ރާއްޖޭގައި ހިންގާ ބިން ހިއްކުމުގެ ބޮޑެތި މަޝްރޫއުތައް ނިންމުމުގެ ގާބިލްކަން އޮތް ހަމައެކަނި ދިވެހި ކުންފުންޏަކީ އެމްޓީސީސީ ކަމަށް ޕްލޭނިން މިނިސްޓަރު މުހައްމަދު އަސްލަމް މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ތުލުސްދޫ ދާއިރާގެ މެންބަރު އިބްރާހިމް ނަސީމް ވަނީ ބިން ހިއްކުމަށް ހަވާލުކުރެވެނީ ހަމައެކަނި އެމްޓީސީސީއަށްތޯއާއި އެކަން ކުރެވޭ ވަރުގެ ގާބިލްކަން ހުރި ޕްރައިވެޓް ކުންފުނިތައް ނެތީތޯ ސުވާލުކުރައްވާފަ އެވެ.
"މިވަގުތު ރާއްޖޭގައި ބިން ހިއްކުމުގެ ގާބިލްކަން އޮތް ހަމައެކަނި ކުންފުންޏަކީ އެމްޓީސީސީ، އެހެންވިމާ އެ ނޫން ފަރާތަކަށް މަސައްކަތް ހަވާލުކޮށްގެން، އަޅުގަނޑަކަށް ގަބޫލެއް ނުކުރެވޭ ޑްރެޖިން އެންޑް ރެކްލެމޭޝަން ޒާތުގެ މަސައްކަތް މީހުން އެވަރުގެ އިންވެސްޓްމެންޓަކަށް ހިނގައިދާނެ ކަމަކަށް،" އެ ސުވާލަށް ޖަވާބު ދެއްވަމުން އަސްލަމް ވިދާޅުވި އެވެ.
އަސްލަމް ވިދާޅުވި ގޮތުގައި ބިން ހިއްކާ ބައެއް ޕްރައިވެޓް ކުންފުނިތައް އުޅުނު ނަމަވެސް "ލާޖް ސްކޭލް" ބިން ހިއްކުމުގެ މަސައްކަތް ކުރިއަށް ގެންދެވޭ ވަރުގެ ގާބިލް ކުންފުންޏެއް އެމްޓީސީސީ ނޫނީ ނެތެވެ.
މިއަދުގެ ޖަލްސާގައި ގިނަ މެންބަރުން ވަނީ އެ ދާއިރާތަކުގެ ބިން ހިއްކުމުގެ މަޝްރޫއުތަކުގެ އަޕްޑޭޓުތަކާ ގުޅޭ ގޮތުން ސުވާލުކުރައްވާފަ އެވެ. މި ސުވާލުތަކަށް ޖަވާބު ދެއްވަމުން މިނިސްޓަރު ވިދާޅުވީ އެމްޓީސީސީން މިހާރު ވެސް އަންނަނީ 21 ރަށެއްގެ ބިން ހިއްކުމުގެ މަސައްކަތް ކުރަމުންދާ ކަމަށެވެ.
އެމްޓީސީސީގެ ގާބިލްކަން އިތުރުކުރުމުގެ ގޮތުން އެ ކުންފުނިން މި ފަހުން ވަނީ އަލަށް ދެ ޑްރެޖަރު ގަނެފަ އެވެ. މި ދެ ޑްރެޖަރަކީ އެމްޓީސީސީން މިހާރު ހިންގާ އުމްރާނީ ތަރައްގީގެ މަޝްރޫއުތައް އިތުރުކުރުމުގެ މަގުސަދުގައި އެ ކުންފުނިން ގަނެފައިވާ ދެ ޑްރެޖަރެވެ. މިހާރު އެ ކުންފުނީގައި އޮންނަނީ 2017 ގައި ބޭނުންކުރަން ފެށި "މަހާ ޖައްރާފު" އެކަންޏެވެ.
މިހުރިހާ ޑްރެޖަރެއް ކޮމިޝަން ކުރެވި ބިން ހިއްކަން ފެށުމުން އެމްޓީސީސީގެ ޑްރެޖަރު ފްލީޓު ތިނަކަށް ބޮޑުވީ އެވެ. މިއާ އެކީ މިހާރު ވެސް ބިން ހިއްކުމުގެ ގިނަ މަޝްރޫއުތަކެއް ހިންގަމުން އަންނަ އަދި ހިންގަން ހަވާލުކުރެވިފައިވާ އެމްޓީސީސީގެ މަސައްކަތުގެ ދުވެލި ހަލުވިވާނެ ކަަމަށް އެ ކުންފުނިން ބުނެ އެވެ.
