ރައްޔިތުންގެ މަޖިލީހުގެ މިއަހަރުގެ ފަހު ދައުރުގެ ފުރަތަމަ ޖަލްސާގައި ޕްލޭނިން މިނިސްޓަރު މުހައްމަދު އަސްލަމް އާ ސުވާލުކުރަން އެޖެންޑާކޮށްފި އެވެ.
މަޖިލީހުގެ ގަވައިދުގައި ބުނާ ގޮތުން މަޖިލީހުގެ ޖަލްސާތައް އަހަރެއްގެ ތެރޭގައި ބެހިގެންދާނީ ތިން ދައުރަކަށެވެ. އެންމެ ފަހުން ގަވައިދަށް ގެނައި އިސްލާހާއެކު ތިންވަނަ ދައުރު ހިނގާނީ އޯގަސްޓު މަހުގެ 16 ވަނަ ދުވަހުން ފެށިގެން ނޮވެމްބަރު މަހުގެ ނިޔަލަށެވެ.
ފަހު ދައުރުގެ ފުރަތަމަ ޖަލްސާ މާދަމާއަށް ތާވަލްކޮށް އެޖެންޑާ މިހާރު އާންމުކޮށްފައިވާއިރު، މިނިސްޓަރު އަސްލަމް މަޖިލީހަށް ހާޒިރުކުރަނީ ރ. އުނގޫފާރު ބިން ހިއްކުމާ ގުޅޭ ގޮތުން އުނގޫފާރު ދާއިރާގެ މެންބަރު މުހައްމަދު ވަހީދު ކުރައްވާ ސުވާލަކަށް ޖަވާބު ދެއްވުމަށެވެ.
މިނިސްޓަރު އަސްލަމަކީ މަޖިލީހުގެ މިދިޔަ ދައުރުގައި ވެސް އެންމެ ގިނައިން ތަޅުމަށް ހާޒިރުކުރި ވަޒީރެވެ.
ސުވާލުކުރުމުގެ އިތުރުން މާދަމާގެ ޖަލްސާއަށް ދެން އެޖެންޑާކޮށްފައި އޮތީ ހަ ގައުމެއްގެ ނޮން ރެޒިޑެންޓް ސަފީރުކަމަށް ބޭފުޅަކު އައްޔަން ކުރުމަށް ރައީސް އިބްރާހިމް މުހައްމަދު ސޯލިހު ފޮނުއްވާފައިވާ މައްސަލަ ދާއިމީ ކޮމިޓީއަށް ފޮނުވުމެވެ.
މީގެ އިތުރުން ކޮމިޓީތަކުން ވެސް ބައެއް ކަންކަން ތަޅުމަށް ހުށަހެޅުމަށް ވަނީ ހަމަޖެހިފަ އެވެ. ކޮމިޓީތަކުން ހުށަހެޅުމަށް ހަމަޖެހިފައިވާ މައްސަލަތަކަކީ:
- އެމެރިކާއަށް އައްޔަންކުރާ ސަފީރާމެދު ރުހުން ހޯދުމަށް ހާރިޖީ ކޮމިޓީއަށް ފޮނުވި މައްސަލަ
- މެލޭޝިއާއަށް އައްޔަންކުރާ ސަފީރާމެދު ރުހުން ހޯދުމަށް ހާރިޖީ ކޮމިޓީއަށް ފޮނުވި މައްސަލަ
- އިންޑިއާއަށް އައްޔަންކުރާ ސަފީރާމެދު ރުހުން ހޯދުމަށް ހާރިޖީ ކޮމިޓީއަށް ފޮނުވި މައްސަލަ
މަޖިލީހުގެ ފަހު ދައުރަށް ސަރުކާރުގެ ފަރާތުން 30 ބިލެއް ފޮނުވުމަށް ނިންމާފައިވާ ކަމަށް އެޓާނީ ޖެނެރަލްގެ އޮފީހުން މިއަދު ވަނީ ބުނެފަ އެވެ.
