޮޅު ކައުންސިލް ނިސްބަތްވާ އިދާރީ ދާއިރާގެ ތެރޭގައި ހިމެނޭ އެންމެހައި ފަޅުރަށްތަކާއި، ފަޅުތައް ސަރުކާރުގެ އެއްވެސް އިދާރާއަކުން ބޭނުންކުރަންވާނީ ނުވަތަ ތަރައްގީކުރަންވާނީ ނުވަތަ އެހެން ފަރާތަކަށް ކުއްޔަށް ނުވަތަ ވަރުވާއަށް ދޫކުރަންވާނީ އަތޮޅު ކައުންސިލާ މަޝްވަރާކުރުމަށް ފަހުގައި ކަމަށް އެ ގާނޫނުގައި ބަޔާންކޮށްފައިވެ އެވެ.

މިގޮތުގެ މަތީން ފިޝަރީޒް މިނިސްޓްރީން ފޮނުވި ސިޓީއާ މެދެ މެދު ގޮތެއް ނިންމަން އިއްޔެ ބޭއްވި ކައުންސިލް ޖަލްސާގައި ހުށަހެޅުމުން، އެ ޖަލްސާގައި ބައިވެރިވި ހުރިހާ މެމްބަރުންގެ އިއްތިފާގުން ފާސްވީ އެ ރަށް ކުއްޔަށް ދޭން ނުފެންނަ ކަމަށް މިނިސްޓްރީގައި ދަންނަވާށެވެ.

ބ. އަތޮޅުގެ ރަށްތައް

• ޖުމްލަ 82 ރަށް
• މީހުން ދިރިއުޅެނީ 13 ރަށުގައި
• ރިސޯޓު - 16 ރަށް
• ރިސޯޓު ތަރައްގީކުރުމަށް - 17 ރަށް
• ދަނޑުވެރިކަން ކުރުމަށް - 5 ރަށް
• އެކުއަކަލްޗާއަށް - 1 ރަށް
• ހިމާޔަތްކޮށްފައިވާ - 10 ރަށް

ކައުންސިލުގެ މި ނިންމުމާ ގުޅިގެން ނެރުނު ނޫސް ބަޔާނުގައި ދަކަންދޫ ނުދޭން ނިންމި މައިގަނޑު ސަބަބުގެ ގޮތުގައި ބަޔާންކުރީ އެ ރަށަކީ މިހާރު އެއްވެސް ފަރާތަކަށް ހަވާލުނުކުރެވި އޮތް ފަޅުރަށް ކަމުން، އަތޮޅު ކައުންސިލް ނޫން އެހެން އެއްވެސް ފަރާތަކާ އެ ރަށް ހަވާލުކޮށްފިނަމަ އެ އަތޮޅު ރައްޔިތުން ޕިކްނިކް ދިއުން ފަދަ ބޭނުންތަކުން މަހުރޫމު ވާނެތީ އެވެ.

މީގެ ކުރިން ވެސް ބ. އަތޮޅު ކައުންސިލުން ވަނީ މިގޮތަށް ދޫކޮށްފައި ހުރި ރަށްތަކުން އެ އަތޮޅުގެ ރައްޔިތުންނަށް އެކަށީގެންވާ މަންފާ ނުލިބޭ މައްސަލައިގައި ކަންބޮޑުވުން ފާޅުކޮށްފަ އެވެ.

އެ ކަންބޮޑުވުންތައް ތަކުރާރުކުރަމުން ދަކަންދޫ މައްސަލައިގައި އަތޮޅު ކައުންސިލުން ބުނީ މިހެން ހުންނަ ރަށްތަކުން މާލީ މަންފާއެއް ނުލިބޭ ތަނުގައި އެ ރަށްރަށުގައި ކުއްޔަށް ދޫކުރި ބޭނުން ފިޔަވާ އެހެން ކަންކަން ކުރަމުންދާ ކަމަށެވެ.

މިއީ ގާނޫނާ ހިލާފު ކަމަކަށްވީ ނަމަވެސް، އެކަންކަން ހުއްޓުވަން ފިޝަރީޒް މިނިސްޓްރީ ނުކުޅެދިފައިވާ ކަމަށް ވެސް ބަޔާނުގައި ބުންޏެވެ. އަދި ބަޔާން ނިންމާލަމުން، މިހެން ގާނޫނާ ހިލާފަށް ބޭނުންކުރަމުންދާ ރަށްރަށުގެ އެއްބަސްވުންތައް ބާތިލުކޮށް އެ ރަށްތައް އަތޮޅު ކައުންސިލާ ހަވާލުކުރަން އެދިފައިވެ އެވެ.

ސަރުކާރުގެ ވެބްސައިޓު އައިލްސްގައި ހުރި މައުލޫމާތުން ދައްކާ ގޮތުގައި ޖުމްލަ 82 ރަށް އޮންނަ ބ. އަތޮޅުގައި މީހުން ދިރުއުޅެނީ އެންމެ 13 ރަށުގަ އެވެ. ބާކީ ހުރި ރަށްތަކުގެ ތެރެއިން ތިމާވެށީގެ ގޮތުން ހާއްސަވާތީ ހިމާޔަތްކޮށްފައިވާ 10 ރަށަކާއި ރަށު ކައުންސިލްތަކާ ހަވާލުކޮށްފައިވާ މަދު ރަށެއް ފިޔަވާ އެހެން ހުރިހާ ރަށެއް ކަހަލަ ގޮތަކަށް ބޭނުންކުރަނީ ޓޫރިޒަމާއި ދަނޑުވެރިކަން ފަދަ ސިނާއީ ބޭނުންތަކަށެވެ.