"ދުނިޔޭގެ އެކި ގައުމުތަކުގެ ވަރަށް ގިނަ މުބާރާތްތަކަށް ދެވިއްޖެ. ދެރަވެގެން ރޮވެމުން އެނބުރި ދާން ޖެހެނީ މަދު ފަހަރެއްގައި. ރާއްޖެއިން ދިން މެހުމާންދާރީ ވަރަށް ފުރިހަމަ. ދުވަހަކުވެސް ހަނދާން ނުނެތޭނެ، އަންނަ އަހަރުވެސް އެނބުރި އަންނާނަން، ރާއްޖެ މަތިން ހަނދާން ނުނެތޭނެ"
މިއީ ޗެމްޕިއަން ޓްރޮފީއާ އެކު ރޮމުން ދުނިޔޭގެ އަންހެން ޗެމްޕިއަންކަން ހަތަރު ފަހަރު ހޯދާފައިވާ ބްރެޒިލްގެ އިޒަބެލާ ސޫސާ ބުނި ވާހަކަ އެވެ. މޯލްޑިވްސް ޕްރޯގެ ޗެމްޕިއަން ޓްރޯފީ އެއް އަތުގައި އޮތް އިރު އަނެއް އަތުން އޭނާ ދިޔައީ ފޯދެމުން ދިޔަ ކަރުންތައް ފޮހެމުންނެވެ.
ދުނިޔޭގެ ބޮޑީބޯޑިންގެ އެންމެ ބޮޑު މުބާރާތުގެ އެއް ލެގު ރާއްޖޭގައި މި މަހުގެ ކުރީކޮޅު ވަނީ ބާއްވައިފަ އެވެ. "ވިޒިޓް މޯލްޑިވްސް ޕްރޯ 2022" އަށް ދުނިޔޭގެ ބޮޑީބޯޑިންގެ އެންމެ މަތީ ފަންތީގެ އެތުލީޓުން ރާއްޖެ އައެވެ.
ދުނިޔޭގެ ޗެމްޕިއަންކަން އެތައް ފަހަރަކު ހޯދާފައިވާ އަންހެން ޗެމްޕިއަނުންނާއި ފިރިހެން ޗެމްޕިއަނުން އައިބީސީ ވޯލްޑް ޓުއާގެ އެންމެ ވަރުގަދަ އެއް މުބާރާތުގައި މާލޭގައި ރާޅާ އެޅި އެވެ.
އޭޝިއާ ސަރަހައްދުގައި ބޭއްވި އައިބީސީގެ ފުރަތަމަ އިވެންޓު ނިންމާލިއިރު، އެންމެ ބޮޑަށް ފާހަގަވީ ދުނިޔޭގެ ޗެމްޕިއަނުން "އުފަލުގެ ކަރުނައާ އެކު" ކުރަމުންދިޔަ ތައުރީފުތަކެވެ. އެއީ މުބާރާތުގެ ފުރިހަމަކަމާއި މުބާރާތުގެ ފެންވަރާއި ދިވެހި އެތުލީޓުންނާއި ސަޕޯޓަރުންގެ ފަރާތުން ލިބުނު ލޯތްބާއި މެހުމާންދާރީ އަށެވެ.
މުބާރާތުގެ އިނާމް ދިނުމުގެ ރަސްމިއްޔާތުގައި އެންމެ ބޮޑަށް ފާހަގަވީ ތައްޓާ އެކު ޗެމްޕިއަނުންގެ އަސަރުން ފުރިފައިވާ ވާހަކަތަކެވެ. ކުޑަ ދުވަސްކޮޅެއްގެ ތެރޭގައި އެމީހުންނަށް ރާއްޖެ ހާއްސަ ވެއްޖެ އެވެ. ރާއްޖޭގެ ބޮޑީބޯޑިން އާއިލާ އާއި ވަރުގަދަ ގުޅުމެއް އުފެދިއްޖެ އެވެ. މިގައުމުގެ ރާޅުތަކުގައި އުދުހިލާފައި ދާ ހިތެއް ނުވި އެވެ.
