ދިވެހި ފުލުހުންނާއި މާލެ ސިޓީ ކައުންސިލާ ދެމެދު ވެފައިވާ ސްޕެޝިއަލް ކޮންސްޓެބިއުލަރީ ހިދުމަތް މިއަދުން ފެށިގެން މާލެ ސަރަހައްދުގައި ދެވޭ ގޮތަށް ފަށައިފި އެވެ.
މާލެ ސިޓީ ކައުންސިލުން ބުނި ގޮތުގައި މި ހިދުމަތް މާލެ ސަރަހައްދުގައި ދޭން ފަށަނީ 40 ފުލުހުންނާ އެކުގަ އެވެ.
މި ހިދުމަތް ދިނުމުގެ ގޮތުން މިދިޔަ ހަފްތާގައި ފެށި އޮރިއެންޓޭޝަން ސެޝަންތައް ނިންމާލައި، އެންމެ ފަހު ބައްދަލުވުން މާލެ ސިޓީ ކައުންސިލްގެ މީޑިއާ ސެންޓަރުގައިި ރޭގެ ވަގުތެއްގައި ވަނީ ބާއްވައިފަ އެވެ.
ފުލުންގެ ފަރާތުން މި ހިދުމަތާ ހަވާލުވެގެން ހުންނެވި، އިންސްޕެކްޓަރު މުހައްމަދު ލުތުފީ ވިދާޅުވީ، މި މައްސަކަތަކީ ކުރިން ވެސް ފުލުހުން އިސްވެ ކުރިއަށް ގެންދިޔަ މަސައްކަތެއް ކަމަށާއި، އެކަމަކު އެކި ސަބަބުތަކާ ހުރެ މެދުކެނޑިފައި އޮތް މުހިއްމު މަސައްކަތެއް ކަމަށެވެ.
މީގެ އިތުރުން އޭނާ ވިދާޅުވީ، މާލެ ސިޓީ ކައުންސިލުން އިސްވެ އަނެއްކާ ވެސް މި މަސައްކަތް ކުރަން ފުލުހުންނަށް ހުށަހެޅުމަކީ ވަރަށް ވެސް ބޮޑު ލުއި ފަސޭހަތަކެއް ފުލުންނަށް އަދި އާންމުނަށް ވެސް ލިބިގެންދާނެ ކަމެއް ކަމަށެވެ.
މި ހިދުމަތުގެ ތެރެއިން، މަގުމަތީގައި އުޅޭ މީހުންނަށް އުނދަގޫވެ ނުރައްކާވާ ގޮތަށް ހަދާ އިމާރާތްތަކާއި، އިމާރާތްތަކުގެ ޓެރަސް ފަދަ ތަންތަނާއި ބެލްކަނީތަކުގައާއި ގޭގޭގެ ފާރުމަތީގައި ތަކެތި ބެހެއްޓުމާއި، ރައްޔިތުންނަށް އުނދަގޫވާނެ ގޮތަށް އާންމު ތަންތަނުގައި ތަކެތި ބަހައްޓައިގެން ވިޔަފާރިކުރުން ފަދަ ކަންކަމުގައި ފުލުހުން ފިޔަވަޅު އަޅާނެ އެވެ.
މާލެސިޓީގެ މުނިސިޕަލް ހިދުމަތް ރަނގަޅު ކުރުމަށްޓަކައި "ސްޕެޝަލް ކޮންސްޓެބިއުލަރީ" ހިދުމަތް ދިނުމަށްޓަކައި މާލެ ސިޓީ ކައުންސިލާއި ފުލުހުންނާ ދެމެދު އެއްބަސްވުމުގައި ސޮއި ކޮށްފައި ވަނީ ފެބްރުއަރީ މަހުގެ 15 ވަނަ ދުވަހުއެވެ.
