ވިޒިޓް މޯލްޑިވްސް ޕްރޯ 2022 ގަައި ވާދަކުރާ ރާއްޖޭގެ ގައުމީ ސީނިއާ އަދި ޖޫނިއާ ބޮޑީބޯޑިން ޓީމް މަރުކަބު ޕްލާޒާ ގައި ކޭމްޕް ކޮށްފި އެވެ.
ވިޒިޓް މޯލްޑިވްސް ޕްރޯ އަކީ އިންޓަނޭޝަނަލް ބޮޑީބޯޑިން ކޯޕަރޭޝަން (އައިބީސީ)ގެ ވޯލްޑް ޓުއާގެ މުބާރާތެކެވެ. މި މުބާރާތަށް ދުނިޔޭގެ އެކި ގައުމުތަކުން މަތީ ފަންތީގެ ބޯޑަރުން ވާދަކުރާނެ އެވެ. މުބާރާތުގެ ހުޅުވުމުގެ ރަސްމިއްޔާތު އިއްޔެ ބާއްވާފައިވާއިރު، މިއީ އައިބީސީގެ މުބާރާތެއް އޭޝިއާ ސަރަހައްދުގައި ވެސް ބާއްވާ ފުރަތަމަ ފަހަރެވެ.
މުބާރާތުގެ އިވެންޓުތަކުގެ ހީޓުތައް މިއަދު ފެށުމަށް ހަމަޖެހިފައިވާއިރު، ރާއްޖޭގެ އަށް އެތުލީޓުން މި ހީޓުތަކުގައި ވާދަކުރާނެ އެވެ. މިގޮތުން ރާއްޖޭގެ ސީނިއާ ޓީމުގައި ހިމެނޭ ބޮޑީބޯޑަރުންނަކީ އަލީ ޚުޝްރުވާން އަހުމަދު (ކުޑަ އައްޔަ)، އަލީ ޖާވިދު (ޖާއްޓެ)، މުހައްމަދު ވިއާމް (ޖޭޑީ) އަދި މުހައްމަދު ރީޝާން ރަޝީދު އެވެ.
ޖޫނިއާ ޓީމުގައި ހިމެނޭ ހަތަރު ބޮޑީބޯޑަރުންނަކީ ޝިމާލް ޝާމީމް (ޝިމައްލެ)، އިޔާން އަހުމަދު، މުހައްމަދު ޖަރީޝް ޖިހާދު (ޑީކޭ) އަދި މުހައްމަދު ޖަރީޝް ޖިހާދު (ޑީކޭ) އެވެ.
ގައުމީ ޓީމް ކޭމްޕްކޮށްފައިވަނީ މުބާރާތުގެ އެއް ޕާޓްނަރު ކަމަށްވާ މަރުކަބު ޕްލާޒާގަ އެވެ. މިއީ ގައުމީ ބޮޑީބޯޑިން ޓީމެއް ބައިނަލްއަގްވާމީ މުބާރާތަކަށް މި ގޮތަށް ކޭމްޕްކުރި ފުރަތަމަ ފަހަރެވެ.
ބައިނަލްއަގްވާމީ މުބާރާތްތަކާއި ދިމާކޮށް ޓީމްތަކުން އެއްކޮށް އެއް ތަނެއްގައި ކޭމްޕް ކުރުމަކީ އާންމު ކަމެކެެވެ. މި ގޮތުން މީގެ ކުރިން ރާއްޖޭގައި ބޭއްވި ބައެއް ބައިނަލްއަގްވާމީ މުބާރާތްތަކާއި ދިމާކޮށް އެ މުބާރާތްތަކުގައި ވާދަކުރި ގައުމީ ޓީމްތަކުން އެއްތަނެއްގައި ކޭމްޕް ކުރިކަން ފާހަގަކޮށްލެވެ އެވެ.