ވިޒިޓް މޯލްޑިވްސް ޕްރޯގެ އިނާމް ދިނުމުގެ ރަސްމިއްޔާތަށްފަހު ހުރިހާ ބައިވެރިން ފޮޓޯއަކަށް ހުއްޓިގެން/ ފޮޓޯ: އަދަދު - މުހައްމަދު ޝާބިން
"އަހަރެން ދުވަހަކުވެސް މިގައުމު މަތިން ހަނދާން ނުނެތޭނެ. މި އެކުވެރިން، މި އެންމެން، މި މުބާރާތުގެ ހުރިހާ ކަމެއް ވެސް. ވަރަށް އުފާވޭ އާދެވުނީތީ. އަންނަ އަހަރު އަންނާނީ ބައިވަރު އެކުވެރިން ގޮވައިގެން" ދުނިޔޭގެ ޗެމްޕިއަންކަން ފަސް ފަހަރު ހޯދާފައިވާ ބްރެޒިލްގެ ނޭމަރާ ބުންޏެވެ.
ދުނިޔޭގެ ބޮޑީބޯޑިންގެ މައި ޖަމިއްޔާ (އައިބީސީ) އިން ރާއްޖޭގައި މުބާރާތް ބާއްވަން ފުރުސަތު ދިނީ ވަރަށް ގިނަ ކަންކަމަށް ބެލުމަށް ފަހުގަ އެވެ. އެހެން ނަމަވެސް, އައިބީސީ އިން ވެސް ހީނުކުރާ ވަރުގެ ތަރުހީބެއް ލިބުމުން އެމީހުން ތިބީ އިތުރު ގިނަ މުބާރާތްތަކެއް ރާއްޖޭގައި ބޭއްވުމަށް ބޭނުންވެފަ އެވެ.
"އަހަރުމެން ބޮޑީބޯޑިން ފުޅާކުރަން ބައެއް ފަހަރު އަލަށް ގައުމުތަކަށް ފުރުސަތުދެން މުބާރާތް ބާއްވަން. އެކަމަކު ގިނަ ފަހަރު ބޭނުންވާ ފެންވަރަށް މުބާރާތް ނުބޭއްވޭ. ރާއްޖެއިން އަހަރުމެން އަޖައިބު ކޮށްލައިފި. މިއީ މިހާތަނަށް ބޭއްވުނު އައިބީސީ ވޯލްޑް ޓުއާގެ އެންމެ ފުރިހަމަ އެއް މުބާރާތޭ ބުނަން އަހަރެން ޖެހިލުން ނުވޭ" އައިބީސީގެ ސީއީއޯ އައި ވޯލްޑް ޓުއާ މެނޭޖަރު ގްލެން ހުއެވޭސް ބުންޏެވެ.
އެމްބީބީއޭ އިން މޯލްޑިވްސް ޕްރޯ ބޭއްވީ މާލޭ ރާޅުގަނޑު ސަރަހައްދުގައި ކަމަށް ވިޔަސް މުބާރާތަށް ފަހު އައިބީސީގެ އޮފިޝަލުންނާއި، ދުނިޔޭގެ މަތީ ފަންތީގެ އެތުލީޓުންނާ އެކު މާލޭގެ އުތުރުގެ ރާޅު ޕޮއިންޓްތަކަށް ދިޔައެވެ.
މައިގަނޑު ބޭނުމަކަށްވީ ރާއްޖޭގެ ގުދުރަތީ ރީތިކަމާއި، ރާއްޖޭގެ އެކި ރަށް ރަށުގައި ހުރި ރާޅާ އެޅުމުގެ ހިތްގައިމު ތަންތަން ދައްކާލައި އެ ތަންތަން ތަޖުރިބާ ކޮށްލަން ފުރުސަތު ދިނުމެވެ.
