ދިވެހި ސަރުކާރާއި އެމެރިކާ ގުޅިގެން "ޓެމްޕެސްޓް ވިންޑް 2022"ގެ ނަމުގައި ދެ ގައުމުގެ ކަމާ ގުޅުން ހުރި އިދާރާތަކުގެ މެދުގައި ކައުންޓާ ޓެރަރިޒަމް ފަރިތަކުރުންތަކެއް މެދުރާއްޖެ ތެރެ އާއި މާލެ ކައިރި ކަނޑުގެ ސަރަހައްދުގައި ހިންގަން އިއްޔެ ފަށައިފި އެވެ.
މިއީ ރާއްޖެ އާއި އެމެރިކާ ގުޅިގެން މި ތަމްރީންތައް ކުރިއަށް ގެންދާ 11 ވަނަ ފަހަރެވެ. އަދި ރާއްޖޭގައި ބޭއްވޭ ހަތަރުވަނަ ފަހަރެވެ. މި ފަހަރު ކުރިއަށް ގެންދާ ތަމްރީންތައް މި ހިނގާ އޮގަސްޓް މަހުގެ 18 ވަނަ ދުވަހުގެ ނިޔަލަށް ކުރިއަށް ދާނެ އެވެ.
މި ތަމްރީންތަކުގައި ރާއްޖެ އަދި ހަވާއީގެ ކަމާގުޅޭ މުވައްޒަފުން ކައުންޓާ ޓެރަރިޒަމްގެ ސްޓްރެޓަޖީއަށް ފަރިތަވުމަށް އަމާޒުކޮށް ރޭވިފައިވާ ހާއްސަ ހަރަކާތްތަކުގައި ބައިވެރިވާނެ ކަމަށް ޑިފެންސް މިނިސްޓްރީން ބުންޏެވެ.
އެ މިނިސްޓްރީން ބުނި ގޮތުގައި މި ހަރަކާތްތަކުގެ ތެރޭގައި ދެ ގައުމުގެ ގުޅުން ބަދަހިކޮށް ގާބިލްކަން އިތުރުކުރުމަށް އިސްވެރިންގެ ނިންމުންތައް ނިންމާ ގޮތްތަކާއި ހާލަތްތަކަށް އިޖާބަދިނުމުގެ ރޭވުންތައް ރާވާނެ ގޮތްތަކަށް ތަމްރީން ވާނެ އެވެ.
މި ތަމްރީންތަކުގެ ސަބަބުން ކައުންޓާ ޓެރަރިޒަމް އޮޕަރޭޝަންތަކުގައި ކުއްލި ރޭވުންތައް ރޭވުމުގަ އާއި ކޯޑިނޭޓްކުރުމުގައި ހިންގުމުގެ ގާބިލްކަން ދެ ގައުމުގަ ހުރި މިންވަރު ޓެސްޓް ކުރެވޭނެ އެވެ. އަދި އިސްލާހުކުރަން ޖެހޭ ކަންކަން ވެސް ފާހަގަވެގެން ދާނެ އެވެ.
މި ތަމްރީންތަކުގައި ހިމެނޭ މިޝަން ރިހާސަލްގެ ތެރޭގައި މިފަދަ ހާލަތެއްގައި ރާއްޖެ އަދި އެމެރިކާގެ ސަލާމަތީ ބާރުތަކުގެ ރޭވުންތަކާއި، އަމުރުތައް އަދި މުވާސަލާތީ ގާބިލްކަން ހުރި މިންވަރު ޓެސްޓު ކުރުމަށް ކޮމާންޑް ޕޯސްޓް ތަމްރީނެއް ވެސް ހިމެނޭނެ އެވެ.
މި ތަމްރީން ފަރުމާ ކުރެވިފައި ވަނީ ޓެރަރިޒަމްގެ އެކި ހާދިސާތަކަށް އިޖާބަދިނުމުގައި މި ސަރަހައްދުގެ ސަލާމަތީ ބާރުތަކުން ގުޅިގެން މަސައްކަތް ކުރުމަށް އެހީތެރިވެވޭނެ ގޮތަށާއި އަދި ކައުންޓާ ޓެރަރިޒަމްގެ މަސައްކަތްތަކުގައި އެމެރިކާ އަދި ރާއްޖޭގެ ގުޅުން ބަދަހިކުރެވޭނެ ގޮތަށެވެ.
މިއީ ޔޫއެސް އިންޑޯ-ޕެސިފިކް ކޮމާންޑް އިން ކުރިއަށް ގެންދާ އަސްކަރިއްޔާތަކާއި ގުޅުން ބަދަހި ކުރުމުގެ ޕްރޮގްރާމްގެ ބައެކެވެ.
މީގެ އިތުރުން ކޮވިޑް 19 އިން ރައްކާތެރިވުމަކީ ވެސް ދެ ގައުމުން ވެސް އިސްކަންދޭ ކަމަކަށް ވާތީވެ، އެ ބަލިމަޑުކަމުގެ ހާލަތާ ގުޅިގެން އަމަލު ކުރަމުންދާ ދަތުރުފަތުރު ކުރުމުގެ ގަވާއިދުތަކަށް އެމެރިކާގެ ބާރުތަކުން ފުރިހަމައަށް އަމަލުކުރުމާ އެކު ބަދަލުވަމުންދާ ހާލަތްތަކަށް ތައްޔާރުވެ އިޖާބަދިނުމުގެ ގޮތުން ރައްކާތެރިކަމުގެ ފިޔަވަޅުތައް ވެސް އަޅަމުން ގެންދާނެ އެވެ.
