ދުވާލުގެ އަލިކަމުގައި މާލޭގެ މަގަކުން ހިނގާފައި ދިޔަ އަންހެނެއްގެ ކަރުގައި އޮތް ފަށެއް ފޭރިގަންނަ މަންޒަރު ފެންނަ ވީޑިއޯއެެއް ސޯޝަލް މީޑިއާގައި އާއްމުކުރިތާ އެތައް ގަޑިއިރެއްވީ އިރު ވެސް ތުހުމަތުވާ މީހުން ހައްޔަރު ނުކުރާތީ ފުލުހުންނަށް ފާޑުކިއުން އަމާޒުވެއްޖެ އެވެ.
ސޯޝަލް މީޑިއާގައި ދައުރުވާ ވީޑިއޯއިން ފެންނަ ގޮތުގައި މަޑުމަޑުން ހިނގާލާފައި ދިޔަ އަންހެން މީހާގެ ކަރުގައި އޮތް ފަށެއް ފޭރިގަތީ ސައިކަލެއްގައި އައި ދެ މީހެއްގެ ތެރެއިން ފަހަތުގައި އިން މީހާ އެވެ. އެ ދެ މީހުންގެ މޫނު ވެސް ސާފުކޮށް ފެނެ އެވެ.
ޓްވިޓާގައި އެ ވީޑިއޯ ހިއްސާކުރި ފަރާތުން ބުނެފައިވާ ގޮތުގައި ފޭރިގަނެފައި ވަނީ ރަން ފަށެކެވެ.
ވީޑިއޯ ހިއްސާކުރި ޓްވީޓަށް ކޮމެންޓް ކުރި ބައެއް މީހުން ބުނެފައި ވަނީ ސައިކަލުގެ ނަމްބަރާއި ދުއްވަން އިން މީހާ ވެސް އެ މީހުންނަށް އެނގޭ ކަމަށެވެ. އެހެން ބުނެ ކޮމެންޓްކުރި މީހުންގެ ކޮމެންޓްގައި އެ މީހުން ތުހުމަތުކުރާ މީހާގެ ނަން ވެސް ޖަހާފައި ވެ އެވެ.
"ސައިކަލް ނަމްބަރު، މޫނު، އެއޮތީ ފެންނަން ފުލުހުން ތިހެން ނުހައްދަވާ، މިކަހަލަ މީހުން ހައްޔަރުކޮށްފައި އެކަން އާއްމުންނަށް ހާމަކުރައްވާ،" ވީޑިއޯ އަށް ކޮމެންޓް ކުރި މީހަކު ލިޔެފައި ވެ އެވެ.
އެހެން މީހަކު ބުނީ މަގުފޭރޭ މީހުންނަށް ދީނުގައި އޮންނަ އެންމެ ބޮޑު އަދަބު ދޭން ޖެހޭ ކަމަށެވެ.
ފުލުހުން ބުނީ މާލޭގެ މަގުމަތިން ހިނގާފައި ދިޔަ އަންހެނެއްގެ ކަރުގައި އޮތް ރަން ފަށެއް ސައިކަލެއްގައި ދިޔަ ދެމީހަކު ފޭރިގަނެފައިވާ ކަމަށް މިއަދު 10:08 ގައި ފުލުހުންނަށް ރިޕޯޓްކޮށްފައިވާ ކަމަށެވެ.
"އެ މައްސަލައާ ގުޅިގެން މިހައިތަނަށް މީހަކު ހައްޔަރުކޮށްފައެއް ނުވޭ. ފުލުހުން އަންނަނީ މައްސަލަ ތަހުގީގުކުރަމުން،" ފުލުހުންގެ މީޑިއާ އޮފިޝަލަކު ވިދާޅުވި އެވެ.
މީހުންގެ ކަރުގައި އަޅައިގެން ތިބޭ ފަށާއި ގިލަފަތި ފަދަ ގަހަނާ ފޭރުމަކީ ފޭރުން ފަދަ ކުށްތައް ހައްދުފަހައަޅާފައިވާ މިންވަރު ދަށްކައިދޭ މިންގަނޑެއްގެ ގޮތުގައި އިހުގައި ބަލާ ކަމެކެވެ. އެ ހިސާބަށް ދިޔައިމާ ކިޔާނީ "ކަރުގިލަ ފޭރޭ ހިސާބަށް" ކަންތައް ހިނގައްޖެ ކަމަށެވެ.