ވިޒިޓް މޯލްޑިވްސް ޕްރޯގެ އެއް ޕާޓްނަރު ކަމަށްވާ، މޯލްޑިވްސް ބޯޓިން އެސޯސިއޭޝަންގެ އެހީތެރިކަމާ އެކު ދިޔަ މި ދަތުރުގައި މާލޭ އަތޮޅުގެ ބައެއް ރަށް ރަށަށްވެސް މަޑު ކުރި އެވެ. އަދި ރަށް ރަށުގެ އާދަކާދަ އާއި ސަގާފަތް ބޭރުގެ އެތުލީޓުންނަށް ދައްކާލައި ތަޖުރިބާ ކޮށްލަން ފުރުސަތު ދިނެވެ.
"މި ދަތުރުގައި އަހަންނަށް ވަރަށް ސަޅި ކަމަކަށްވީ ރާއްޖޭގެ ސަގާފީ ކެއުން. ވަރަށް ތަފާތު ކެއުމެއް އެއީ. އަހަރެން ވަރަށް ބޮޑަށް ގަޔާވެއްޖެ ރާއްޖެއާ މެދު. މި މީހުންގެ އެކުވެރިކަމާއި މެހުމާންދާރީ ވަރަށް ބޮޑަށް ތަފާތު" ދަތުރުގައި ބައިވެރި ކެނެރީ އައިލެންޑްސްގެ އާމިދޭ ސޮލިވަރޭސް ބުންޏެވެ.
ރާއްޖޭގައި ބޭއްވި އައިބީސީ ވޯލްޑް ޓުއާ އިވެންޓަކީ ހުރިހާ ގޮތަކުންވެސް ތާރީހީ އިވެންޓެކެވެ. މިއީ ދުނިޔޭގެ ބޮޑީބޯޑިން އަށް ހުޅުވުނު ބޮޑު ދޮރެކެވެ. ދިވެހި އެތުލީޓުން ފުރަތަމަ މުބާރާތުންވެސް ފެންވަރު ދައްކާލި އެވެ. ދެ އިވެންޓެއްގެ ޕޯޑިއަމުން ދިވެހި އެތުލީޓުން ޖާގަ ހޯދި އެވެ.
މި ކާމިޔާބީތަކާ އެކު އެމްބީބީއޭ އަށް ލިބޭ އެންމެ ބޮޑު އުފަލާއި ހިތްހަމަޖެހުމަކީ ރާއްޖޭގައި ދުނިޔޭގެ ފެންވަރުގެ ގިނަ މުބާރާތްތައް ބޭއްވުމަށް ދުނިޔޭގެ ޗެމްޕިއަނުން އަމިއްލައަށް ބޭނުންވުމެވެ. ސަތޭކަ އިންސައްތަ ދިވެހިންގެ ހިތްވަރުގަދަ ޒުވާނުން ނުކުމެ މުޅި ދުނިޔޭގެ ބޮޑީބޯޑިންއަށް އިންގިލާބީ ބަދަލެއް ގެންނަން ފެށި މަސައްކަތެވެ. ކުޑަ ކުޑަ ދިވެހިރާއްޖޭގައި ފެންވަރު ރަނގަޅު މުބާރާތްތައް ބޭއްވޭނެކަން ދައްކާލުމެވެ.
"އަހަރެން އެނބުރި އަންނާނަން، އަންނަ އަހަރު މި މުބާރާތް އައިބީސީ އިން ބާއްވާނެކަން އަހަންނަށް ޔަގީން، ސާބަހޭ ތި ކުރި މަސައްކަތަށް" ރާއްޖޭއިން ބޭރުން ވާދަކުރި ކޮންމެ އެތުލީޓެއްގެ ފަހު ބަހަކީ މިއީ އެވެ.
