މާލޭގެ ރާޅުގަނޑު ސަރަހައްދުން ނަގާ ރާޅުތަކަކީ ބޮޑީބޯޑިން އަށް އެންމެ އެކަށޭނަ ފެންވަރު ރަނގަޅު ރާޅުތަކެއްކަމަށް ދުނިޔޭގެ ބޮޑީބޯޑިން ޗެމްޕިއަންކަން ހަތަރު ފަހަރު ހޯދާފައިވާ ބްރެޒިލްގެ އިޒަބެލާ ސޫސާ ބުނެފި އެވެ.
ދުނިޔޭގެ މަޝްހޫރު އެތަށް ޗެމްޕިއަނުންނެއް ވާދަކުރާ "ވިޒިޓް މޯލްޑިވްސް ޕްރޯ 2022" ފަށަން ތައްޔާރުވެފައިވާއިރު، މިއީ އޭޝިއާ ސަރަހައްދުގައި އައިބީސީ ވޯލްޑް ޓުއާގެ ލެގެއް ބާއްވާ ފުރަތަމަ ފަހަރެވެ. މި މުބާރާތުގެ ހުޅުވުމުގެ ރަސްމިއްޔާތު މިއަދު އޮންނައިރު، ބޮޑީބޯޑިން އިވެންޓުތައް ކުރިއަށްދާނީ މާދަމާ ހެނދުނުން ފެށިގެންނެވެ.
މުބާރާތުގައި ވާދަކުރާ ހުރިހާ އެތުލީޓުން ވެސް މިހާރު ރާއްޖެ އައިސްފައިވާއިރު، ހުރިހާ ބޯޑަރުންގެ އެންމެ ބޮޑަށް ތައުރީފު ކުރާ އެއް ކަމަކީ މާލޭގެ ރާޅުގަނޑެވެ. ބައެއް ގައުމުތަކުގެ ރާޅު ޕޮއިންޓުތަކުގައި ރާޅު ނަގަނީ ވަކި ގަޑިތަކެއްގަ އެވެ. އެކަމަކު، ރާޅުގަނޑު ސަރަހައްދުގައި މުޅި ދުވަހު އެއްކޮށް ރާޅުތައް އެއްވަރެއްގައި ނަގާތީ އެކަން ހުރިހާ ބޯޑަރުންވެސް ފާހަގަކުރި އެވެ.
އިޒަބެލާ ރާޅުގަނޑު ސަރަހައްދުގައި ރާޅާއަޅަނީ.--- ފޮޓޯ: އަބްދުﷲ އިޔާން/ އަދަދު
ދުނިޔޭގެ ޗެމްޕިއަން، އިޒަބެލާ ބުނީ ރާޅުގަނޑު ސަރަހައްދުގައި ނަގާ ރާޅުތަކަކީ ބޮޑީބޯޑިން އަށް އެންމެ "ފައްކާ" ފެންވަރުގެ ރާޅުތަކެއް ކަމަށެވެ. އަދި އެ ސަރަހައްދުގެ ރާޅުތަކުގެ ބާރު މިނާއި އުސްމިނަށް ބަލާއިރު ވެސް ވަރަށް ހިތްގައިމު ކަމަށް އިޒަބެލާ ވަނީ ބުނެފަ އެވެ.
އޭނާ ބުނީ މި ސަރަހައްދުގެ އެންމެ ހިތްގައިމު ކަމަކީ ހުރިހާ ވަގުތަކު ވެސް ރީތި ރާޅުތަކެއް ނެގުން ކަމަށެވެ.
އިޒަބެލާ ބުނީ ރާއްޖޭގެ ރާޅުތަކަކީ މީގެ ކުރިން މުބާރާތްތަކުގައި އަޅާފައި ހުރި ރާޅުތަކަށް ވުރެ ތަފާތު ރާޅުތަކެއްކަމަށެވެ. އެހެންކަމުން މިއީ ތަފާތު ތަޖުރިބާއަކަށް ވާނެ ކަމަށެވެ.
"މި ރާޅުތައް ވަރަށް ސަޅި. ވަރުގަދަ ރާޅުތަކެއް އެ ނަގަނީ. އެކަމަކު، ނުރައްކާވާ ކަހަލަ ގޮތަކަށް ނޫން. މި ކަންޑިޝަން އަކީ ބޮޑީބޯޑިން އަށް ވަރަށް ހިތްގައިމު ކަންޑިޝަން އެއް، ވަރަށް ހިތްހަމަޖެހިފައި މިހިރީ" އިޒަބެލާ، 33، ބުންޏެވެ.
އިޒަބެލާ ބުނީ މުބާރާތުގެ ފެންވަރު ރަނގަޅުވާނީ ވެސް ރާޅުތަކުގެ ފެންވަރު ރަނގަޅުވެގެން ކަމަށެވެ. ރާޅުގަނޑަށް ބަލާލާފައި މި މުބާރާތުގައި ވާދަކުރާ ބޮޑީބޯޑަރުންގެ ފަރާތުން ވަރަށް ތަފާތު މޮޅު ހުނަރުތަކެއް ފެންނާނެކަމުގެ ޔަގީންކަން އެބައޮތް ކަމަށް އިޒަބެލާ ވަނީ ބުނެފަ އެވެ.
ބްރެޒިލްގެ އެންމެ ފާހަގަކޮށްލެވޭ ބޮޑީބޯޑަރު ބުނީ ރާއްޖޭގައި އަލަށް ބޭއްވި ކަމުގައިވިޔަސް ތައްޔާރީތަކަށް ބަލާއިރު އެކަން ފާހަގަ ނުވާކަމަށެވެ.
"ފުރަތަމަ ފަހަރަށް މިވަރުގެ މުބާރާތެއް މިއޮންނަނީ ރާއްޖޭގައި. އެކަމަކު އާ ކަމެއް ނެތް. ވަރަށް ތައްޔާރުވެފައި އޮތް ކަން އެބަ އިނގޭ. އެތުލީޓުން ވަރަށް ހިތްހަމަ ޖެހިގެން މުބާރާތް ފުރިހަމަކުރާނެކަމުގެ އިތުބާރު އެބައޮތް" އިޒަބެލާ ބުންޏެވެ.
"އަހަރެން ދެކެފިން ރާއްޖޭ ކުދިން ބޯޑީބޯޑު ކުރާތަން. ވަރަށް ހުނަރުވެރި ކުދިން އެބަތިބި. ބޭނުންވަނީ އެކުދިންނަށް ފުރުސަތު ލިބުން. ވަރަށް މޮޅު ރާއްޖެ ކުދިން"
އޭނާ ބުނީ ރާއްޖެއަކީ ވަރަށް އަންނަން ބޭނުންވެފައި ހުރި ގައުމެއްކަމަށާއި، މިކަހަލަ މުބާރާތެއް ރާއްޖޭގައި އޮތުމަކީ ގިނަ ބަޔަކަށް ހިތްހަމަޖެހުން ލިބޭނެކަމެއްކަމަށެވެ. އަލަށް މިފަހަރު އާދެވުނު ނަމަވެސް ވަރަށް އަވަހަށް ޗުއްޓީއަށްވެސް ރާއްޖެ އަންނާނެކަމަށް އޭނާ ބުންޏެވެ.
