މޯލްޑިވްސް ޕްރޯގެ ޑްރޮޕް ނީ ބައިގެ ސެމީ ފައިނަލުން ޖާގަ ހޯދައި ބޮޑީބޯޑިންގެ ވޯލްޑް ޓުއާ އިވެންޓެއްގެ ގަދަ ހަތަރެއްގައި ހިމެނުނު ފުރަތަމަ ދިވެހިި އެތުލީޓުގެ ޝަރަފް ގައުމީ ޗެމްޕިއަން އަލީ ޚުޝްރުވާން އަހުމަދު (ކުޑަ އައްޔަ) ހޯދައިފި އެވެ.
އިންޓަނޭޝަނަލް ބޮޑީބޯޑިން ކޯޕަރޭޝަން (އައިބީސީ)ގެ ވޯލްޑް ޓުއާ އަކީ ދުނިޔޭގެ އެންމެ މޮޅު ބޮޑީބޯޑަރު ހޮވުމަށް ބާއްވާ އޯޕަން މުބާރާތެކެވެ. މި މުބާރާތުގެ އެކި ލެގުތައް ދުނިޔޭގެ އެކި ގައުމުތަކުގައި ކުރިއަށް ގެންދާއިރު، މާލޭގައި ކުރިއަށް ގެންދާ މޯލްޑިވްސް ޕްރޯއަކީ މި އަހަރުގެ ހަތަރުވަނަ މުބާރާތެވެ.
މާލޭ ރާޅުގަނޑު ސަރަހައްދުގައި ކުރިއަށްދާ މުބާރާާތުގެ އޯޕަން ބައިގައި ކުއާޓާ ފައިނަލުގައި ވާދަކުރާ ބައިވެރިން މިހާރު ފައިނަލް ވެފައިވާއިރު، ރާއްޖޭގެ އަލީ ޚުޝްރުވާން ވެސް ވަނީ ތާރީޚީ ކާމިޔާބެއް ހޯދައި ދުނިޔޭގެ އެންމެ މަތީ ފަންތީގެ މުބާރާތުގެ ގަދަ އަށަކުން ޖާގަ ހޯދާފަ އެވެ.
ފިރިހެން އޯޕަން ހީޓްތަކަށް ފަހު ކުރިއަށް ދިޔައީ ޑްރޮޕްނީ ކެޓަގަރީގެ ހީޓުތަކެވެ. އެގޮތުން ކުއާޓާ ފައިނަލުގައި ޗިލީގެ ޔާކޯ ވަސްކޭޒް ބަލިކޮށް ކުޑަ އައްޔަ ވަނީ މި ބައިގެ ސެމީ ފައިނަލުން ޖާގަ ހޯދާފަ އެވެ. މި ކާމިޔާބީއާ އެކު ކުޑަ އައްޔަ ވެފައިވަނީ އައިބީސީ ވޯލްޑް ޓުއާ މުބާރާތުގެ އިވެންޓެއްގެ ޕޯޑިއަމްއާ ހަމައަށްދިޔަ ފުރަތަމަ އެތުލީޓަށެވެ. އައިބީސީ އިން ޕޮއިންޓު ދީގެން ރޭންކު ކުރާ ތިން އިވެންޓަކީ ފިރިހެން އޯޕަން، އަންހެން އޯޕަން އަދި ޑްރޮޕް ނީ ކެޓަގަރީ އެވެ.
ސެމީ ފައިނަލުން ޖާގަ ލިބުމާ އެކު ދުނިޔޭގެ މިހާރުގެ ޑްރޮޕް ނީ ރޭންކިންގެ ގަދަ 12 ބޮޑީބޯޑަރުންގެ ތެރޭގައި ޔަގީނުންވެސް އައްޔަ ހިމެނޭނެ އެވެ.
މޯލްޑިވްސް ޕްރޯގެ ޑްރޮޕް ނީ ކެޓަގަރީގެ ކުއާޓާ ފައިނަލުގައިކުޑަ އައްޔަ މިއަދު ވާދަކުރަނީ / ފޮޓޯ: އަދަދު
މިއަދު ކުރިއަށްދިޔަ ޑްރޮޕް ނީ ކުއާޓާ ފައިނަލް ހީޓު ކުޑަ އައްޔަ ކާމިިޔާބުކުރީ 7.75ގެ ސްކޯ އަކުންނެވެ. ޔާރްކޯ އަށް ލިބުނީ 5.40ގެ ސްކޯ އެކެވެ.
ޑްރޮޕްނީ ބައިގެ ގަދަ އަށެއްގައި ރާއްޖޭގެ ޝިމާލް ޝަމީމް (ޝިމައްލެ)ވެސް ވާދަކުރި އެވެ. އޭނާ އާ ދެކޮޅަށް ނުކުތީ ރީޔޫނިއަންގެ ފަބިއަން ތަޒާ އެވެ. ފަބިއަން ހީޓު ކާމިޔާބުކުރީ 8.4ގެ ސްކޯ އަކުންނެވެ. ޝިމައްލެ އަށް ލިބުނީ 1.75ގެ ސްކޯ އެކެވެ.
މިއަދު ކުރިއަށްދިޔަ ފިރިހެން އޯޕަން ބައިގެ އިވެންޓުތަކަސް ބަލާއިރު، ހަތަރުވަނަ ބުރުން ރާއްޖޭގެ އަލީ ޖާވިދު ކެޓީ ރީޔޫނިއަންގެ ފަބިއަން އަތުންނެވެ. ރާއްޖޭގެ ޒުވާން ބޯޑަރު އިޔާން އަހުމަދު ބަލިވީ ދެ ފަހަރު ދުނިޔޭގެ ޗެމްޕިއަންކަން ހޯދާފައިވާ ފްރާންސްގެ ޕިއޭ ލުއިސް ކޮސްޓެސް އާ ވާދަކޮށްގެންނެވެ. ރާއްޖޭގެ އަސްވާން މުހައްމަދު ބަލިވީ ޑޭވިޑް ހުއްބާޑުއާ ވާދަކޮށްގެންނެވެ.
