މި އަހަރުގެ ފުރަތަމަ ހަ މަސް ދުވަހު ކުޑަކުދިންނާ ގުޅުން ހުރި 1000 އަށްވުރެ ގިނަ މައްސަލައެއް ހުށަހަޅާފައިވާ ކަމަށް ތަފާސްހިސާބުތަކުން ދައްކައިފި އެވެ.
ޗައިލްޑް އެންޑް ފެމިލީ ޕްރޮޓެކްޝަން ސާވިސްއިން އާންމު ކުރި ތަފާސްހިސާބުތަކުން ދައްކާގޮތުން މި އަހަރުގެ ފުރަތަމަ ހަ މަސް ދުވަހު މުޅި ރާއްޖެއިން ހުށަހަޅާފައި ވަނީ ކުޑަކުދިންނާ ގުޅުންހުރި ޖުމްލަ 1060 މައްސަލަ އެވެ.
ރިޕޯޓުކުރި މައްސަލަތަކުގެ ތެރެއިިން 450 މައްސަލައަކީ މާލެ ސަރަހައްދުން ހުށަހަޅާފައިވާ މައްސަލަތަކަށް ވާއިރު، މާލޭގެ އިތުރުން އެންމެ ގިނަ މައްސަލަ ހުށަހެޅީ އައްޑުއިންނެވެ. އައްޑޫ ސިޓީން ހުށަހެޅީ 100 މައްސަލަ އެވެ. އަދި ކ. އަތޮޅުން 49 މައްސަލަ ރިޕޯޓުކުރިއިރު، ބ. އަތޮޅުން 43 މައްސަލަ ރިޕޯޓުކޮށްފައި ވެއެވެ.
މި ހަ މަސް ތެރޭގައި އެންމެ މަދުން މައްސަލަ ރިޕޯޓުކުރީ ދ. އަތޮޅާއި މ. އަތޮޅުގެ އިތުރުން ވ. އަތޮޅުންނެވެ. އެގޮތުން ދ. އަތޮޅުން ތިން މައްސަލަ، މ. އަތޮޅުން ތިން މައްސަލަ އަދި ވ. އަތޮޅުން ފަސް މައްސަަލަ ރިޕޯޓުކޮށްފައި ވެއެވެ.
ރާއްޖޭގައި އެންމެ ގިނައިން ރިޕޯޓުކުރާ ކުޑަކުދިންނާ ގުޅޭ މައްސަލަތަކުގެ ތެރޭގައި ހިމެނެނީ ޖިންސީ ގޯނާގެ މައްސަލަތަކާއި، ޖިސްމާނީ އަދި ނަފްސާނީ އަނިޔާ އަދި ގެވެށި އަނިޔާ ކުރުމުގެ މައްސަލަތަކުގެ އިތުރުން އިހުމާލުވުމުގެ މައްސަލަތަކެވެ.
